અભ્યાસ સાથે નોકરી – ગુજરાતમાં જાણો કઇ યુનિવર્સિટીની આ ઓફર છે…

ગુજરાત ટેક્નોલોજીકલ યુનિવર્સિટી (જીટીયુ) અને જાપાનની ટોયટા ટોશો કંપની વચ્ચે મેન્યુફેક્ચરીંગ ટેક્નોલોજી અને ઓટોમોબાઈલ ક્ષેત્રમાં ડિપ્લોમા અને અન્ય શોર્ટ ટર્મ કોર્સીસ બાબતે એમઓયુ કરવામાં આવ્યા છે.

આ એમઓયુ કરવાથી આગામી સમયમાં વિદ્યાર્થીઓને ઓટોમોબાઈલ્સ અને મેન્યુફેક્ચરીંગ ટેક્નોલોજીમાં અભ્યાસની સાથે-સાથે રોજગાર બાબતેની પણ વિપુલ પ્રમાણમાં તકો પ્રાપ્ત થશે. જીટીયુના કુલસચિવ ડો. કે.એન. ખેર અને જાપાનની ટેક્નોટ્રેક્સ ઓટો પાર્ક પ્રાઈવેટ લિમીટેડ કંપનીના મેનેજીંગ ડાયરેક્ટર તોમોહિરો યામા દ્વારા આ એમઓયુ પર હસ્તાક્ષર કરવામાં આવ્યા હતા.

જીટીયુના કુલપતિ નવીન શેઠ એ કહ્યું હતું કે ઓટોમોબાઈલ્સ, મેન્યુફેક્ચરીંગ ટેક્નોલોજી અને ફોરેન લેગ્વેજીસ જેવા શોર્ટ ટર્મ પ્રેક્ટીકલ કોર્સ વિદ્યાર્થીઓને ટેક્નિકલ રીતે તેમજ આર્થીક રીતે પણ લાભદાયી નિવડશે. આગામી સત્રથી ડિપ્લોમા ઈન મેન્યુફેક્ચરીંગ ટેક્નોલોજીની 4 બેચમાં 160 વિદ્યાર્થીઓને વિનામૂલ્યે પ્રવેશ આપવામાં આવશે. પ્રેક્ટીકલ અભ્યાસ દરમિયાન વિદ્યાર્થીઓને સ્ટાઈપેન્ડ પણ આપવામાં આવશે.

અભ્યાસ બાદ વિવિધ ફોરેન કંપનીમાં પ્લેસમેન્ટ સંબધિત પણ જોગવાઇ કરવામાં આવી છે. ઉપરાંત ફોરેન લેગ્વેજીસ અને ઓટોમોબાઈલ્સ સંબધિત છ મહિનાના શોર્ટ ટર્મ કોર્સીસ પણ ચલાવવામાં આવશે. તાજેતરમાં જ ભારત સરકાર દ્વારા આ યુનિવર્સિટીને ભારતની પાંચમી બેસ્ટ યુનિવર્સિટીનો ખિતાબ આપવામાં આવ્યો છે. એ ઉપરાંત ગયા વર્ષે યુએસએની સંસ્થા દ્વારા એશિયાની નંબર વન ટેક્નોલોજિકલ યુનિવર્સિટી (જીટીયુ) ને મોસ્ટ ટ્રસ્ટેડસ્ટેટ યુનિવર્સિટીનો અવોર્ડ આપવામાં આવ્યો છે. આ એવોર્ડ માટે દેશની 500 યુનિવર્સિટીમાંથી ગુજરાતની એકમાત્ર યુનિવર્સિટીને પસંદ કરવામાં આવી હતી.