બાંગ્લાદેશમાં હિન્દુ પરિવારો પર જીવલેણ હુમલા: પાંચ દિવસમાં સાત ઘરો ફૂંકી મરાયા, પોલીસ દ્વારા ઈનામની જાહેરાત

હિન્દુઓના ઘરોમાં આગચંપીથી બાંગ્લાદેશમાં ખળભળાટ: પોલીસ એક્શનમાં, હુમલાખોરોની માહિતી આપનારને અપાશે ઈનામ

બાંગ્લાદેશમાં સત્તા પરિવર્તન બાદ ફાટી નીકળેલી હિંસા અને સાંપ્રદાયિક હુમલાઓએ હવે અતિ ભયાનક સ્વરૂપ ધારણ કર્યું છે. ચટગાંવના રાઉજાન વિસ્તારમાં છેલ્લા 5 દિવસમાં 7 હિંદુ પરિવારોના ઘરોને નિશાન બનાવી સળગાવી દેવામાં આવ્યા છે. આ ગંભીર સ્થિતિને જોતા હવે બાંગ્લાદેશ પોલીસ એક્શનમાં આવી છે અને હુમલાખોરોની માહિતી આપનાર માટે ઈનામની જાહેરાત કરવામાં આવી છે.

બાંગ્લાદેશમાં ભયનો માહોલ: હિંદુ પરિવારોને જીવતા સળગાવવાનો પ્રયાસ

મંગળવારે રાત્રે ચટગાંવના રાઉજાનમાં બનેલી ઘટના હૃદયદ્રાવક હતી. અજ્ઞાત બદમાશોએ કતારમાં કામ કરતા શુખ શીલ અને અનિલ શીલના ઘરને બહારથી દરવાજા બંધ કરીને આગ ચાંપી દીધી હતી. ઘરના 8 સભ્યોએ પતરાં અને વાંસની વાડ કાપીને માંડ-માંડ પોતાનો જીવ બચાવ્યો હતો.

ચટગાંવ રેન્જના પોલીસ ચીફ અહસાન હબીબે બુધવારે ઘટનાસ્થળની મુલાકાત લીધી અને ગુનેગારોને પકડવા માટે ઈનામની જાહેરાત કરી. જોકે, ઈનામની રકમ હજુ જાહેર કરવામાં આવી નથી.

ખાડીના દેશોમાં યુદ્ધની આગ ભડકશે? અમેરિકા પ્રથમવાર તૈનાત કરશે અત્યાધુનિક ‘ડાર્ક ઇગલ’ હાઇપરસોનિક મિસાઇલ

ભારત માટે રશિયાની મોટી ઓફર: સુખોઈ Su-57 ફાઈટર જેટના સંયુક્ત ઉત્પાદન અને ટેકનોલોજી માટે પુતિન તૈયાર

હિંસાનો ભયાનક આંકડો: વર્ષ 2025 માં 184 મોત

બાંગ્લાદેશમાં સ્થિતિ કેટલી વણસી છે તેનો અંદાજ માનવાધિકાર સંગઠન ‘એન ઓ સલીશ કેન્દ્ર’ના રિપોર્ટ પરથી લગાવી શકાય છે. રિપોર્ટ અનુસાર, વર્ષ 2025માં અત્યાર સુધીમાં હિંસાને કારણે 184 લોકોએ જીવ ગુમાવ્યા છે. તાજેતરની ગંભીર ઘટનાઓ:

• દીપુ ચંદ્ર દાસની હત્યા: મયમનસિંઘમાં 28 વર્ષીય હિંદુ કર્મચારી દીપુ ચંદ્ર દાસની ભીડ દ્વારા નિર્મમ હત્યા કરવામાં આવી હતી. તેના પર ઈશનિંદાનો પાયાવિહોણો આરોપ લગાવાયો હતો.
• મીડિયા હાઉસ પર હુમલા: ઢાકામાં ઈન્કલાબ મંચના નેતા શરીફ ઉસ્માન હાદીના મોત બાદ ઉશ્કેરાયેલા ટોળાએ ‘ડેલી સ્ટાર’ અને ‘પ્રથમ આલો’ જેવી પ્રતિષ્ઠિત અખબારોની ઓફિસોને આગ ચાંપી દીધી હતી.
• સાંસ્કૃતિક સંસ્થાઓ પર પ્રહાર: જૂના અને જાણીતા સાંસ્કૃતિક સંગઠનો ‘છાયાનટ’ અને ‘ઉદિચી શિલ્પી ગોષ્ઠી’ના કાર્યાલયોને પણ ફૂંકી મારવામાં આવ્યા છે.

પોલીસની કાર્યવાહી અને વચગાળાની સરકારનું વલણ

રાઉજાન પોલીસે અત્યાર સુધીમાં 5 શંકાસ્પદ લોકોની ધરપકડ કરી છે અને અન્ય આરોપીઓની શોધખોળ માટે દરોડા પાડવામાં આવી રહ્યા છે. બીજી તરફ, વચગાળાની સરકારના વડા મોહમ્મદ યુનુસે નિવેદન આપ્યું છે કે અફવાઓના આધારે કરવામાં આવતી હિંસા સાંખી લેવામાં નહીં આવે. સરકારે દીપુ ચંદ્ર દાસના પરિવારની જવાબદારી લેવાની ખાતરી આપી છે, પરંતુ જમીની સ્તરે લઘુમતીઓમાં હજુ પણ ભારે ફફડાટ જોવા મળી રહ્યો છે.

બાંગ્લાદેશ હિંસા: એક નજરે

બાંગ્લાદેશમાં લઘુમતી હિંદુઓ પર થઈ રહેલા આ હુમલાઓએ આંતરરાષ્ટ્રીય સ્તરે ચિંતા જન્માવી છે. માત્ર ધરપકડ કે ઈનામની જાહેરાત પુરતી નથી, પરંતુ લઘુમતીઓને સુરક્ષાનો અહેસાસ કરાવવો એ યુનુસ સરકાર માટે સૌથી મોટો પડકાર છે.