સુરત, નવસારી, અમદાવાદથી લઈને સૌરાષ્ટ્ર સુધી મેઘરાજાની તોફાની બેટિંગ: જાણો હવામાન વિભાગની નવી આગાહી
દેશભરમાં ચોમાસાનો પ્રકોપ અને સક્રિયતા ચરમસીમાએ પહોંચી ગઈ છે. ભારતીય હવામાન વિભાગ (IMD) એ આજે પૂર્વ, ઉત્તર અને પશ્ચિમ ભારતના ૧૦થી વધુ રાજ્યોમાં ભારેથી અતિભારે વરસાદ, તીવ્ર વાવાઝોડું અને આકાશી વીજળી પડવાની ગંભીર ચેતવણી જારી કરી છે. હવામાન ક્ષેત્રના નિષ્ણાતોના મતે, આગામી ૧૪ કલાક દેશના અનેક રાજ્યો માટે મુશ્કેલીભર્યા સાબિત થઈ શકે છે.
અલગ-અલગ વિસ્તારોમાં ૭૦ થી ૮૦ કિલોમીટર પ્રતિ કલાકની ઝડપે ભારે પવન ફૂંકાવાની શક્યતા છે, જેના કારણે વૃક્ષો ધરાશાયી થવા, વીજ પુરવઠો ખોરવાઈ જવો અને નીચાણવાળા વિસ્તારોમાં પાણી ભરાઈ જવાનું જોખમ રહેલું છે. દરિયાકિનારે તેમજ નદી કિનારે વસતા લોકોને, પ્રવાસીઓને અને ખેડૂતોને ખાસ સતર્ક રહેવાની સલાહ આપવામાં આવી છે.
આજે ગુજરાતમાં ક્યાં-ક્યાં તૂટી પડશે વરસાદ?
ગુજરાતમાં ચોમાસુ સંપૂર્ણપણે જામ્યું છે. આજે રાજ્યના અનેક જિલ્લાઓમાં મેઘમહેર થવાની આગાહી કરવામાં આવી છે. દક્ષિણ ગુજરાતના નવસારી, સુરત, તાપી, વલસાડ અને ડાંગ જિલ્લામાં ભારે વરસાદ માટે એલર્ટ જાહેર કરાયું છે.
આ ઉપરાંત, સૌરાષ્ટ્રના જૂનાગઢ, અમરેલી અને ભાવનગર જિલ્લા તેમજ મધ્ય ગુજરાતમાં અમદાવાદ અને બાવળા સહિતના વિસ્તારોમાં વાદળછાયા વાતાવરણ વચ્ચે મુશળધાર વરસાદ પડાવાની શક્યતા છે. આ સમયગાળા દરમિયાન ૪૦ થી ૫૦ કિલોમીટર પ્રતિ કલાકની ઝડપે પવન ફૂંકાઈ શકે છે.
દેશના ૧૦ મુખ્ય રાજ્યો માટે તોફાની વરસાદનું એલર્ટ
હવામાન વિભાગના બુલેટિન મુજબ ઉત્તર પ્રદેશ, બિહાર, દિલ્હી, ઉત્તરાખંડ, રાજસ્થાન, હિમાચલ પ્રદેશ, જમ્મુ અને કાશ્મીર, ઝારખંડ, મધ્ય પ્રદેશ અને પશ્ચિમ બંગાળમાં આજે મેઘરાજા રૌદ્ર સ્વરૂપ ધારણ કરી શકે છે.
-
દિલ્હી અને પંજાબ-હરિયાણા: રાજધાની દિલ્હીમાં આખો દિવસ વાદળો ઘેરાયેલા રહેશે. ૬૦ થી ૭૦ કિમીની ઝડપે પવન સાથે ભારે વરસાદની આશંકા છે. પંજાબના પઠાણકોટ, જલંધર, લુધિયાણા અને મોહાલી તેમજ હરિયાણાના સોનીપત, પાનીપત અને ફરીદાબાદમાં તીવ્ર વાવાઝોડા સાથે વરસાદની ચેતવણી છે.
-
ઉત્તર પ્રદેશ અને બિહાર: યુપીના મેરઠ, બરેલી, કાનપુર, પ્રયાગરાજ અને ગોરખપુર સહિત ૧૯થી વધુ જિલ્લાઓમાં તોફાની વરસાદનો ભય છે. બિહારના પટના, ગયા, મુઝફ્ફરપુર, ભાગલપુર અને દરભંગા સહિત ઉત્તર અને દક્ષિણ બિહારમાં ૭૦ કિમીની ઝડપે ફૂંકાતા પવન સાથે વીજળી પડવાની શક્યતા છે.
-
મહારાષ્ટ્ર અને રાજસ્થાન: મહારાષ્ટ્રના મુંબઈ, થાણે, પાલઘર, પુણે અને રત્નાગિરીમાં મુશળધાર વરસાદની આગાહી છે. જ્યારે રાજસ્થાનના કોટા, બારાન, સિરોહી, જયપુર, જોધપુર અને ઉદયપુર સહિતના વિસ્તારોમાં ૮૦ કિમીની ઝડપે વાવાઝોડું ફૂંકાઈ શકે છે.
-
મધ્ય પ્રદેશ અને ઝારખંડ: એમપીના ઉજ્જૈન, ભોપાલ, વિદિશા, છિંદવાડા અને રવા સહિતના વિસ્તારોમાં ગાજવીજ સાથે વરસાદ થશે. ઝારખંડના રાંચી, જમશેદપુર અને બોકારોમાં ભારે વરસાદની શક્યતા છે.
પહાડી રાજ્યોમાં ભૂસ્ખલનનો ભય: પ્રવાસીઓને સાવચેત રહેવા અપીલ
ઉત્તરાખંડના ચમોલી, પિથોરાગઢ, નૈનીતાલ અને ઉત્તરકાશી તેમજ હિમાચલ પ્રદેશના શિમલા, મનાલી, કુલ્લુ, કાંગરા અને ચંબા જેવા પહાડી વિસ્તારોમાં ભૂસ્ખલન (Landslide) અને નદીઓમાં અચાનક પૂર (Flash Floods) આવવાનું જોખમ તોળાઈ રહ્યું છે. જમ્મુ-કાશ્મીરના કઠુઆ, રિયાસી, રાજૌરી અને બારામુલામાં પણ ભારે પવન સાથે વરસાદની શક્યતા છે. હવામાન વિભાગે પ્રવાસીઓને પોતાની યાત્રા શરૂ કરતા પહેલાં સ્થાનિક હવામાન અને માર્ગોની સ્થિતિ ચકાસી લેવા વિનંતી કરી છે.
પૂર્વ ભારતના કેટલાક વિસ્તારોમાં વરસાદની સાથે કરા (Hailstorm) પડવાની પણ સંભાવના વ્યક્ત કરવામાં આવી છે.
