નવા Aadhaar એપમાં રજીસ્ટ્રેશન કેવી રીતે કરવું: સ્ટેપ-બાય-સ્ટેપ પ્રક્રિયા
ભારતીય વિશિષ્ટ ઓળખ સત્તામંડળ (UIDAI) એ તાજેતરમાં આધાર કાર્ડ સંબંધિત સુવિધાઓ માટે નવી Aadhaar એપ (ફુલ વર્ઝન એપ) લોન્ચ કરી છે. આ એપ દ્વારા યુઝર્સ હવે ફોન નંબર અપડેટ કરવાથી લઈને સરનામામાં ફેરફાર કરવા જેવા કામ ઘરે બેઠા કરી શકે છે, જેના માટે પહેલા આધાર કેન્દ્ર પર જવું ફરજિયાત હતું. આ એપ દ્વારા ઓફલાઇન વેરિફિકેશન થઈ શકે છે અને પરિવારના અનેક આધાર કાર્ડને એકસાથે કંટ્રોલ કરી શકાય છે. નવી એપ યુઝર્સને તેમની આધાર માહિતી સુરક્ષિત રીતે સાચવવા, અપડેટ રાખવા અને અન્ય લોકો સાથે શેર કરવાની સુવિધા આપે છે. અહીં અમે તમને જણાવી રહ્યા છીએ કે તમે આ એપ કેવી રીતે ડાઉનલોડ કરી શકો છો અને તેના માટે કેવી રીતે રજીસ્ટ્રેશન કરી શકો છો.
હવે ઘરે બેઠા થશે આધારના તમામ કામ
નવી Aadhaar એપ આઇફોન યુઝર્સ માટે એપલ એપ સ્ટોર અને એન્ડ્રોઇડ સ્માર્ટફોન યુઝર્સ માટે ગૂગલ પ્લે સ્ટોર પર ડાઉનલોડ કરવા માટે ઉપલબ્ધ છે. આ એપની પ્રથમ જાહેરાત નવેમ્બર 2025માં થઈ હતી અને તે સમયે એપ મર્યાદિત ફીચર્સ સાથે ઉપલબ્ધ હતી, પરંતુ હવે તેના તમામ ફીચર્સ ઉપલબ્ધ થઈ ગયા છે. આ એપ 13 ભારતીય ભાષાઓને સપોર્ટ કરે છે.
નવા Aadhaar એપમાં રજીસ્ટ્રેશન કરવાની રીત:
- સૌ પ્રથમ, તમારા ફોન મુજબ ગૂગલ પ્લે સ્ટોર અથવા એપલ એપ સ્ટોર દ્વારા UIDAI દ્વારા તૈયાર કરવામાં આવેલી નવી Aadhaar એપ ડાઉનલોડ કરીને ઇન્સ્ટોલ કરો.
- એપ ઇન્સ્ટોલ કર્યા પછી તેને ખોલો અને તમારી પસંદગીની ભાષા પસંદ કરો અને ત્યારબાદ નિયમો અને શરતોનો સ્વીકાર કરો.
- હવે મુખ્ય પેજ પર ગયા પછી ડેશબોર્ડ પર ‘રજિસ્ટર્ડ આધાર’ ટેબ પર ક્લિક કરો.
- ત્યારબાદ તમારે તમારો 12 અંકનો આધાર નંબર દાખલ કરવાનો રહેશે.
- પછી આધાર સાથે લિંક થયેલ મોબાઈલ નંબર દાખલ કરો. તમારા ડિવાઇસને વેરિફાય કરવા માટે મોબાઈલ નંબર પર એક OTP આવશે, જે દાખલ કરવાનો રહેશે.
- હવે ‘સિમ બાઈન્ડિંગ’ માટે ફોન દ્વારા એક SMS મોકલવામાં આવશે, જેની પ્રક્રિયા પૂર્ણ કરો. હવે ફેસ ઓથેન્ટિકેશન કરવા માટે આપેલી માર્ગદર્શિકાને અનુસરો.
- અહીં તમારે ફોનને એવી રીતે પકડવો પડશે કે ફ્રન્ટ કેમેરો તમારા ચહેરાને કેપ્ચર કરે, જેમાં તમારે બે વાર આંખો પટકાવવાની (blink) રહેશે અને આ પ્રક્રિયા પૂર્ણ થઈ જશે.
- ત્યારબાદ તમારે 6 અંકનો એપ પિન (PIN) બનાવવાનો રહેશે અને તેને બે વાર દાખલ કરીને વેરિફાય કરવાનો રહેશે. ખાસ ધ્યાન રાખવું કે આ પિન તમારે યાદ રાખવો અથવા ક્યાંક નોંધી લેવો, કારણ કે એપમાં લોગિન કરતી વખતે તેની જરૂર પડશે.
- આ કર્યા પછી પ્રક્રિયા પૂર્ણ થઈ જશે અને હવે તમને હોમ પેજ પર રીડાયરેક્ટ કરવામાં આવશે, જ્યાં તમે આધાર સંબંધિત માહિતી જોઈ શકશો અને ફીચર્સનો ઉપયોગ કરી શકશો.
