આતંકવાદી કેસમાં નામ જોડવાનો ખોટો દાવો કરી સાયબર ગુનેગારોનું નવું જાળ
સાયબર ગુનેગારો હવે લોકોના ડર અને અજ્ઞાનતાનો ગેરલાભ લઈ નવી પ્રકારની છેતરપિંડી અજમાવી રહ્યા છે. તાજેતરમાં ‘ડિજિટલ અરેસ્ટ’ના બહાને લોકોને દેશદ્રોહ અને આતંકવાદ જેવી ગંભીર વાતોમાં ફસાવવાનો પ્રયાસ કરવામાં આવી રહ્યો છે. આવા ફોનકોલમાં પીડિતને માનસિક રીતે દબાણમાં મૂકીને ભયભીત કરવામાં આવે છે. ખાસ કરીને પાકિસ્તાન કનેક્શન અને મોટા આતંકી હુમલાનો ઉલ્લેખ કરી લોકો પાસેથી મોટી રકમ પડાવવાનો પ્રયાસ થાય છે. આ પ્રકારની ઘટનાઓથી સામાન્ય નાગરિકોમાં ભય અને ગેરસમજ ફેલાઈ રહી છે.
શું છે સાયબર ઠગોની નવી રીત
નવા મોડસ ઓપરેન્ડી હેઠળ સાયબર ઠગો ગંભીર અવાજ અને ખોટી ઓળખ સાથે ફોન કરે છે. તેઓ દાવો કરે છે કે કોઈ મોટા વિસ્ફોટ કે આતંકી કેસમાં પકડાયેલા આરોપીઓએ તમારી માહિતી આપી છે. મોબાઈલ નંબર મારફતે ગુપ્ત માહિતી મોકલ્યાનો ખોટો આરોપ લગાવીને પીડિતને ગભરાવવામાં આવે છે. જ્યારે જાગૃત નાગરિકો કાયદેસર નોટિસ અથવા વકીલ મારફતે જવાબની માંગ કરે છે, ત્યારે આવા ઠગો ગભરાઈ જાય છે. આ પરથી સ્પષ્ટ થાય છે કે સાચી તપાસ એજન્સીઓ ક્યારેય ફોન પર આવી આવી કાર્યવાહી કરતી નથી.
ડિજિટલ અરેસ્ટથી બચવા માટે જરૂરી સાવચેતી
આજના સમયમાં સાયબર અપરાધ સામે જાગૃતિ જ સૌથી મોટું હથિયાર છે. કોઈ પણ સરકારી એજન્સી ફોન કે વીડિયો કોલ પર ધરપકડ કે પૂછપરછ કરતી નથી, આ વાત સ્પષ્ટ રીતે યાદ રાખવી જોઈએ. અજાણ્યા ફોન પર કોઈ ડરાવવાની કોશિશ કરે તો શાંતિથી તર્કસંગત પ્રશ્નો પૂછવા જોઈએ. OTP, બેંક વિગતો, ઓળખ કાર્ડ જેવી વ્યક્તિગત માહિતી ક્યારેય શેર ન કરવી. સત્તાવાર લેખિત નોટિસની માંગણી કરવાથી મોટા ભાગે ઠગાઈ અટકી જાય છે.
શંકાસ્પદ કોલ આવે તો શું કરવું
જો કોઈ અજાણ્યા નંબર પરથી શંકાસ્પદ ફોન આવે તો તરત ગભરાવું નહીં. આવી ઘટનાની જાણ નજીકના પોલીસ સ્ટેશનમાં કરવી અત્યંત જરૂરી છે. શક્ય હોય તો કોલની વિગતો અને નંબર સાચવી રાખવા જોઈએ. સમયસર ફરિયાદ કરવાથી અન્ય લોકો પણ આ પ્રકારની ઠગાઈથી બચી શકે છે. સચેત નાગરિક બનવું એ જ સાયબર માફિયાઓ સામે સૌથી અસરકારક જવાબ છે.
