મધ્યપ્રદેશના ખરગોનમાં, 2 અને 3 મેના રોજ લાદવામાં આવેલા કર્ફ્યુના કારણે, ઈદની નમાઝ પણ ઘરે જ અદા કરવામાં આવશે. ખરગોનના એડિશનલ ડિસ્ટ્રિક્ટ મેજિસ્ટ્રેટ સુમેર સિંહ મુજાલદાએ જણાવ્યું હતું કે, “આ વખતે ઈદની નમાજ ઘરે જ અદા કરવામાં આવશે. એ પણ જણાવવામાં આવ્યું કે અક્ષય તૃતીયા અને પરશુરામ જયંતિ પર જિલ્લામાં કોઈ કાર્યક્રમ યોજવાની મંજૂરી આપવામાં આવશે નહીં.”
અક્ષય તૃતીયા અને પરશુરામ જયંતિ માટે પરવાનગી આપવામાં આવી નથી. જિલ્લા વહીવટીતંત્ર અને સમુદાય વચ્ચેની બેઠક બાદ આ નિર્ણય લેવામાં આવ્યો છે. ઉલ્લેખનીય છે કે, 10 એપ્રિલે મધ્યપ્રદેશના ખરગોનમાં રામ નવમીના શોભાયાત્રા દરમિયાન ફાટી નીકળેલી હિંસા બાદ ત્યાં કર્ફ્યુ લાદવામાં આવ્યો હતો. આ કર્ફ્યુ સમયાંતરે હળવો કરવામાં આવતો હતો.
10 એપ્રિલે રામ-નવમીની શોભાયાત્રા દરમિયાન પથ્થરમારાની ઘટના બાદ શહેરમાં અચાનક હિંસા ફાટી નીકળી હતી. અધિક જિલ્લા મેજિસ્ટ્રેટે વધુમાં જણાવ્યું હતું કે 1 મેના રોજ સવારે 8 થી સાંજના 5 વાગ્યા સુધી છૂટછાટ આપવામાં આવશે. એડીએમએ કહ્યું, “આદેશ આપવામાં આવ્યો છે કે દુકાનો ખુલ્લી રહેશે અને પરીક્ષા આપનાર વિદ્યાર્થીઓને પાસ આપવામાં આવશે. જો કે, માંગ મુજબ નિર્ણય બદલી શકાય છે.”
10 એપ્રિલના રોજ ફાટી નીકળેલી હિંસામાં પોલીસ કર્મચારીઓ સહિત ઘણા લોકો ઘાયલ થયા હતા, જ્યારે લોકોના જૂથોએ સરઘસ દરમિયાન એકબીજા પર પથ્થરમારો કર્યો હતો. સરઘસની શરૂઆતમાં જ પથ્થરમારો શરૂ થયો હતો, જેમાં એક પોલીસ ઈન્સ્પેક્ટર સહિત ચાર લોકો ઘાયલ થયા હતા. આ પછી, આ મામલો દેશભરમાં હેડલાઇન્સ બન્યો, તે રાજકીય પક્ષો માટે રાજકીય મુદ્દો બની ગયો.
