ધરમપુર હિલ- રનિંગનું નવું રાષ્ટ્રીય કેન્દ્ર બન્યું, ૧૫૦ આદિવાસી દીકરીઓએ પણ ભાગ લીધો
વલસાડ જિલ્લાનો ધરમપુર તાલુકો આજે ફરી એકવાર રમતગમત, પર્યટન અને સામાજિક સશક્તિકરણનું કેન્દ્ર બની ગયો છે, કારણ કે વિલ્સન અલ્ટ્રા મેરાથોન એડિશન ૩ નું ભવ્ય અને સફળ આયોજન તા. ૧ ફેબ્રુઆરીએ પૂર્ણ થયું હતું. ૧૮ કિમી સંસ્થા દ્વારા આયોજિત ૫ કિમી, ૧૦ કિમી, ૨૧ કિમી, ૩૫ કિમી અને ૫૦ કિમીની આ મેરાથોનમાં દેશના વિવિધ ભાગોમાંથી આવેલા ૫૫૦થી વધુ દોડવીરોએ ભાગ લીધો હતો, જેમાં ૧૫૦ આદિવાસી દીકરીઓનો સમાવેશ હોવાથી ઇવેન્ટને વિશેષ સામાજિક ઊર્જા મળી હતી.
દોડનું પ્રારંભ બિંદુ સિદૂંબર પ્રાથમિક શાળાને બનાવવામાં આવી હતી અને રાત્રિના ૩ વાગ્યે દોડવીરો વિલ્સન હિલ તરફ આગળ વધ્યા હતા. ઉંચાઈ અને વળાંકોથી ભરેલો આ માર્ગ દોડવીરોની સહનશક્તિ અને માનસિક ક્ષમતાની કસોટી કરતો હતો. રાત્રિના અંધકારમાંથી ઉગતા સૂર્યની સાથે દોડ પૂર્ણ કરનારાઓએ આ અનુભવને ‘અસલ હિલ-રનિંગનો પ્રેરક પળ’ તરીકે વર્ણવ્યો હતો. પ્રાકૃતિક સૌંદર્યથી ભરપૂર વિલ્સન હિલનો માર્ગ દોડવીરો માટે આકર્ષણનું મુખ્ય કેન્દ્ર રહ્યો હતો.
આ સંસ્કરણમાં વિવિધ અંતરની કેટેગરીઓના કારણે દોડવીરોને પોતાની ક્ષમતા અનુસાર પડકાર પસંદ કરવાની તક મળી હતી. ખાસ કરીને ૩૫ કિલોમીટર અને ૫૦ કિલોમીટરના ટ્રેલ રનમાં દેશભરના પ્રતિષ્ઠિત અલ્ટ્રા દોડવીરોની ભાગીદારીએ ધરમપુરને રાષ્ટ્રીય હિલ-રનિંગ નકશા પર વધુ મજબૂત સ્થાન અપાવ્યું છે.
આ સમગ્ર મેરાથોનની સૌથી પ્રભાવશાળી પહેલ તરીકે ‘Run for Tribal Girl’ યથાવત રહી હતી. લાંબા અંતરની દરેક નોંધણી સાથે એક આદિવાસી દીકરીને પાંચ કિલોમીટર દોડમાં મફત ભાગ લેવાની તક આપવામાં આવતી હોવાથી આ વર્ષે ૧૫૦ દીકરીઓએ જીવનમાં પહેલીવાર મેરાથોન દોડવાનો અનુભવ મેળવ્યો હતો. આ પહેલ હવે વિલ્સન અલ્ટ્રા મેરાથોનની એક ઓળખ બની ગઈ છે અને સામાજિક સશક્તિકરણના દિશામાં મહત્વપૂર્ણ યોગદાન આપી રહી છે.
ઇવેન્ટ દરમિયાન સુરત રેન્જના ડીઆઈજી કરણરાજ વાઘેલા, ધરમપુરના એએસપી સંદીપ પી. અને માઇનિંગ જિયોલોજિસ્ટ પ્રવીણ ખાંભલાની હાજરીએ કાર્યક્રમને વિશેષ પ્રતિષ્ઠા આપી હતી. તેમની ઉપસ્થિતિ માત્ર ખેલોત્સવને પ્રોત્સાહિત કરતી નથી, પણ વલસાડ જિલ્લામાં ભવિષ્યમાં વધુ ખેલોત્સવો અને પર્યટન વિકાસની શક્યતાઓને પણ બળ આપે છે.
આયોજક શ્રી ભૂપેશ પ્રજાપતિએ જણાવ્યું કે, વિલ્સન અલ્ટ્રા મેરાથોન માત્ર એક રેસ નથી, પરંતુ સહનશક્તિ, સમુદાય અને કુદરતની ઉજવણી છે. અનુભવી દોડવીરોની સાથે આદિવાસી દીકરીઓને દોડતા જોવાનું ક્ષણ સમગ્ર ઇવેન્ટ માટે સૌથી પ્રેરણાદાયી રહ્યું હતું અને રમત સમાજમાં સકારાત્મક પરિવર્તન લાવવા સક્ષમ છે તેનું ઉત્તમ ઉદાહરણ છે. આ રીતે ત્રીજી વખતની સફળતા સાથે વિલ્સન અલ્ટ્રા મેરાથોન હવે ધરમપુર અને વલસાડ વિસ્તારનું સૌથી મહત્વપૂર્ણ રમતોત્સવ બની ગયું છે. આ દોડ સ્થાનિક પર્યટનને વેગ આપે છે, આદિવાસી સમુદાયોને સશક્ત કરે છે અને યુવા પેઢીને હિલ-રનિંગ તરફ પ્રોત્સાહિત કરતી નવી દિશા આપે છે.
