ગાંધીનગર સ્થિત બિઝનેસ હબ એવા ગિફ્ટ સિટીમાં કોમર્શિયલની સાથે સાથે રેસિડેન્સિયલ કોમ્પલેક્સ બની રહ્યાં છે. ગિફ્ટ સિટીમાં ગુજરાતના સૌથી ઉંચા 33 માળના બે બેલ્ડીંગ બનાવવામાં આવી રહ્યાં છે, જે અત્યંત લકઝુરિયસ છે. ચોંકાવનારી બાબત એવી છે કે આ ટાવરમાં રેસિડેન્શિયલ ફ્લેટ્સની કિંમત પણ સૌથી ઉંચી મૂકવામાં આવી છે.
ગાંધીનગરના રિયલ એસ્ટેટમાં ખળભળાટ મચી જાય તેવી કિંમતના ફ્લેટ છે. વન બીએચકે ફ્લેટની કિંમત 40 લાખ રૂપિયાથી શરૂ થાય છે જ્યારે ટુ બીએચકે ફ્લેટની કિંમત 56 લાખ રૂપિયાથી શરૂ થાય છે. એક થી દોઢ કરોડ કરતાં પણ વધુની કિંમતના ફ્લેટ આ ટાવરમાં બની રહ્યાં છે.
આ બે ગગનચુંબી 33 માળના ટાવરનું નિર્માણ બેંગલુરુ સ્થિત શોભા ડેવલપર્સ કરી રહ્યું છે. ગિફટસિટીમાં અત્યાર સુધી બિઝનેસ માટે ટાવર સ્થપાયા છે, હવે આ પ્રથમ રેસિડેન્શિયલ ટાવર ઊભા થશે. આ અગાઉ ગિફટસિટીમાં સ્થપાયેલા બે ઓફિસ ટાવર પણ 28 માળના હતા. શોભા ડેવલપર્સનો ગુજરાતનો આ પ્રથમ પ્રોજેક્ટ છે અને કંપની આ બન્ને ટાવરનું બાંધકામ 2024માં પૂર્ણ કરશે.
આ રેસિડેન્સી પ્રોજેક્ટ સાથે ગિફટસિટીમાં તેના આયોજન મુજબ ટૂંક સમયમાં ગિફ્ટનો વોક-ટુ-વર્ક કોન્સેપ્ટ પણ અમલમાં મુકાશે. શોભા ડેવલપર્સે ગિફ્ટ સિટીમાં પ્રથમ રહેણાક પ્રોજેક્ટ –શોભા ડ્રીમ હાઇટ્સ– લોંચ કર્યો છે. શોભા ડ્રીમ હાઇટ્સમાં દરેક ઘર રહેવાસીઓને આધુનિક જીવનનો અનુભવ પ્રદાન કરવા લકઝુરિયસ સુવિધા અને ઉપયોગિતા ઓફર કરવા માટે ડિઝાઇન કરી છે.
શોભા ડ્રીમ હાઇટ્સમાં બે ટાવરમાં 474 યુનિટ બનાવવામાં આવી રહ્યાં છે, જેનો કુલ સુપર બિલ્ટ એરિયા 5.24 લાખ ચોરસ ફીટ છે. પ્રોજેક્ટ આધુનિક સુવિધાઓ સાથે 1BHK અને 2BHK એપાર્ટમેન્ટ ઓફર કરશે. તેમાં વોટર વોલ સાથે ત્રણ માળનું એક પ્રકારનું ક્લબહાઉસ સામેલ હશે, જે 8,000 ચોરસ ફીટના વિશાળ એરિયાને આવરી લેશે. અન્ય કેટલીક સુવિધાઓમાં ક્રિકેટ પિચ, બાસ્કેટબોલ કોર્ટ, સ્વિમિંગ પૂલ, જિમ્નેશિયમ અને ટેનિસ કોર્ટ સામેલ છે.