ભારતમાં પ્રથમ ટ્વિન-ટ્યુબ અંડરવોટર ટનલ: કલાકોની મુસાફરી મિનિટોમાં, મોદી સરકારે આપી મંજૂરી
દેશની ઈન્ફ્રાસ્ટ્રક્ચર ગાથામાં એક નવું પ્રકરણ જોડાવા જઈ રહ્યું છે. મોદી કેબિનેટે આસામમાં બ્રહ્મપુત્રા નદીની નીચે ગોહપુર અને નુમાલીગઢ વચ્ચે ટ્વિન-ટ્યુબ અંડરવોટર ટનલ બનાવવાની મંજૂરી આપી દીધી છે. દેશમાં આ પ્રકારની આ પ્રથમ ટનલ હશે, જેમાં રોડ અને રેલ બંને માટે અલગ-અલગ ટ્યુબ બનાવવામાં આવશે.
મુસાફરી હવે મિનિટોમાં
આ ટનલની લંબાઈ અંદાજે 15.8 કિમી હશે. આ ટનલ બન્યા પછી ગોહપુર અને નુમાલીગઢ વચ્ચેનું 240 કિમીનું અંતર ઘટીને માત્ર 34 કિમી રહી જશે. જેના કારણે મુસાફરીનો સમય સાડા છ કલાકથી ઘટીને માત્ર 34 મિનિટ થઈ જશે.
ટનલને બે લેન વાળી, યુનિડાયરેક્શનલ સુરંગો તરીકે ડિઝાઇન કરવામાં આવશે, જે બ્રહ્મપુત્રા નદીના સૌથી ઊંડા ભાગથી 32 મીટર નીચે બનાવવામાં આવશે.
ટનલની ડિઝાઇન અને સુરક્ષા
નિષ્ણાતોના જણાવ્યા અનુસાર, ટનલમાં એવી ડિઝાઇન હશે કે જ્યારે ટ્રેનો ચાલશે ત્યારે રોડ વાહનો ત્યાં ચાલી શકશે નહીં. તેની વિશેષતાઓ નીચે મુજબ છે:
- સિંગલ રેલ ટ્રેક વાળી ટ્યુબ
- બેલિસ્ટિક ટ્રેક અને ઇલેક્ટ્રિક ટ્રેન સંચાલન
- બે અલગ ટ્યુબ: એક રસ્તા માટે, એક રેલ માટે
- ઈમરજન્સી સ્થિતિમાં સેના અને સંરક્ષણ સામગ્રીની ઝડપી અવરજવર શક્ય
આ સમગ્ર પ્રોજેક્ટમાં એપ્રોચ રોડ અને રેલવે ટ્રેક સહિત કુલ 33.7 કિમીનું નિર્માણ સામેલ હશે. પ્રોજેક્ટનો અંદાજિત ખર્ચ 18,600 કરોડ રૂપિયા છે, જે માર્ગ પરિવહન, રેલવે અને સંરક્ષણ મંત્રાલય સંયુક્ત રીતે ઉઠાવશે.
ઉત્તર-પૂર્વ (નોર્થ ઈસ્ટ) માટે મોટો લાભ
આ પ્રોજેક્ટ નોર્થ ઈસ્ટની કનેક્ટિવિટી સુધારવામાં મહત્વની ભૂમિકા ભજવશે. અરુણાચલ પ્રદેશ, મણિપુર અને અન્ય રાજ્યોને નોર્થ ઈસ્ટના જિલ્લાઓ સાથે જોડવામાં આ ટનલ મદદરૂપ સાબિત થશે.
ગયા વર્ષે નાણા મંત્રાલયે માર્ગ પરિવહન અને સંરક્ષણ મંત્રાલયની યોજના હેઠળ 14,900 કરોડ રૂપિયાના ફંડિંગને લીલી ઝંડી આપી હતી. હવે મોદી કેબિનેટની મંજૂરી બાદ આગામી 5 વર્ષમાં કામ પૂર્ણ થવાની અપેક્ષા છે.
બદલાવની દિશા
આ અંડરવોટર ટનલથી માત્ર સમય અને અંતરની બચત જ નહીં થાય, પરંતુ આ વિસ્તારમાં આર્થિક પ્રવૃત્તિઓ અને વેપારમાં પણ વધારો થશે. દેશની પ્રથમ ટ્વિન-ટ્યુબ અંડરવોટર ટનલ નોર્થ ઈસ્ટને એક નવી ઈન્ફ્રાસ્ટ્રક્ચર ભેટ આપશે, જે પ્રાદેશિક વિકાસ અને સુરક્ષા બંનેમાં સીમાચિહ્નરૂપ સાબિત થશે.
