Gautam adani: વીજળી સંકટ પછી બાંગ્લાદેશ જાગ્યું, અદાણી ગ્રુપને મોટી રકમ પરત કરી
Gautam adani: બાંગ્લાદેશે અદાણી ગ્રુપ સાથેના વીજ પુરવઠા કરાર હેઠળ બાકી ચૂકવણી કરવાનું શરૂ કરી દીધું છે. જૂન 2025 માં, બાંગ્લાદેશે અદાણી પાવરને $384 મિલિયન (લગભગ રૂ. 3,282.64 કરોડ) ચૂકવ્યા છે. સૂત્રોના જણાવ્યા અનુસાર, બાંગ્લાદેશે જૂનમાં કુલ $437 મિલિયન ચૂકવવાના હતા, જેમાંથી મોટાભાગની રકમ 27 જૂન સુધીમાં ચૂકવી દેવામાં આવી હતી. આ ચુકવણીથી માર્ચ 2025 સુધી સ્વીકૃત દાવાઓનું સમાધાન થયું છે. જોકે, અદાણી ગ્રુપનો કુલ દાવો હજુ પણ લગભગ $500 મિલિયનના સ્તરે છે.
બાંગ્લાદેશ છેલ્લા કેટલાક સમયથી ગંભીર આર્થિક કટોકટીમાંથી પસાર થઈ રહ્યું છે. 2017 માં વીજ પુરવઠા કરાર હેઠળ તેની ચુકવણીની જવાબદારી રહે છે, પરંતુ રશિયા-યુક્રેન યુદ્ધ અને દેશની અંદર રાજકીય અસ્થિરતાને કારણે તેનો આયાત ખર્ચ ભારે વધી ગયો. આનાથી અદાણી પાવર પાસેથી ખરીદેલી વીજળીની ચુકવણી પર અસર પડી. ગયા વર્ષે, જ્યારે બાકી રકમ $846 મિલિયન સુધી પહોંચી, ત્યારે અદાણી પાવરની ઝારખંડ સ્થિત પેટાકંપની (અદાણી પાવર ઝારખંડ લિમિટેડ – APJL) એ વીજ પુરવઠો અડધો કરી દીધો.
ત્યારબાદ અદાણી ગ્રુપે બાંગ્લાદેશના ઉર્જા સચિવને પત્ર લખીને પીડીબી (બાંગ્લાદેશ પાવર ડેવલપમેન્ટ બોર્ડ) પાસેથી તાત્કાલિક બાકી રકમ ચૂકવવાની માંગ કરી હતી અને ચેતવણી આપી હતી કે જો ચુકવણી ન કરવામાં આવે તો કરાર હેઠળ તેમને વીજ પુરવઠો બંધ કરવાની ફરજ પડી શકે છે. ઓક્ટોબર 2024 ના અંતમાં ચુકવણી ન કરવામાં આવતાં, પુરવઠો કાપી નાખવામાં આવ્યો હતો.
જોકે, હવે બાંગ્લાદેશ દ્વારા નવી ચુકવણી કરવામાં આવતાં પરિસ્થિતિમાં સુધારો થયો છે. અદાણી ગ્રુપે ફરીથી વીજ પુરવઠો સંપૂર્ણપણે પુનઃસ્થાપિત કર્યો છે. અહેવાલ મુજબ, અત્યાર સુધીમાં બાંગ્લાદેશે કુલ 2 બિલિયન ડોલરમાંથી લગભગ 1.5 બિલિયન ડોલર ચૂકવી દીધા છે.
આ વિકાસ બંને દેશોના ઉર્જા સંબંધોમાં વિશ્વાસ પુનઃસ્થાપિત થવાનો સંકેત આપે છે અને તેને ભવિષ્ય માટે સકારાત્મક સંકેત માનવામાં આવી રહ્યો છે.
