Ayushman Bharat PM-JAY: ESI-આયુષ્માન ભારત યોજનાને એકસાથે લાવવાની મંજૂરી, આરોગ્ય સંભાળની પહોંચ વધારવાની તૈયારીઓ
Ayushman Bharat PM-JAY: કર્મચારી રાજ્ય વીમા નિગમની મેડિકલ બેનિફિટ્સ કાઉન્સિલે શુક્રવારે કર્મચારી રાજ્ય વીમા (ESI) યોજનાને આયુષ્માન ભારત પીએમ-જન આરોગ્ય યોજના (JAY) સાથે મર્જ કરવાની મંજૂરી આપી હતી જેથી લાભાર્થીઓ માટે આરોગ્ય સંભાળની પહોંચમાં વધારો થાય. શ્રમ મંત્રાલયે એક નિવેદનમાં જણાવ્યું હતું કે, બે યોજનાઓને એકીકૃત કરવાનો નિર્ણય કર્મચારી રાજ્ય વીમા નિગમ (ESIC)ના મુખ્ય મથક ખાતે યોજાયેલી મેડિકલ બેનિફિટ્સ કાઉન્સિલની 86મી બેઠકમાં લેવામાં આવ્યો હતો.
12 કરોડથી વધુ ગરીબ પરિવારોને ફાયદો થયો
આ બેઠકની અધ્યક્ષતા ESICના મહાનિર્દેશક (DG) અશોક કુમાર સિંહે કરી હતી. આયુષ્માન ભારત PM-JAY એ વિશ્વની સૌથી મોટી આરોગ્ય વીમા યોજના છે. તેનો ધ્યેય 12 કરોડથી વધુ ગરીબ પરિવારો (લગભગ 55 કરોડ લાભાર્થીઓ)ને પ્રતિ વર્ષ 5 લાખ રૂપિયાનો સ્વાસ્થ્ય વીમો આપવાનો છે. કાઉન્સિલે રાજ્યો માટે કોમન સપોર્ટ મિશન (CSM)ના અમલીકરણને પણ મંજૂરી આપી હતી. CSM નો ઉદ્દેશ્ય વીમાધારક વ્યક્તિ કેન્દ્રિત અભિગમ પર ધ્યાન કેન્દ્રિત કરીને રાજ્યોમાં ESI ની તબીબી સેવા વિતરણ પ્રણાલીને સુધારવા અને મજબૂત કરવાનો છે.
જાગૃતિ શિબિર શરૂ કરવા મંજૂરી
વધુમાં, કાઉન્સિલે લાભાર્થીઓ માટે વાર્ષિક પ્રિવેન્ટિવ હેલ્થ ચેકઅપ અને જાગૃતિ શિબિરો શરૂ કરવાની મંજૂરી આપી હતી જેમાં જીવનશૈલી વિકૃતિઓના વહેલા નિદાન અને વીમેદાર વ્યક્તિઓ/મહિલાઓ/ટ્રાન્સજેન્ડર્સમાં પોષણની ખામીઓ શોધવા પર ધ્યાન કેન્દ્રિત કરવામાં આવ્યું હતું. સરકાર 10 નવી ESIC મેડિકલ કોલેજોની સ્થાપના કરશે અને ESI કોર્પોરેશનના સભ્યો માટે બેરોજગારી ભથ્થું યોજના જૂન, 2026 સુધી લંબાવશે. ESICની માળખાકીય સુવિધાઓ અને તબીબી સુવિધાઓને વધુ મજબૂત કરવા માટે ઘણા મહત્વપૂર્ણ નિર્ણયો લેવામાં આવ્યા છે.
જેમ જેમ સરકાર 70 વર્ષ અને તેથી વધુ વયના તમામ લોકો માટે આરોગ્ય કવરેજ શરૂ કરવાની તૈયારી કરી રહી છે, ત્યારે આયુષ્માન ભારત પ્રધાન મંત્રી જન આરોગ્ય યોજનાની અમલીકરણ એજન્સી, રાષ્ટ્રીય આરોગ્ય સત્તાધિકારી, વૃદ્ધો માટે વધુ આરોગ્ય પેકેજો ઉમેરવાની જરૂરિયાતનું મૂલ્યાંકન કરી રહી છે. સત્તાવાર સૂત્રોએ જણાવ્યું હતું કે વિસ્તૃત યોજના આ મહિનાના અંત સુધીમાં શરૂ થવાની સંભાવના છે. તેનાથી લગભગ 4.5 કરોડ પરિવારોના છ કરોડ નાગરિકોને ફાયદો થશે.
