રેતી-કપચીના વેપારીની ફરિયાદ: કીર્તિ પટેલ વિરુદ્ધ ખંડણી અને બદનામીનો વધુ એક કેસ, લસકાણા પોલીસ સ્ટેશનમાં ગુનો નોંધાયો
વિવાદિત સોશિયલ મીડિયા સ્ટાર કીર્તિ પટેલ સામે વધુ એક ગુનો નોંધાયો હોવાનું અહેવાલ છે. સુરતના લસકાણા પોલીસ સ્ટેશનમાં દાખલ થયેલી આ ફરિયાદ સાથે ગુજરાતમાં તેમના વિરુદ્ધ નોંધાયેલા ગુનાઓની સંખ્યા દસ થઈ હોવાનું જણાવાયું છે. હાલમાં તેઓ પાસા હેઠળ જેલમાં બંધ છે, ત્યારે આ નવી ફરિયાદ તેમને વધુ એક ઝટકો માનવામાં આવી રહી છે.
લસકાણા પોલીસ સ્ટેશનમાં રેતી-કપચીના વેપારી અલ્પેશ ડોંડાએ કીર્તિ પટેલ વિરુદ્ધ ફરિયાદ નોંધાવી હોવાનું પોલીસ સૂત્રો દ્વારા જાણવા મળે છે. ફરિયાદમાં કીર્તિ પટેલ દ્વારા અપશબ્દો બોલવામાં આવ્યા, ધમકી આપવા સાથે સોશિયલ મીડિયા પર બદનામ કરવા માટે પોસ્ટ્સ વાઇરલ કરવાની વાતો ઉલ્લેખાઈ છે.
અહેવાલો મુજબ, કીર્તિ પટેલ પર અગાઉથી પણ ખંડણીખોરી, મારામારી અને સોશિયલ મીડિયા દ્વારા લોકોને બદનામ કરવાના ઘણા ગંભીર આરોપો સાથેની ફરિયાદો નોંધાઈ ચૂકી છે. તાજી ફરિયાદના આધારે લસકાણા પોલીસે તેમની સામે ધમકી અને બદનામ કરવાની કલમો હેઠળ ગુનો દાખલ કરી કાયદેસરની કાર્યવાહી શરૂ કરી છે.
