ગુજરાત કોંગ્રેસને જો સત્તા પર આવવું હોય તો એક નહીં અનેક હાર્દિક પટેલ જોઇશે તેવું કોંગ્રેસમાંથી ભાજપમાં ગયેલા અને નારાજ થયેલા સૌરાષ્ટ્રના એક સિનિયર નેતાએ કહ્યું છે. તેમના મતે કોંગ્રેસને બેઠી કરવી હોય અને 2022માં સત્તા જોઇતી હોય તો કોંગ્રેસે રાજ્યના 33 જિલ્લામાં હાર્દિક પટેલ જેવા મજબૂત નેતાઓની શોધ કરીને તેમને જિલ્લાની સુપ્રીમ પોસ્ટ આપી દેવી જોઇએ.
સૌરાષ્ટ્રના આ પૂર્વ ધારાસભ્ય થોડાં સમય પહેલાં ભાજપમાં જોડાયા છે પરંતુ હોદ્દો નહીં મળવાથી દુખી છે. તેમની નજર કોંગ્રેસ પર છે. જો કોંગ્રેસ 2022માં ટિકીટ આપે તો તેઓ તેમની વર્ષોજૂની બેઠક પરથી ચૂંટણી લડવા માગે છે, એટલું જ નહીં જીતવાનો વાયદો પણ કરે છે. ગુજરાત કોંગ્રેસમાં જૂની ઘરેડના નેતાઓની હકાલપટ્ટી કરીને નવા લોહીને આગળ આવવાની તક મળવી જોઇએ તેવું તેઓ માને છે.
નરેન્દ્ર મોદીની સ્ટાઇલમાં નરેન્દ્ર મોદીએ જ જવાબ આપવો જોઇએ તેવું માનતા આ પૂર્વ ધારાસભ્ય કહે છે કે દિલ્હીના મુખ્યમંત્રી અરવિંદ કેજરીવાલે તેમના ભાષણમાં નરેન્દ્ર મોદીની વિરૂદ્ધમાં એકપણ શબ્દ ઉચાર્યો ન હતો તેથી તેઓ પેટાચૂંટણીઓ જીતી ગયા હતા. તેમણે મોદીને જાહેરમાં ગાળો આપવાનું બંધ કર્યું છે જેનું પરિણામ સામે છે. કોંગ્રેસે પણ પોતે શું કરવા માગે છે તે લોકોને બતાવવું પડશે પરંતુ જો કોંગ્રેસના નેતાઓ મોદીને ગાળો આપવાનું ચાલુ રાખશે તો તેના નેગેટીવ પ્રચારથી કોંગ્રેસને મોટું નુકશાન થઇ શકે છે.
ગુજરાતમાં કોંગ્રેસ 29 વર્ષની સત્તામાં નથી. નવી પેઢીના લોકોએ ભાજપની સરકારને જોઇ છે. આજે સ્થિતિ એવી છે કે ગુજરાતની 65 ટકા જનતાએ કોંગ્રેસની સરકાર જોઇ નથી છતાં નવી પેઢીમાંથી કોંગ્રેસના સંગઠનમાં માત્ર 15 ટકા લોકોને સ્થાન આપવામાં આવ્યું છે. આજે પણ બિમાર, વૃદ્ધ અને અશક્ત લોકો ચૂંટણી આવે એટલે ટિકીટની લાઇનમાં ગોઠવાઇ જાય છે. નવી પેઢીને તક મળતી નથી. આઇડિયા કોઇનો પણ હોય, હાર્દિક પટેલને કોંગ્રેસના વર્કિંગ પ્રેસિડેન્ટ બનાવ્યા છે તે કોંગ્રેસના હાઇકમાન્ડનો માસ્ટરસ્ટ્રોક છે.
હાર્દિક ગમે તે હોય પરંતુ તે ફાયર બ્રાન્ડ નેતા છે. ભાજપના લોકોને તે સારી રીતે ઓળખે છે. ક્યા સમયે ક્યો ઘા મારવો તે હાર્દિક જાણે છે. તેના ભાષણોમાં તેજાબ છલકાય છે. લોકોને તે જકડી રાખે છે. એટલું જ નહીં હાર્દિકની એવી કેપેસિટી છે કે તે ગુજરાતમાં કોઇપણ ખૂણે જાહેર સભામાં હજારોની મેદની એકત્ર કરી શકે છે. તેણે કહ્યું છે કે મારે કોંગ્રેસને 2022માં સત્તામાં જોવી છે.
આ પૂર્વ ધારાસભ્યએ કહ્યું હતું કે ગુજરાત કોંગ્રેસમાં રાજ્યના 33 જિલ્લામાં એક એક હાર્દિક પટેલ એવો ઉભો કરવો જોઇએ કે જે સોશ્યલ મિડીયામાં પોપ્યુલર અને પ્રભુત્વ ધરાવતો હોય, કેમ કે ગુજરાત અને દિલ્હીમાં નરેન્દ્ર મોદીની પોપ્યુલારિટી પાછળ 60 ટકા સોશ્યલ મિડીયાનો પ્રભાવ છે.