અંડરવર્લ્ડને મોટો ઝટકો: દાઉદનો ખાસ સાગરિત અને ડ્રગ માફિયા સલીમ ડોલા ઈસ્તંબુલથી ભારત લવાયો
ભારતીય તપાસ એજન્સીઓને અંડરવર્લ્ડ અને ડ્રગ નેટવર્ક વિરુદ્ધ મોટી સફળતા મળી છે. અંડરવર્લ્ડ ડોન દાઉદ ઈબ્રાહિમનો અત્યંત નજીકનો ગણાતો અને આંતરરાષ્ટ્રીય ડ્રગ તસ્કર સલીમ ડોલાને તુર્કીના ઈસ્તંબુલથી ધરપકડ બાદ ભારત ડિપોર્ટ કરવામાં આવ્યો છે. રવિવારે, ૨૮ એપ્રિલના રોજ તેને દિલ્હીના ટેકનિકલ એરપોર્ટ પર લાવવામાં આવ્યો હતો. આ ઓપરેશન ભારતીય ગુપ્તચર એજન્સીઓ અને આંતરરાષ્ટ્રીય એજન્સીઓના સંયુક્ત પ્રયાસોનું પરિણામ છે.
ઈસ્તંબુલમાં કેવી રીતે થઈ ધરપકડ?
સલીમ ડોલા લાંબા સમયથી ભારતીય એજન્સીઓની રડાર પર હતો. તેની સામે ઇન્ટરપોલ દ્વારા રેડ કોર્નર નોટિસ જારી કરવામાં આવી હતી. આ નોટિસના આધારે તુર્કીની નેશનલ ઇન્ટેલિજન્સ ઓર્ગેનાઇઝેશન (MIT) અને સ્થાનિક પોલીસ દ્વારા એક સંયુક્ત ઓપરેશન હાથ ધરવામાં આવ્યું હતું, જેમાં ડોલાને ઈસ્તંબુલમાંથી ઝડપી પાડવામાં આવ્યો હતો. થોડા દિવસોની કસ્ટડી બાદ હવે તેને ખાસ વિમાન મારફતે ભારત મોકલી દેવામાં આવ્યો છે.
દાઉદ ઈબ્રાહિમ સાથે સીધો સંબંધ
સલીમ ડોલા માત્ર એક ડ્રગ માફિયા નથી, પણ તે દાઉદ ઈબ્રાહિમના ડી-કંપની નેટવર્કનો એક મુખ્ય સ્તંભ માનવામાં આવે છે. ભારતભરમાં નશીલા પદાર્થોનું જાળ બિછાવવા માટે તે દાઉદનો સૌથી મોટો ચેનલ પાર્ટનર હતો. અહેવાલો મુજબ, તે દર વર્ષે હજારો કરોડ રૂપિયાનો ડ્રગ્સનો કાળો કારોબાર સંભાળતો હતો. તે દુબઈ અને મુંબઈમાં રહીને પોતાનું નેટવર્ક ચલાવતો હતો. તેની સામે અનેક ગંભીર ગુનાઓ નોંધાયેલા છે અને નાર્કોટિક્સ કંટ્રોલ બ્યુરો (NCB) એ તેના પર ૧ લાખ રૂપિયાનું ઈનામ પણ જાહેર કર્યું હતું.
મુંબઈ ક્રાઈમ બ્રાન્ચની મોટી કાર્યવાહી
મુંબઈ પોલીસની ક્રાઈમ બ્રાન્ચ લાંબા સમયથી સલીમ ડોલા અને તેના પરિવાર પર નજર રાખી રહી હતી. તપાસમાં સામે આવ્યું છે કે ભારતમાં અનેક સ્થળે ડોલાની ગેરકાયદે ડ્રગ ફેક્ટરીઓ અને લેબ ધમધમી રહી હતી, જેને એજન્સીઓએ અગાઉ તોડી પાડી છે.
સલીમ ડોલા પહેલા તેના પરિવારના અન્ય સભ્યો પર પણ કાયદાનો ગાળિયો કસાયો હતો:
ઓક્ટોબર ૨૦૨૫: મુંબઈ ક્રાઈમ બ્રાન્ચે સલીમ ડોલાના મુખ્ય સાથી મોહમ્મદ સલીમ સોહેલ શેખને દુબઈથી પ્રત્યાર્પણ કરાવી ભારત લાવ્યા હતા.
નવેમ્બર ૨૦૨૫: ડોલાના પુત્ર તાહિર ડોલા સહિત પરિવારના ચાર સભ્યોને દુબઈથી પકડીને ભારત લાવવામાં આવ્યા હતા.
આગામી તપાસ અને પૂછપરછ
હાલમાં દિલ્હી ખાતે ઇન્ટેલિજન્સ ઓફિસરો સલીમ ડોલાની સઘન પૂછપરછ કરી રહ્યા છે. એવી શક્યતા છે કે ટૂંક સમયમાં તેને મુંબઈ પોલીસને સોંપવામાં આવશે, કારણ કે મુંબઈમાં તેની સામે ડ્રગ્સના મોટા કેસો પેન્ડિંગ છે. પોલીસ તેની પૂછપરછ દ્વારા ભારતમાં દાઉદના બાકી રહેલા નેટવર્ક, ડ્રગ્સના સપ્લાય રૂટ અને ટેરર ફંડિંગના કનેક્શન વિશે વધુ વિગતો મેળવવાનો પ્રયાસ કરશે.
આ ડિપોર્ટેશનથી ભારતમાં સક્રિય અંડરવર્લ્ડની કમર તૂટી જવાની આશા સેવાઈ રહી છે.
