કેબ બજારમાં નવો ખેલાડી: આજથી શરૂ થઈ રહી છે ‘ભારત ટેક્સી’, કમિશન વગર અને નક્કી કરેલા ભાડાનો વાયદો
દેશની ટેક્સી સેવા ઉદ્યોગમાં આજે એક નવો અધ્યાય જોડાવા જઈ રહ્યો છે. ઓલા અને ઉબેર જેવી ખાનગી કંપનીઓના વર્ચસ્વને પડકારવા માટે દેશની પ્રથમ સહકારી ટેક્સી સેવા ‘ભારત ટેક્સી’ ને આજે ઔપચારિક રીતે લોન્ચ કરવામાં આવશે. આ પ્લેટફોર્મની સૌથી મોટી ઓળખ છે—ડ્રાઈવરોની ભાગીદારી, ઓછું ભાડું અને કોઈ પણ પ્રકારના ‘સર્જ પ્રાઇસિંગ’ વગરની સુવિધા.
કેન્દ્રીય ગૃહ અને સહકારિતા મંત્રી અમિત શાહ વિજ્ઞાન ભવનમાં આયોજિત કાર્યક્રમમાં આ એપનું ઉદ્ઘાટન કરશે. શરૂઆતના તબક્કે આ સેવા દિલ્હી-એનસીઆરમાં શરૂ કરવામાં આવી રહી છે અને ત્યારબાદ મુંબઈ, બેંગલુરુ અને ચેન્નાઈ જેવા મોટા મહાનગરોમાં વિસ્તારવાની યોજના છે.
ડ્રાઈવર માત્ર કર્મચારી નહીં, હવે માલિક પણ
ભારત ટેક્સી હાલના કેબ મોડલથી તદ્દન અલગ રસ્તો અપનાવે છે. અહીં ડ્રાઈવર કોઈ કંપની માટે કામ કરતા એજન્ટ નથી, પરંતુ સહકારી સંસ્થાના સભ્ય હશે. પ્લેટફોર્મ સાથે જોડાયેલા દરેક ડ્રાઈવરને કો-ઓપરેટિવમાં ભાગીદારી આપવામાં આવશે, જેથી તેઓ નિર્ણય લેવાની પ્રક્રિયાનો પણ હિસ્સો બની શકે. આ મોડલમાં ડ્રાઈવરો પાસેથી કોઈ કમિશન લેવામાં આવશે નહીં. તેમણે માત્ર એક નજીવો સભ્યપદ ફ્રી (સબસ્ક્રિપ્શન ફી) આપવાની રહેશે, જે તેઓ દૈનિક, સાપ્તાહિક કે માસિક ધોરણે પોતાની સુવિધા અનુસાર ચૂકવી શકે છે.
નક્કી કરેલું ભાડું, કોઈ સર્જ ચાર્જ નહીં
મુસાફરો માટે ભારત ટેક્સીનું સૌથી મોટું આકર્ષણ તેનું ભાડાનું મોડલ છે. કંપનીનો દાવો છે કે તેનું ભાડું બજારમાં પ્રવર્તતા દરો કરતા અંદાજે 30 ટકા જેટલું ઓછું હોઈ શકે છે. ખાસ વાત એ છે કે તેમાં ‘સર્જ પ્રાઇસિંગ’ (વધારે માંગ સમયે વધતું ભાડું) નહીં હોય—પછી ભલે વરસાદ હોય, ટ્રાફિક જામ હોય કે પીક અવર્સ હોય, ભાડું પહેલેથી નક્કી રહેશે.
બાઈકથી લઈને કાર સુધીના વિકલ્પો
ભારત ટેક્સી એપ પર મુસાફરોને બાઈક ટેક્સી, રિક્ષા (ઓટો) અને કાર—આ ત્રણેય પ્રકારની સેવાઓ ઉપલબ્ધ થશે. આનાથી લોકો પોતાની જરૂરિયાત અને બજેટ મુજબ સરળતાથી વિકલ્પ પસંદ કરી શકશે.
ડ્રાઈવરો માટે સુરક્ષા અને આર્થિક ટેકો
આ પ્લેટફોર્મ ડ્રાઈવરોની સામાજિક સુરક્ષા પર પણ ધ્યાન કેન્દ્રિત કરે છે:
- દરેક ડ્રાઈવરને 5 લાખ રૂપિયાનું વ્યક્તિગત અકસ્માત વીમો અને 5 લાખ રૂપિયાનું કૌટુંબિક સ્વાસ્થ્ય વીમો મળશે.
- ભવિષ્યમાં પોતાની ગાડી ખરીદવા માટે સરળ શરતો પર લોનની સુવિધા પણ આપવામાં આવશે.
લોન્ચ પહેલા જ જોવા મળ્યો ભરોસો
સત્તાવાર લોન્ચિંગ પહેલા જ ભારત ટેક્સીને જબરદસ્ત પ્રતિસાદ મળ્યો છે. જૂન 2025 માં શરૂ થયેલી આ પહેલ સાથે અત્યાર સુધીમાં 3 લાખથી વધુ ડ્રાઈવરો જોડાઈ ચૂક્યા છે, જ્યારે 1 લાખથી વધુ યુઝર્સે એપ પર રજીસ્ટ્રેશન કરાવી લીધું છે. આ આંકડાઓ સંકેત આપે છે કે લોકો કેબ સેવાના આ નવા મોડલને લઈને ખૂબ જ ઉત્સાહિત છે.
