Real estate: 7 મુખ્ય શહેરોમાં ઘરોના વેચાણમાં ભારે ઘટાડો થઈ શકે છે, યુનિટની સંખ્યામાં 28% ઘટાડો થવાની ધારણા છે
Real estate ઊંચા ભાવ અને વૈશ્વિક અનિશ્ચિતતાઓને કારણે જાન્યુઆરી-માર્ચ સમયગાળામાં સાત મુખ્ય શહેરોમાં ઘરોનું વેચાણ 28 ટકા ઘટીને 93,280 યુનિટ થવાની ધારણા છે. રિયલ એસ્ટેટ કન્સલ્ટન્ટ એનારોકે તેના તાજેતરના અંદાજમાં આ વાત કહી છે. એનારોકે જણાવ્યું હતું કે, 2025 ના પ્રથમ ત્રિમાસિક ગાળામાં રહેણાંક મકાનોના ભાવ આસમાને પહોંચવા અને ભૂ-રાજકીય પ્રતિકૂળતાઓને કારણે ભારતીય હાઉસિંગ માર્કેટમાં રિકવરી ધીમી પડી ગઈ છે. ડેટા અનુસાર, જાન્યુઆરી-માર્ચ 2025 માં કુલ ઘર વેચાણ 93,280 યુનિટ હોવાનો અંદાજ છે, જે એક વર્ષ અગાઉના સમાન સમયગાળામાં 1,30,170 યુનિટથી 28 ટકા ઓછો છે.
સાત મુખ્ય શહેરોમાંથી, દિલ્હી-એનસીઆરમાં વેચાણ 15,650 યુનિટથી 20 ટકા ઘટીને 12,520 યુનિટ થવાની ધારણા છે. મુંબઈ મેટ્રોપોલિટન રિજન (MMR) માં રહેણાંક મિલકતોનું વેચાણ 42,920 યુનિટથી 26 ટકા ઘટીને 31,610 યુનિટ થવાની ધારણા છે. બેંગલુરુમાં મકાનોનું વેચાણ ૧૭,૭૯૦ યુનિટથી ૧૬ ટકા ઘટીને ૧૫,૦૦૦ યુનિટ થવાની ધારણા છે. પુણેમાં વેચાણ 22,990 યુનિટથી 30 ટકા ઘટીને 16,100 યુનિટ થઈ શકે છે.
હૈદરાબાદમાં મકાનોનું વેચાણ ૧૯,૬૬૦ યુનિટથી ૪૯ ટકા ઘટીને ૧૦,૧૦૦ યુનિટ થવાની ધારણા છે. ચેન્નાઈમાં વેચાણ 5,510 યુનિટથી 26 ટકા ઘટીને 4,050 યુનિટ થવાની ધારણા છે. કોલકાતામાં રહેણાંક મિલકતનું વેચાણ આ વર્ષે જાન્યુઆરી-માર્ચમાં ૩૧ ટકા ઘટીને ૩,૯૦૦ યુનિટ થવાનો અંદાજ છે, જે ગયા વર્ષના સમાન સમયગાળામાં ૫,૬૫૦ યુનિટ હતું.
રહેણાંક બજારની પ્રવૃત્તિ પર અસર
એનારોકના ચેરમેન અનુજ પુરીએ જણાવ્યું હતું કે ભારતનો એકંદર આર્થિક દૃષ્ટિકોણ સકારાત્મક રહે છે, GDP વૃદ્ધિ વૈશ્વિક સ્તરે સૌથી વધુ રહેવાની અપેક્ષા છે અને ફુગાવો નિયંત્રણમાં છે. જોકે, મકાનોના વધતા ભાવ અને ચાલુ ભૂ-રાજકીય તણાવ અને નબળા વૈશ્વિક અર્થતંત્ર જેવા વૈશ્વિક પડકારોએ ભારતના રહેણાંક બજારની પ્રવૃત્તિને અસર કરી છે. પુરીએ જણાવ્યું હતું કે આ પરિબળો 2025 ના પ્રથમ ત્રિમાસિક ગાળામાં હાઉસિંગ માર્કેટને પણ અસર કરશે.
બજારમાં સુધારાના સંકેત
આ અહેવાલ પર ટિપ્પણી કરતા, બાંધકામ કંપની BCD ગ્રુપના CMD અંગદ બેદીએ જણાવ્યું હતું કે હાઉસિંગ યુનિટ્સના વેચાણમાં ઘટાડો બજારમાં સુધારાનો સંકેત છે. પ્રોપર્ટી ફર્સ્ટના સ્થાપક અને સીઈઓ ભાવેશ કોઠારીએ જણાવ્યું હતું કે રહેણાંક રિયલ એસ્ટેટ સેગમેન્ટમાં માંગ ચક્રીય છે, પરંતુ ઉમેર્યું હતું કે સંભવિત ગ્રાહકો તરફથી પૂછપરછ મજબૂત રહે છે. તાજેતરમાં, રિયલ એસ્ટેટ ડેટા એનાલિટિક્સ ફર્મ પ્રોપઇક્વિટીએ પણ જણાવ્યું હતું કે જાન્યુઆરી-માર્ચ દરમિયાન નવ મુખ્ય શહેરોમાં મકાનોનું વેચાણ વાર્ષિક ધોરણે 23 ટકા ઘટીને લગભગ 1.06 લાખ યુનિટ થઈ શકે છે.
