Apparel Sector
કાપડ મંત્રીએ ઉદ્યોગને વૈશ્વિક બ્રાન્ડના સપ્લાયર બનવાને બદલે પોતાની બ્રાન્ડ સ્થાપિત કરવાનું સૂચન કર્યું હતું. તેમણે ગ્રીન ટેક્સટાઇલ અને રિસાઇકલિંગ પર ધ્યાન કેન્દ્રિત કરવાની સલાહ પણ આપી હતી.
ટેક્સટાઇલ મંત્રી ગિરિરાજ સિંહે મંગળવારે જણાવ્યું હતું કે સરકાર ટેક્સટાઇલ ઉદ્યોગ માટે મંજૂર રૂ. 10,000 કરોડથી વધુની ‘પ્રોડક્શન લિન્ક્ડ ઇન્સેન્ટિવ’ (PLI) સ્કીમને એપેરલ સેક્ટર સુધી લંબાવવાનું પણ વિચારી રહી છે. અહીં ‘ઈન્ડિયા ઈન્ટરનેશનલ ગાર્મેન્ટ ફેર’ (IIGF)ને સંબોધતા સિંહે જણાવ્યું હતું કે કાપડની નિકાસ વધારવાની અપાર તકો છે અને ઉદ્યોગે આગામી વર્ષોમાં US$ 50 બિલિયનની નિકાસ કરવાનું લક્ષ્ય રાખવું જોઈએ.
PLI યોજનાને 2021માં મંજૂરી આપવામાં આવી હતી
સરકારે વર્ષ 2021માં મેન-મેઇડ ફાઇબર (MMF) એપેરલ, MMF ફેબ્રિક્સ અને ટેક્નિકલ ટેક્સટાઇલ પ્રોડક્ટ્સનું સ્થાનિક ઉત્પાદન વધારવા માટે પાંચ વર્ષના સમયગાળામાં રૂ. 10,683 કરોડના મંજૂર ખર્ચ સાથે ટેક્સટાઇલ સેક્ટર માટે PLI સ્કીમને મંજૂરી આપી હતી. સિંહે કહ્યું, “અમે તમારા (ગાર્મેન્ટ) સેક્ટરને પણ આ યોજનાના દાયરામાં લાવવાનું વિચારી રહ્યા છીએ.”
કાપડ ઉદ્યોગનું બજાર વધારવાનો લક્ષ્યાંક
તેમણે કહ્યું કે ભારતીય કાપડ ઉદ્યોગનું બજાર લગભગ 165 અબજ ડોલરનું છે અને તેને 350 અબજ ડોલર સુધી લઈ જવાનું છે. તેમણે કહ્યું કે મંત્રાલય આ ક્ષેત્રમાં ચીનને પછાડવા માટે રોડમેપ તૈયાર કરી રહ્યું છે. મંત્રીએ સ્થાનિક ઉત્પાદનને પ્રોત્સાહન આપવા માટે ઉદ્યોગને ‘હબ એન્ડ સ્પોક’ મોડલ અપનાવવાનું પણ સૂચન કર્યું હતું. તેમણે કહ્યું, “હું ઉદ્યોગની મોટી કંપનીઓને અપીલ કરું છું કે તેઓ ભારતમાં નાની કંપનીઓ સાથે જોડાણ કરે. મંત્રાલય મોટી કંપનીઓ સાથે તેમની સમસ્યાઓને સમજવા માટે બેઠક કરશે. ગયા વર્ષે, ઈ-કોમર્સ દ્વારા આંતરરાષ્ટ્રીય વેપાર લગભગ $800 બિલિયન હતો અને તે 2030 સુધીમાં $2,000 બિલિયન સુધી પહોંચવાની અપેક્ષા છે.
પોતાની બ્રાન્ડ સ્થાપિત કરવા પર ભાર
આ સાથે ટેક્સટાઈલ મંત્રીએ ઉદ્યોગને વૈશ્વિક બ્રાન્ડના સપ્લાયર બનવાને બદલે પોતાની બ્રાન્ડ સ્થાપિત કરવા સૂચન કર્યું હતું. તેમણે ગ્રીન ટેક્સટાઇલ અને રિસાઇકલિંગ પર ધ્યાન કેન્દ્રિત કરવાની સલાહ પણ આપી હતી. ટેક્સટાઇલ મંત્રાલય ‘ઇન્ટિગ્રેટેડ ટેક્સટાઇલ પાર્ક’ (SITP) સ્કીમને ફરીથી રજૂ કરવા પર પણ વિચાર કરી રહ્યું છે. આ યોજનાનો ઉદ્દેશ્ય આંતરરાષ્ટ્રીય માપદંડો અનુસાર નવા ટેક્સટાઈલ પાર્કની સ્થાપના કરવાનો છે. અત્યાર સુધીમાં 54 ટેક્સટાઇલ પાર્કને મંજૂરી આપવામાં આવી છે.
