એક કરોડથી વધુનો ઉપાડ થશે તો બેન્ક બે ટકા ટીડીએસ આપોઆપ કાપી લેશે

સેન્ટ્રલ બોર્ડ ઓફ ડાયરેક્ટ ટેક્સિસ (સીબીડીટી) રાજ્યની તમામ બેંકો તેમજ પોસ્ટ ઓફિસને યુટીલીટી પૂરી પાડશે જેમાં એક કરોડથી ઉપરનો રોકડ ઉપાડ થાય તો બે ટકા ટીડીએસ આપોઆપ કપાઇ જશે. બેન્કો દ્વારા ટીડીએસ કાપવામાં કોઈ ગરબડ ન થાય તેના માટે આ પગલું લેવામાં આવ્યું છે. જો કોઇ ખાતેદારે છેલ્લાં ત્રણ વર્ષના રિટર્ન ફાઇલ નહીં કર્યા હોય તો તે હવે છટકી શકશે નહીં.આ વ્યવસ્થા પ્રમાણે ચાલુ વર્ષના બજેટમાં આવકવેરાની નવી ઉમેરાયેલી કલમ 194-એન મુજબ એક કરોડથી વધુ રકમનો રોકડમાં ઉપાડ કરનાર કોઇ પણ કરદાતા માટે સમગ્ર વર્ષમાં ટુકડે-ટુકડે મળીને પણ જો એક કરોડથી વધુ ઉપાડ કરશે તો દરેક બેન્ક, કોઓપરેટિવ બેંક તેમજ પોસ્ટ ઓફિસ આવી રોકડ ઉપાડ ચુકવણી કરતી વખતે બે ટકા લેખે ટીડીએસ કાપી લેશે.કરદાતાએ છેલ્લાં ત્રણ વર્ષના ઇન્કમટેક્સ રિટર્ન નહીં ભરેલા હોય તો આ ઉપાડની લિમિટ ઘટાડીને 20 લાખ કરી દેવામાં આવી છે એટલે કે ત્રણ વર્ષના રિટર્ન ફાઇલ નહીં કરનાર કરદાતાઓ 20 લાખથી વધુની રોકડ ઉપાડ કરશે તો બે ટકા લેખે ટીડીએસ કપાવાનું શરૂ થઈ જશે. ત્રણ વર્ષના રિટર્ન ફાઇલ નહીં કરનાર કરદાતા જ્યારે એક કરોડથી વધારેનો ઉપાડ કરશે તો આ ઉપાડ ઉપર પાંચ ટકા લેખે ટીડીએસ કપાશે.આ યુટીલીટી બેંકો તથા પોસ્ટ ઓફિસની ઈન્ટરકોર બેન્કિંગ સોલ્યુશન્સ સાથે લિંક કરી દેવામાં આવશે. જેને પગલે દરેક બેન્ક અને પોસ્ટ ઓફિસમાં જ્યારે કોઈ વ્યક્તિ રોકડ ઉપાડવા માટે આવે ત્યારે ફરજિયાત તેનો પાન નંબર એન્ટર કરવાનો રહેશે અને પાન નંબર એન્ટર થતાંની સાથે જ યુટીલીટી રોકડ ઉપાડવા માટે આવેલા ખાતેદારે રિટર્ન ફાઇલ કર્યા છે કે નહીં તે ઓટોમેટિક ચેક કરી લેશે.ખાતેદારે રીટર્ન નહીં ભર્યું હોય તો સિસ્ટમ જાતે જ તેનો ઉપાડ 20 લાખ થાય કે તરત જ ટીડીએસ કાપવાનું શરૂ કરી દેશે. રેગ્યુલર રિટર્ન ફાઈલ કરનાર ખાતેદાર માટે એક કરોડના ઉપાડ ઉપર બે ટકા લેખે ટીડીએસ કપાશે પરંતુ જો ખાતેદાર પાન કાર્ડ ધરાવતો ન હોય તો 20 ટકા લેખે ટીડીએસ કપાશે.