ગાંધીનગર — રાજ્ય સરકારની અને ખાનગી ક્ષેત્રની પાવર કંપનીઓના મોટા ભાગના પ્લાન્ટ ઓછી ડિમાન્ડને પગલે બંધ રહ્યા છે. પાવર પ્લાન્ટ યુનિટ બંધ રહેવા પાછળ ઓપન માર્કેટમાં ઓછા ભાવે પાવર ઉપલબ્ધ હોવાનું કારણ બહાર આવ્યું છે.
રાજ્યમાં હાલમાં 6,400 મેગાવોટની ખાનગી અને સરકારી પ્લાન્ટની ક્ષમતા ધરાવતા પ્લાન્ટ માંગ ન હોવાને કારણે ટૂંકા સમય માટે-રિઝર્વ શટડાઉન કરવામાં આવ્યા છે. અગાઉ એપ્રિલ મહિનાના અંતમાં 5,500 મેગાવોટના 23 પ્લાન્ટ બંધ હતા.જો કે હાલમાં તેના કરતાં પણ વધુ યુનિટ શટડાઉન થયા છે.
સ્ટેટ લોડ ડિસ્પેચ સેન્ટરના ડેટા મુજબ 17 યુનિટ કે જેની 3,900 મેગાવોટની ક્ષમતાના યુનિટ કે પ્લાન્ટ બંધ કરાયા છે. જ્યારે પ્રાઇવેટ સેક્ટરમાં પણ પ્લાન્ટના 15 યુનિટ હાલમાં બંધ કરવામાં આવ્યા છે. જેને પગલે 2,400 મેગાવોટની ક્ષમતાના વીજ પ્લાન્ટ બંધ છે. ઓછી માંગ અને ખુલ્લા બજારમાં ઓછા ભાવે મળતી વીજળીને કારણે અગાઉ કરતાં વધુ પાવર પ્લાન્ટ યુનિટ બંધ થયા છે. ઉર્જા વિભાગના અધિકારીએ જણાવ્યું હતું કે, લોકડાઉન પછી ઉદ્યોગોની કામગીરી શરૂ થઈ છે.
પરંતુ હજુ મોટા ભાગના કોમર્શિયલ ઓપરેશન કરતાં યુનિટ, શોપ્સ કે કારખાનાઓ હજુય બંધ હોવાને કારણે હાલમાં વીજમાંગમાં 60 ટકા ઘટાડો થયો છે. સામાન્ય રીતે ઔદ્યોગિક યુનિટ દ્વારા 130 મિલિયન યુનિટ વીજળી રોજની વપરાતી હોય છે. તેને સ્થાને હાલમાં તો 70 મિલિયન યુનિટ્સ પ્રતિ દિવસ વપરાય છે. સામાન્ય રીતે આ સમયગાળાની સાથે ઉદ્યોગોની માંગ સાથે 18,000 મેગાવોટ વીજળી વપરાતી હતી તેની સામે હાલમાં 14,000 મેગાવોટ વપરાય છે.
ઇન્ડિયન એનર્જી એક્સ્ચેંજ પર વીજળીનો ભાવ યુનિટ દીઠ 2.65 પૈસા રહે છે, જેને પગલે ઓપન માર્કેટમાં વીજળી સસ્તી છે તેની અસર રાજ્યના વીજ ઉત્પાદન યુનિટ પર પડી રહી છે.