અમદાવાદના બાપુનગર ખાતે તાજેતરમાં જ દેવ બાદશાહ નામના યુવકે જાહેરમાં તલવારથી કેક કાપી હવામાં ફાયરિંગ કરતો વીડિયો સોશિયલ મીડિયમાં વાયરલ થયો હતો. આ વીડિયોને લઈ બાપુનગર પોલીસે દેવ બાદશાહ અને તેના સાથીઓ સામે ગુનો નોંધી તેઓની ધરપકડ કરી આગળની કાર્યવાહી હાથ ધરી છે.
હાલ સોશિયલ મીડિયા પર ફેમસ થવા માટે લોકો ગમે તે પોસ્ટ શેર કરતા હોય છે. ઘણા લોકો પોતાની લાઈક વધારવા માટે એવી હરકતો કરી બેસ્તા હોય છે જેનાથી તેમને ઘણી એવી મુશ્કેલીઓનો સામેનો પણ કરવો પડે છે. આવો જ એક કિસ્સો પ્રકાશમાં આવ્યો છે. શહેરના બાપુનગર પાસે દેવ બાદશાહ નામના યુવકનો જન્મ દિવસ હોવાથી તેનું સેલિબ્રેશન કરવા માટે તેના મિત્રોએ જાહેર રોડ પર જ કેક કાપવાનો પ્રોગ્રામ રાખ્યો હતો. આ યુવકે જાહેર માર્ગ પર તલવાર વડે દેવ બાદશાહ લખેલી કેક કાપી હતી અને જાહેરમાં જ ફાયરિંગ પણ કર્યું હતું.
જો કે, આ વીડિયો અને ફોટા સત્ય ડે ન્યૂઝ માં સૌથી પહેલા પ્રસારિત થતા જ પોલીસ તંત્ર હરકતમાં જોવા મળ્યું હતુ. બાપુનગર પોલીસે ગણતરીના કલાકોમાં વીડિયોના આધારે અને જાહેરનામાના ભંગનો ગુનો નોંધી 9 આરોપીઓની ધરપકડ કરી લીધી છે.
કહેવાઇ રહ્યું હતું કે બાપુનગર પોલીસ સ્ટેશનમાં ફરજ બજાવતા પી.આઈ.એન.કે.વ્યાસ સિંઘમ જેવી પ્રતિભા ધરાવે છે જે આજે સાર્થક કરી બતાવ્યું અને તાત્કાલિક અસરથી જ બાપુનગર પોલીસ ને દોડતી કરી ને જાહેરમાં તલવાર થી કેક કાપનાર અને જાહેરમાં ફાયરિંગ કરનાર દેવ બાદશાહ સહિત 9 આરોપીઓને ગણતરીના કલાકોમાં જ ઝડપી પાડ્યા હતા.