જાહેર સ્થળોની સલામતી માટે બોટાદ કલેકટરનો મોટો નિર્ણય, CCTV અને ચેકિંગ અનિવાર્ય
બોટાદ જિલ્લામાં જાહેર જનતાની જિંદગી અને માલ-મિલકતની સુરક્ષા સુનિશ્ચિત કરવા માટે અધિક જિલ્લા મેજિસ્ટ્રેટ દ્વારા એક મહત્વપૂર્ણ જાહેરનામું બહાર પાડવામાં આવ્યું છે. આ આદેશ મુજબ બેંકો, ઝવેરાતની દુકાનો, મોલ્સ, થિયેટરો, હોટલો, શાળાઓ, કોલેજો અને મોટા ધાર્મિક સ્થળોએ ઉચ્ચ ગુણવત્તાવાળા CCTV કેમેરા લગાવવા અને સુરક્ષા તપાસની સઘન વ્યવસ્થા કરવી અનિવાર્ય છે.
CCTV કેમેરા ગોઠવવા માટેની ખાસ માર્ગદર્શિકા
જાહેરનામામાં ટેકનિકલ સ્પેસિફિકેશન્સ સાથે કેમેરા લગાવવા અંગે નીચે મુજબની કડક સૂચનાઓ અપાઈ છે:
-
ટેકનિકલ ગુણવત્તા: બિલ્ડિંગના બહારના ભાગે અને તમામ એન્ટ્રી-એક્ઝિટ પોઈન્ટ પર૨-મેગા પિક્સલ (IP) કેમેરા લગાવવા ફરજિયાત છે.
-
કવરેજ એરિયા: બેઝમેન્ટ, ભૂતલ પાર્કિંગ, રિસેપ્શન, લોબી અને જાહેર અવરજવરના તમામ સ્થળોએ ‘ઝીરો બ્લાઈન્ડ સ્પોટ’ કવરેજ મળવું જોઈએ.
-
નાઇટ વિઝન: રાત્રિના સમયે પણ સ્પષ્ટ રેકોર્ડિંગ થાય તે માટે નાઇટ વિઝન અથવા IR હાઇડેફિનેશન કેમેરા અને પૂરતા પ્રકાશની વ્યવસ્થા રાખવી.
-
મોબાઈલ ટાવર: મોબાઈલ ટાવર ધરાવતી બિલ્ડિંગના ટેરેસ પર પણ કેમેરા લગાવવા જરૂરી છે.
મોલ્સ અને શૈક્ષણિક સંસ્થાઓ માટે વિશેષ નિયમો
મોટા કોમર્શિયલ સેન્ટરો અને સ્કૂલ-કોલેજો માટે વધારાની સુરક્ષા વ્યવસ્થાના આદેશ અપાયા છે:
૧. વાહન અને વ્યક્તિગત ચેકિંગ: મોલમાં પ્રવેશતા વાહનોની સાથે તેમાં બેઠેલી વ્યક્તિઓનું પણ સંપૂર્ણ ચેકિંગ કરવું.
૨. ખાનગી સિક્યુરિટી: મોલ માલિકોએ પોતાના ખર્ચે તાલીમબદ્ધ સિક્યુરિટી ગાર્ડ રાખવા અને જરૂર જણાયે સ્નિફર ડોગ દ્વારા તપાસ કરાવી.
૩. શૈક્ષણિક સંસ્થાઓ: જ્યાં મોટી સંખ્યામાં વિદ્યાર્થીનીઓ અભ્યાસ કરતી હોય તેવી સંસ્થાઓએ એન્ટ્રી ગેટ પર રોડને આવરી લે તેવા કેમેરા લગાવવાના રહેશે.
અમલીકરણ અને સત્તાવાર તપાસ
આ જાહેરનામું તા.૧૮-૦૧-૨૦૨૬ થી ૧૮-૦૩-૨૦૨૬ (૬૦ દિવસ) સુધી અમલમાં રહેશે. જ્યારે પણ અધિકૃત અધિકારી ચેકિંગ માટે આવે ત્યારે DVR અને મોનિટરનું આઉટપુટ બતાવવા માટે જાણકાર ટેકનિશિયન હાજર રાખવો પડશે. આ આદેશનું ઉલ્લંઘન કરનાર સંચાલકો સામે ભારતીય ન્યાય સંહિતા મુજબ કડક શિક્ષાત્મક પગલાં લેવામાં આવશે.
