ગુજરાત ટેકનોલોજીકલ યુનિવર્સિટી (જીટીયુ) ના વિદ્યાર્થીઓની બીજા તબક્કાની ઓનલાઇન પરીક્ષા 17મી ઓગષ્ટથી શરૂ થઇ રહી છે. પ્રથમ તબક્કામાં રહી ગયેલા વિદ્યાર્થીઓ બીજા તબક્કામાં પરીક્ષા આપી શકશે. આ ઓનલાઇન પરીક્ષા ડિપ્લોમા, યુજી અને પીજીની 12 શાખાના વિદ્યાર્થીઓ માટે યોજાશે.
તાજેતરમાં જ આ યુનિવર્સિટીએ વિવિધ શાખાઓના છેલ્લા વર્ષમાં અભ્યાસ કરતાં વિદ્યાર્થીઓની પ્રથમ તબક્કાની ઓનલાઇન પરીક્ષાનું સફળ આયોજન પૂર્ણ કર્યું છે. પ્રથમ તબક્કાની ઓનલાઇન પરીક્ષાની ભવ્ય સફળતા અને વિદ્યાર્થીઓની માંગણીને માન્ય રાખીને જીટીયુ દ્વારા બીજા તબક્કામાં પણ ઓનલાઈન પરીક્ષા લેવાનું નક્કી કરવામાં આવ્યું છે.
આવતીકાલ તારીખ 17 ઓગસ્ટના રોજથી ડિપ્લોમા, યુજી અને પીજીના તમામ શાખાઓના 23282 વિદ્યાર્થીઓ બીજા તબક્કાની ઓનલાઇન પરીક્ષા આપશે. વિદ્યાર્થીઓ મોબાઈલ, ટેબ્લેટ અને લેપટોપ જેવા ડિજિટલ ઉપકરણોનો ઉપયોગ કરીને પરીક્ષા આપી શકશે.
પ્રથમ તબક્કામાં જે વિદ્યાર્થીઓ ટેક્નિકલ કારણોસર કોઈ પેપર આપી શક્યા ના હોય તો, બીજા તબક્કામાં બાકી રહેલ પેપર આપી શકશે. પ્રથમ તબક્કાની ઓનલાઇન પરીક્ષાના સફળ આયોજન પછી બાકી રહેલા વિદ્યાર્થીઓ દ્વારા બીજા તબક્કામાં પણ ઓનલાઇન પરીક્ષા લેવાની માંગણીને માન્ય રાખીને વિદ્યાર્થીઓ માટેનો હિતલક્ષી નિર્ણય જીટીયુ દ્વારા કરવામાં આવ્યો છે.
જે વિદ્યાર્થી પાસે નેટની સુવિધા ના હોય તે નજીકની જીટીયુ સંલગ્ન કોલેજના વાય-ફાઈનો ઉપયોગ કરીને મોબાઈલ, ટેબ્લેટ અને લેપટોપની જેવા ડિજિટલ ઉપકરણ પર પરીક્ષા આપી શકશે. જીટીયુના ડીગ્રી, ડિપ્લોમા, એન્જીનીયરીંગ અને ફાર્મસીના અંતિમ વર્ષ/સેમેસ્ટરમાં અભ્યાસ કરતા 23282 વિદ્યાર્થીઓ પરીક્ષા આપશે. જે વિદ્યાર્થીઓ બન્ને તબક્કાની ઓનલાઇન પરીક્ષામાં હાજર નથી તેવા વિદ્યાર્થીઓની સ્પેશિયલ ઓફલાઈન પરીક્ષા યોગ્ય સમય અને પરિસ્થિતિને ધ્યાનમાં રાખીને જીટીયુ દ્વારા લેવામાં આવશે.