Electric car sales India: ભારતમાં ઇલેક્ટ્રિક SUVની માંગમાં તેજ વધારો, EV બજારમાં BEV હશે દબદબો
Electric car sales India: આ વર્ષે, ભારતમાં ઇલેક્ટ્રિક વાહનો (EV) ના વેચાણમાં ખાસો વધારો થવાની સંભાવના છે, જેમાં બેટરી ઇલેક્ટ્રિક વાહનો (BEV) મુખ્ય ભૂમિકા ભજવી રહ્યાં છે. ફ્રોસ્ટ એન્ડ સુલિવાનના તાજા અહેવાલ મુજબ, 2025માં ઇલેક્ટ્રિક કારના વેચાણમાં 40% સુધીનો વધારો થશે અને આ વર્ષે BEVનું વેચાણ 1.38 લાખથી વધુ હોવાની અપેક્ષા છે, જ્યારે 2024માં 99,004 ઇલેક્ટ્રિક કાર વેચાઈ હતી.
BEVમાં SUVની માગ સૌથી વધુ, આગામી વર્ષોમાં વધારાની અપેક્ષા
દેશમાં EVમાં SUV કેટેગરીની સૌથી વધુ માંગ નોંધાઈ રહી છે. MG Windsor EV, MG Comet, Tata Nexon EV, Tata Punch EV અને Tata Tiago EV હાલમાં સૌથી વધુ વેચાતા મોડેલો છે અને આ મૉડલ્સ છેલ્લા વર્ષના ટોપ 5માં સામેલ છે. બ્રાન્ડ્સની દૃષ્ટિએ જોવામાં આવે તો, Tata Motors, MG Motors, Mahindra અને BYD ભારતમાં સૌથી વધુ EV વેચાણ ધરાવતી કંપનીઓ તરીકે આગળ છે.
2030 સુધી ભારતમાં EV વેચાણ 7 લાખ સુધી પહોંચી શકે
ફ્રોસ્ટ એન્ડ સુલિવાનના અહેવાલમાં આગાહી કરવામાં આવી છે કે 2030 સુધીમાં ભારતમાં ઇલેક્ટ્રિક કારનું વાર્ષિક વેચાણ 7 લાખની સપાટી પાર કરી શકે છે. આ સમયમાં MG, Tata અને Mahindra જેવી કંપનીઓનું બજારમાં પ્રભુત્વ વધવાની શક્યતા છે. અહેવાલમાં વધુ કહેવામાં આવ્યું છે કે ઇલેક્ટ્રિક કાર વધતા ભારતીય ઇન્ફ્રાસ્ટ્રક્ચરમાં ચાર્જિંગ પોઈન્ટ્સની જરૂરિયાત પણ વધી જશે. અંદાજ પ્રમાણે દર 5 EV માટે એક ચાર્જિંગ પોઈન્ટ જરૂરી રહેશે. હાલ દેશમાં લગભગ 60,000 જાહેર ચાર્જિંગ પોઈન્ટ ઉપલબ્ધ છે.
નવા મોડેલો અને બજાર વિસ્તરણ
આ વર્ષે ભારતમાં ઘણા નવા ઇલેક્ટ્રિક વાહન મોડેલો લોન્ચ થવાના છે, જેમાં વિનફાસ્ટની નવી ઇલેક્ટ્રિક કાર પણ શામેલ છે. પ્લગ-ઇન હાઇબ્રિડ વાહનો (PHEVs)નું વેચાણ હજુ ઓછું છે અને 0.1% જેટલું ફાળો રાખશે એવું અનુમાન છે.
આ નવી બ્રાન્ડ્સ અને મોડેલો સાથે, ભારતીય ગ્રાહકો પાસે ઇલેક્ટ્રિક કારના વધતા વિકલ્પો ઉપલબ્ધ થશે, જે દેશના ઈલેક્ટ્રિક વાહન ઉદ્યોગ માટે નવા યुगની શરૂઆતનું સંકેત છે.
