PSL માં શાનદાર વાપસી: બે સદીએ બદલ્યું નસીબ
ઇન્ટરનેશનલ ક્રિકેટમાં જ્યારે બાબર આઝમ રન બનાવવા માટે સંઘર્ષ કરી રહ્યા હતા, ત્યારે PSL તેમના માટે વરદાન સાબિત થઈ. પેશાવર જાલ્મી તરફથી રમતા બાબરે માત્ર રન જ નથી બનાવ્યા, પરંતુ બે શાનદાર સદી ફટકારીને ટીકાકારોના મોઢા બંધ કરી દીધા છે. જોકે ફાઈનલમાં તે શૂન્ય પર આઉટ થયો હતો, તેમ છતાં તેની ટીમ ચેમ્પિયન બની હતી. આ પ્રદર્શને સાબિત કર્યું છે કે બાબરની અંદર હજુ પણ ઘણું ક્રિકેટ બાકી છે અને તે મોટી ઈનિંગ્સ રમવાની ક્ષમતા ધરાવે છે.
કેપ્ટન્સીથી લઈને ટીમની બહાર થવા સુધીની સફર
એક સમય એવો હતો જ્યારે બાબર આઝમ પાકિસ્તાન ક્રિકેટનો પર્યાય ગણાતા હતા. તેઓ ત્રણેય ફોર્મેટમાં કેપ્ટન હતા અને વિશ્વના સર્વશ્રેષ્ઠ બેટ્સમેનોમાં તેમની ગણતરી થતી હતી. પરંતુ સતત હાર અને ખરાબ ફોર્મને કારણે તેમની પાસેથી એક પછી એક ફોર્મેટની કેપ્ટન્સી છીનવી લેવામાં આવી. પરિસ્થિતિ એટલી હદે વણસી ગઈ હતી કે તેમને ટીમમાંથી પણ બહાર થવું પડ્યું હતું. વર્ષ 2026 ના ટી20 વર્લ્ડ કપમાં પણ તેઓ ટીમનો હિસ્સો નહોતા, જે તેમના ચાહકો માટે મોટો આંચકો હતો.
બાંગ્લાદેશ સામેની ટેસ્ટ સીરીઝ: કારકિર્દીની સૌથી મોટી કસોટી
હવે પાકિસ્તાનની ટીમ બાંગ્લાદેશ સામે બે ટેસ્ટ મેચની સીરીઝ રમવા જઈ રહી છે. આ સીરીઝ બાબર આઝમ માટે ‘કરો અથવા મરો’ જેવી સ્થિતિ સમાન છે. શાન મસૂદની કેપ્ટન્સીમાં બાબર એક વરિષ્ઠ ખેલાડી તરીકે મેદાનમાં ઉતરશે. ડિસેમ્બર 2022 પછી બાબરે ટેસ્ટ ક્રિકેટમાં કોઈ સદી ફટકારી નથી. તેથી, 8 મેથી શરૂ થઈ રહેલી આ ટેસ્ટ મેચમાં તેના બેટમાંથી રન નીકળવા ખૂબ જ જરૂરી છે. જો તે અહીં નિષ્ફળ જશે, તો તેની ટેસ્ટ કારકિર્દી પર પૂર્ણવિરામ મુકાઈ શકે છે.
ત્રણેય ફોર્મેટ રમવાની ‘દિલી ખ્વાહિશ’
બાબર આઝમે તાજેતરમાં એક નિવેદનમાં જણાવ્યું હતું કે, “એક બેટ્સમેન તરીકે મારું ધ્યાન ત્રણેય ફોર્મેટ પર છે. હું માનું છું કે દરેક ખેલાડીએ તમામ ફોર્મેટમાં રમવા માટે સક્ષમ હોવું જોઈએ.” બાબરની આ વાત સ્પષ્ટ કરે છે કે તે માત્ર ટી20 સ્પેશિયાલિસ્ટ બનીને રહેવા માંગતા નથી, પરંતુ તે ટેસ્ટ અને વનડેમાં પણ પાકિસ્તાનનો મુખ્ય સ્તંભ બનવા માંગે છે. તેમની આ જીદ અને મહેનત તેમને ફરીથી ટીમમાં કાયમી સ્થાન અપાવી શકે છે.
શું બાબર આઝમ ફરી પાકિસ્તાની ક્રિકેટના કિંગ બનશે?
પાકિસ્તાની ક્રિકેટમાં અત્યારે પરિવર્તનનો દોર ચાલી રહ્યો છે. ટીમ મેનેજમેન્ટ યુવા ખેલાડીઓને તક આપી રહ્યું છે, પરંતુ બાબર જેવો અનુભવી ખેલાડી ટીમ માટે હંમેશા મહત્વનો હોય છે. બાંગ્લાદેશ સામેનું પ્રદર્શન નક્કી કરશે કે બાબર આગામી સમયમાં પાકિસ્તાન માટે કેટલા મહત્વના સાબિત થશે.
