જો તમે ફિક્સ્ડ ડિપોઝિટ અથવા એફડી (FD) લેવાનું વિચારી રહ્યા છો તો થોડો સમય રાહ જોવી તમારા માટે વધુ ફાયદાકારક હોઈ શકે છે. ખાનગી ક્ષેત્રની એક્સિસ બેંક અને આઈડીબીઆઈ બેંકે દરોમાં વધારા સાથે બદલાવની શરૂઆત કરી છે. બેંકિંગ ક્ષેત્રના નિષ્ણાતો કહે છે કે ટૂંક સમયમાં અન્ય બેન્કો પણ ગ્રાહકોને આકર્ષવા માટે આવી ઑફર કરી શકે છે.
એક્સિસ બેન્ક પાંચ વર્ષથી વધુની FD પર 5.75% વ્યાજ ચૂકવી રહી છે. જ્યારે, ત્રણ વર્ષથી વધુ અને પાંચ વર્ષથી ઓછા સમય સુધી, FD પર 5.40 ટકા વ્યાજ ચૂકવે છે. તે જ સમયે, 18 મહિનાથી વધુ અને બે વર્ષથી ઓછા સમયની FD પર 5.25 ટકા વ્યાજ આપી રહી છે. એક વર્ષની FD પરનો વ્યાજ દર 5.15 ટકા છે. મોટાભાગની બેંકો સિનિયર સિટિઝન્સને અડધા ટકાથી 0.75 ટકા સુધી વધુ વ્યાજ ચૂકવે છે. એક્સિસ બેન્ક 15 ડિસેમ્બર 2020 પછી ઓછામાં ઓછા બે વર્ષની FD કરાવનારાઓ પાસેથી સમય પહેલાના ઉપાડ પર કોઈ ફી લેશે નહીં. સામાન્ય રીતે બેંકો સમય પહેલા ઉપાડની સ્થિતિમાં અડધાથી એક ટકાની ફી કાપી લે છે, જેનાથી ગ્રાહકોને નુકસાન થાય છે.
એક્સિસ બેન્કે કેટલીક શરતો સાથે મેચ્યોરિટી પહેલાના ઉપાડના ચાર્જીસ પણ રદ કરી દીધા છે. પરંતુ મોટાભાગની બેંકો હજી આ ફી વસૂલતી હોય છે. બેંકિંગ નિષ્ણાતો કહે છે કે મેચ્યોરિટી પહેલાના ઉપાડ પર ચાર્જ લેવાની સાથે બેન્કોએ FDના નિશ્ચિત વ્યાજમાં પણ ઘટાડો કર્યો છે. તેઓ કહે છે કે તમે બે વર્ષની FD બનાવી છે જેના આધારે વ્યાજ દર પાંચ ટકા છે અને તમે એક વર્ષ પછી FD તોડવાનું નક્કી કર્યું છે જેના પર ચાર ટકા વ્યાજ છે, પછી બેંકો એક વર્ષ મુજબ વ્યાજ ચૂકવે છે. તેનાથી ડબલ નુકસાન થાય છે.
સરકારે બેંકોમાં જમા કરાવવાની ગેરેન્ટી પાંચ ગણી વધારીને પાંચ લાખ રૂપિયા કરી દીધી છે. કોઇ પરિસ્થિતિમાં બેંક ડૂબી જાય છે, ત્યારે તમને આટલી રકમ મળે છે. જો તમારી પાસે 7 લાખ રૂપિયાની FD, 2 લાખ રૂપિયાની આરડી અને એક જ બેંકમાં 1 લાખ રૂપિયાનું બચત ખાતું છે, તો જો બેંક ફડચામાં જાય તો તમને ફક્ત પાંચ લાખ રૂપિયા મળશે. આવી સ્થિતિમાં જુદી જુદી બેંકોમાં ઓછી રકમની FD કરાવવી વધુ ફાયદાકારક છે.
