પતંગોત્સવ દરમિયાન સાવચેતી જ સલામતી, બોટાદ તંત્રની નાગરિકોને ખાસ અપીલ
બોટાદ જિલ્લા આપત્તિ વ્યવસ્થાપન કેન્દ્ર દ્વારા આગામી ઉત્તરાયણ પર્વને ધ્યાનમાં રાખીને નાગરિકોની સુરક્ષા માટે ખાસ માર્ગદર્શિકા બહાર પાડવામાં આવી છે. તહેવારના ઉત્સાહમાં કોઈ અપ્રિય ઘટના ન બને તે માટે તંત્રએ લોકોને સાવચેત રહેવા અપીલ કરી છે. પતંગ ચગાવતી વખતે રાખવામાં આવેલી નાની એવી બેદરકારી પણ ગંભીર અકસ્માત નોતરી શકે છે, તેથી તંત્ર દ્વારા સુરક્ષાના નિયમોનું પાલન કરવું અનિવાર્ય ગણાવ્યું છે.
ધાબા પર પતંગ ચગાવતા સાવધાન
અગાશી કે ધાબા પર પતંગ ચગાવતી વખતે બાળકો પર સતત નજર રાખવી અને પાળીની ઊંચાઈ ચકાસવી ખૂબ જ જરૂરી છે. ગળામાં મફલર કે કપડું વીંટાળી રાખવાથી દોરીના કાપાથી બચી શકાય છે અને અકસ્માત નિવારી શકાય છે. વીજળીના લટકતા તારથી દૂર રહીને પતંગ ચગાવવી અને શક્ય હોય ત્યાં સુધી ખુલ્લા મેદાનનો ઉપયોગ કરવો એ હિતાવહ છે. દરેક નાગરિકે પોતાના ઘરે પ્રાથમિક સારવારની કીટ તૈયાર રાખવા પણ સૂચના અપાઈ છે.
પશુ પક્ષીઓ પ્રત્યે માનવતા જાળવો
આપત્તિ વ્યવસ્થાપન કેન્દ્ર દ્વારા ત્રણ સ એટલે કે સાવચેતી, સમજદારી અને સદભાવનો મંત્ર આપવામાં આવ્યો છે. ખાસ કરીને વહેલી સવારે 6 થી 8 અને સાંજે 5 થી 7 ના સમયગાળામાં પક્ષીઓની અવરજવર વધુ હોવાથી પતંગ ન ચગાવવા વિનંતી કરાઈ છે. ચાઈનીઝ દોરી કે સિન્થેટિક માંજાનો ઉપયોગ ટાળવો જોઈએ કારણ કે તે માનવ અને પક્ષીઓ બંને માટે જીવલેણ સાબિત થાય છે. નકામી દોરીઓનો યોગ્ય નિકાલ કરીને જાગૃત નાગરિકની ફરજ નિભાવવી જોઈએ.
જોખમી સાહસથી દૂર રહેવા સૂચના
વીજળીના તાર કે સબસ્ટેશનમાં ફસાયેલી પતંગો કાઢવા માટે કોઈ પણ પ્રકારનું જોખમ ન લેવા ખાસ તાકીદ કરવામાં આવી છે. ઢાળવાળી છત કે જર્જરિત મકાનો પરથી પતંગ ચગાવવાનું ટાળવું જોઈએ જેથી પતંગ પકડવાની લાલચમાં પડી જવાનો ભય ન રહે. તંત્રએ લોકોને સુરક્ષિત રીતે પતંગોત્સવ માણવા અને કોઈપણ ઇમરજન્સીના કિસ્સામાં હેલ્પલાઇન નંબરનો ઉપયોગ કરવા જણાવ્યું છે.
મુસીબતના સમયે અહીં સંપર્ક કરો
કોઈપણ દુર્ઘટના કે આપત્તિના સમયે મદદ મેળવવા માટે બોટાદ કંટ્રોલ રૂમનો નંબર 02849-271340 જાહેર કરવામાં આવ્યો છે. આ ઉપરાંત ઇમરજન્સી સેવાઓ જેવી કે 108, 1962 અને ટોલ ફ્રી નંબર 1077 પર પણ તાત્કાલિક જાણ કરી શકાશે. જિલ્લા પ્રશાસન દ્વારા નાગરિકોને અપીલ કરવામાં આવી છે કે તેઓ પોતાની અને અન્યની સુરક્ષાનું ધ્યાન રાખીને આ પવિત્ર તહેવારની હર્ષોલ્લાસ સાથે ઉજવણી કરે.
