‘આ ઝખ્મ રુઝાતા સમય લાગશે’, ફિફા વર્લ્ડ કપ ફાઇનલની હાર પર તોડી મૌન
વિશ્વના શ્રેષ્ઠ ફૂટબોલ ખેલાડીઓમાં ગણાતા આર્જેન્ટિનાના સુપરસ્ટાર લિયોનેલ મેસ્સીએ ફિફા વર્લ્ડ કપ ૨૦૨૬ ની ફાઇનલમાં સ્પેન સામે મળેલી હૃદયસ્પર્શી હાર બાદ આખરે પોતાનું મૌન તોડ્યું છે. સમગ્ર દેશ અને વિશ્વભરના ચાહકો માટે આ હાર અત્યંત આઘાતજનક હતી. ફાઇનલ મેચ પૂરી થયા બાદ ભારે નિરાશા વચ્ચે મેસ્સીએ સોશિયલ મીડિયા પ્લેટફોર્મ ઇન્સ્ટાગ્રામ પર એક ખૂબ જ ભાવનાત્મક પોસ્ટ શેર કરી છે. આ પોસ્ટમાં તેમણે પોતાની ટીમના ખેલાડીઓ, સપોર્ટ સ્ટાફ અને સમગ્ર ટૂર્નામેન્ટ દરમિયાન આર્જેન્ટિનાને સમર્થન આપનારા તમામ ચાહકોનો હૃદયપૂર્વક આભાર માન્યો છે.
હારનું દુઃખ ભારે છે, પણ સુંદર યાદો હંમેશાં સાથે રહેશે: મેસ્સી
પોતાની ભાવુક ઇન્સ્ટાગ્રામ પોસ્ટમાં લિયોનેલ મેસ્સીએ સ્વીકાર્યું હતું કે ફાઇનલ મેચ હારવાનો દુખાવાનો અહેસાસ ખૂબ જ ઊંડો છે. તેમણે લખ્યું, “હાલમાં આ હારનો દુખાવો ખૂબ જ વધારે છે અને આ ઘાને રૂઝાતા ઘણો સમય લાગશે. પરંતુ આ મુશ્કેલ સમયમાં પણ મેં તે સુંદર યાદોને યાદ રાખવાનું નક્કી કર્યું છે ખાસ કરીને તે તમામ મેચો, જેમાં આપણી ટીમે પરિસ્થિતિ બદલવા માટે અને દેશ માટે મેદાન પર પોતાનું સર્વસ્વ આપી દીધું હતું.”
મેસ્સીએ આગળ ઉમેર્યું કે આવી ક્ષણો હંમેશા તેમના હૃદયમાં રહેશે. તેમણે સમગ્ર રાષ્ટ્રના સમર્થન બદલ કૃતજ્ઞતા વ્યક્ત કરતા કહ્યું કે દેશવાસીઓના પ્રેમ અને ટીમની અથાક મહેનતને કારણે જ આર્જેન્ટિના વિશ્વની શ્રેષ્ઠ ટીમોમાં પોતાનું સ્થાન ફરીથી મજબૂત કરી શક્યું છે. જોકે, ફૂટબોલ ચાહકો જે વાતની આતુરતાથી રાહ જોઈ રહ્યા હતા, તે નિવૃત્તિ અંગે મેસ્સીએ આ પોસ્ટમાં કોઈ જ સંકેત કે સ્પષ્ટતા કરી નથી.
વિજેતા સ્પેનને આપ્યા અભિનંદન; સતત બે ફાઇનલ રમવાનો વ્યક્ત કર્યો ગર્વ
અંત્યત રમતદિલી દર્શાવતા લિયોનેલ મેસ્સીએ વર્લ્ડ ચેમ્પિયન બનવા બદલ સ્પેનની ટીમને દિલથી અભિનંદન પાઠવ્યા હતા. તેમણે લખ્યું કે, “આપણે જે પ્રાપ્ત કર્યું છે તેની પૂર્ણ પ્રશંસા અત્યારે આ દુઃખની ઘડીમાં કરવી કદાચ મુશ્કેલ છે, પરંતુ આપણું આ ગ્રુપ સતત બે ફિફા વર્લ્ડ કપની ફાઇનલમાં પહોંચવામાં સફળ રહ્યું છે તે કોઈ નાની વાત નથી.”
મેસ્સીએ વિશ્વભરમાંથી મળેલા અભિનંદન અને સાંત્વનાના સંદેશાઓ માટે આભાર માનતા જણાવ્યું કે, આ વર્લ્ડ કપે સમગ્ર દેશને ફરી એકવાર એકજૂથ કરી દીધો છે. આજે દરેક આર્જેન્ટિનિયન દેશવાસી એક થઈને ગર્વ અનુભવી રહ્યો છે. નોંધનીય છે કે, આ વર્લ્ડ કપ ટૂર્નામેન્ટમાં ૩૯ વર્ષીય મેસ્સીનું પ્રદર્શન અદ્ભુત રહ્યું હતું. તેમણે આખી ટૂર્નામેન્ટમાં કુલ ૮ ગોલ ફટકાર્યા હતા અને સૌથી વધુ ગોલ કરનારા ખેલાડીઓની યાદીમાં બીજા ક્રમે રહ્યા હતા.
૧૬ વર્ષ પછી સ્પેન બન્યું વિશ્વ ચેમ્પિયન
અમેરિકાના ન્યૂ જર્સી ખાતે રમાયેલી ફિફા વર્લ્ડ કપ ૨૦૨૬ ની ફાઇનલ મેચમાં ૧૬ વર્ષની લાંબી રાહ જોયા બાદ સ્પેને ફરી એકવાર વર્લ્ડ કપની ટ્રોફી પોતાના નામે કરી છે. ૨૦૨૨ ના ચેમ્પિયન આર્જેન્ટિના અને સ્પેન વચ્ચે રમાયેલી આ મેચ અત્યંત રોમાંચક રહી હતી.
મેચની નિર્ધારિત ૯૦ મિનિટ સુધી બંનેમાંથી એકપણ ટીમ ગોલ કરી શકી નહોતી. ત્યારબાદ રમત એક્સ્ટ્રા ટાઇમમાં ગઈ હતી, જ્યાં સ્પેનના સ્ટાર ફોરવર્ડ ખેલાડી ફેરન ટોરેસે શાનદાર ગોલ કરીને સ્પેનને ૧-૦ થી વિજય અપાવ્યો હતો અને પોતાની ટીમને ફરી એકવાર વિશ્વ ચેમ્પિયન બનાવી હતી. હાર છતાં, મેસ્સીના આ સંદેશાએ આર્જેન્ટિનાના લાખો પ્રશંસકોના દિલ જીતી લીધા છે.
