CBDTની નવી વ્યૂહરચના: ટોચના કરદાતાઓ પર કડક દેખરેખ, નકલી મુક્તિઓ પર કડક કાર્યવાહી
CBDT સેન્ટ્રલ બોર્ડ ઓફ ડાયરેક્ટ ટેક્સીસ (CBDT) એ ચાલુ નાણાકીય વર્ષ 2025-26 માટે ડાયરેક્ટ ટેક્સ કલેક્શનને મજબૂત બનાવવાના ઉદ્દેશ્યથી એડવાન્સ ટેક્સ ચૂકવતા ટોચના કરદાતાઓ પર કડક દેખરેખ રાખવા સૂચનાઓ જારી કરી છે. તેનો હેતુ નકલી મુક્તિ અને કપાતના દાવાઓને ઓળખીને કરચોરી અટકાવવાનો છે.
સૂત્રોના જણાવ્યા અનુસાર, CBDT એ તાજેતરમાં સેન્ટ્રલ એક્શન પ્લાન (CAP) બહાર પાડ્યો છે, જેમાં કર વિભાગ માટે મુખ્ય કામગીરી ક્ષેત્રો નક્કી કરવામાં આવ્યા છે. સરકારે આ વર્ષે પ્રત્યક્ષ કરમાંથી રૂ. ૨૫.૨૦ લાખ કરોડ એકત્ર કરવાનો લક્ષ્યાંક રાખ્યો છે, જેમાં કોર્પોરેટ કરમાંથી રૂ. ૧૦.૮૨ લાખ કરોડ, વ્યક્તિગત અને અન્ય બિન-કોર્પોરેટ કરમાંથી રૂ. ૧૩.૬૦ લાખ કરોડ અને સિક્યોરિટીઝ ટ્રાન્ઝેક્શન ટેક્સ (STT)માંથી રૂ. ૭૮,૦૦૦ કરોડનો સમાવેશ થાય છે.
ગયા નાણાકીય વર્ષ 2024-25માં કુલ પ્રત્યક્ષ કર વસૂલાત 13.57% વધીને રૂ. 22.26 લાખ કરોડ થઈ, જે રૂ. 22.37 લાખ કરોડના સુધારેલા લક્ષ્યની નજીક છે. આ વખતે વિભાગનું ધ્યાન ખાસ કરીને એડવાન્સ ટેક્સ ભરતા મોટા કરદાતાઓની તપાસ પર રહેશે જેથી કર પ્રણાલીમાં પારદર્શિતા લાવી શકાય.
