આધાર કાર્ડ ધારકો માટે એલર્ટ! ૩૦ જૂન બાદ આ એપ કામ કરવાનું બંધ કરી દેશે, નવી એપ ડાઉનલોડ કરો.
દેશભરમાં ૧ જુલાઈથી ઘણા નવા નિયમો અમલી બની રહ્યા છે, જેમાંથી એક અત્યંત મહત્વનો નિયમ ‘આધાર કાર્ડ’ સાથે જોડાયેલો છે. વર્ષ ૨૦૦૯માં શરૂ થયેલા આ પ્રોજેક્ટ હેઠળ અત્યાર સુધી ૧૪૪ કરોડથી વધુ આધાર નંબર ઇશ્યૂ થઈ ચૂક્યા છે. હવે યુનિક આઈડેન્ટિફિકેશન ઓથોરિટી ઓફ ઇન્ડિયા (UIDAI) એ આધારના ઉપયોગને વધુ સુરક્ષિત અને આધુનિક બનાવવા માટે એક મોટો નિર્ણય લીધો છે.
૧ જુલાઈથી જૂની mAadhaar એપ થશે બંધ
જો તમે અત્યાર સુધી આધારના કામો માટે ‘mAadhaar’ એપનો ઉપયોગ કરતા હોવ, તો હવે તમારે સાવધ રહેવાની જરૂર છે. સરકારે સ્પષ્ટ કર્યું છે કે ૩૦ જૂન ૨૦૨૬ ના રોજ આ એપ સત્તાવાર રીતે બંધ થઈ ગઈ છે. હવે ૧ જુલાઈથી આ જૂની એપ પર તમને આધાર સંબંધિત કોઈ પણ માહિતી જોવા મળશે નહીં. UIDAI એ સોશિયલ મીડિયા પ્લેટફોર્મ ‘X’ પર જાણકારી આપી હતી કે તમામ આધાર ધારકોએ હવે નવી ‘Aadhaar App’ ડાઉનલોડ કરવી અનિવાર્ય છે.
નવી Aadhaar એપ કેમ ખાસ છે?
નવી લોન્ચ થયેલી ‘Aadhaar App’ જૂની સિસ્ટમ કરતા ઘણી વધારે સુરક્ષિત અને એડવાન્સ છે. આ એપને વપરાશકર્તાઓની પ્રાઈવસીને ધ્યાનમાં રાખીને બનાવવામાં આવી છે. તેની સૌથી મોટી ખાસિયત ‘સ્માર્ટ પ્રાઈવસી’ ફીચર છે.
-
માહિતીનું નિયંત્રણ: હવે તમારું આખું આધાર કાર્ડ ત્યારે જ દેખાશે જ્યારે તમે તેની પરવાનગી આપશો.
-
ઓટોમેટિક બ્લર ફીચર: જો તમારે ક્યાંક માત્ર તમારું નામ કે ઉંમર જ બતાવવાની હોય, તો કાર્ડ પર આપેલી અન્ય અંગત વિગતો (જેમ કે સરનામું કે આધાર નંબર) આપમેળે જ બ્લર (ધૂંધળી) થઈ જશે.
-
સુરક્ષિત શેરિંગ: તમે તમારી જરૂરિયાત મુજબ નક્કી કરી શકશો કે તમારે કેટલી માહિતી શેર કરવી છે.
નવી એપ કેવી રીતે ડાઉનલોડ કરવી?
નવી એપ ડાઉનલોડ કરવી ખૂબ જ સરળ છે, પરંતુ સુરક્ષા માટે નીચેની બાબતોનું ધ્યાન રાખવું જરૂરી છે:
૧. એન્ડ્રોઇડ યુઝર્સ Google Play Store અને iPhone યુઝર્સ Apple App Store પર જાઓ.
૨. સર્ચ બારમાં ‘Aadhaar App’ ટાઈપ કરો.
૩. ચેતવણી: હંમેશા UIDAI દ્વારા જારી કરવામાં આવેલી અધિકૃત એપ જ ડાઉનલોડ કરો. અજાણી કે ડુપ્લિકેટ એપ ડાઉનલોડ કરવાથી તમારા બેંક એકાઉન્ટ અને પર્સનલ ડેટા જોખમમાં મુકાઈ શકે છે.
નવા એપ પર એકાઉન્ટ કેવી રીતે બનાવશો?
એપ ડાઉનલોડ કર્યા પછી રજીસ્ટ્રેશનની પ્રક્રિયા ખૂબ જ સરળ છે:
-
લોગિન: એપ ખોલો અને તમારો [Aadhaar Number Redacted] દાખલ કરો.
-
વેરિફિકેશન: તમારા આધાર સાથે લિંક હોય તે જ સિમ કાર્ડ પસંદ કરો. તમારા ફોનમાંથી એક SMS જશે, જેના દ્વારા તમારો નંબર વેરિફાય થશે.
-
ફેસ ઓથેન્ટિકેશન: વેરિફિકેશન પછી, એપમાં ‘Face Authentication’ નો વિકલ્પ આવશે. ફોનનો કેમેરો ચાલુ થશે, તમારે ફક્ત તમારી આંખો પટપટાવવાની રહેશે, જેનાથી તમારી ઓળખ પાકી થશે.
-
સુરક્ષા પિન: રજીસ્ટ્રેશનના અંતે ૬ આંકડાનો એક પિન સેટ કરો. આ પિન તમારા લોગિન માટે ખૂબ જરૂરી છે, તેથી તેને યાદ રાખો.
એપની વધારાની સુવિધાઓ
આ નવી એપ માત્ર ઓળખ બતાવવા પૂરતી મર્યાદિત નથી. તે તમને તમારા આધાર કાર્ડ પર સંપૂર્ણ નિયંત્રણ આપે છે. તમે એપ દ્વારા તમારું આધાર કાર્ડ ડાઉનલોડ કરી શકો છો, જેમાં પણ તમે વિકલ્પ પસંદ કરી શકો છો કે તમારે આખું આધાર કાર્ડ ડાઉનલોડ કરવું છે કે ‘માસ્ક્ડ આધાર’ (જેમાં અમુક ડિજિટ છુપાયેલા હોય).
