ગુજરાતના વીજ ગ્રાહકોને સરકારે પ્રતિ યુનિટ 16 પૈસાની રાહત આપી.

ગાંધીનગર – ગુજરાતના વીજગ્રાહકોને રાજ્ય સરકારે પ્રતિ યુનિટ માત્ર 16 પૈસાની રાહત આપતો નિર્ણય કર્યો છે. આ રાહતના કારણે સરકાર પર 310 કરોડ રૂપિયાનું ભારણ પડશે. રાજ્યની ચાર મુખ્ય વીજકંપનીઓ તેમના બીલમાં આ રાહત આપશે.

રાજ્યના ઊર્જામંત્રી સૌરભ પટેલે જણાવ્યું છે કે રાજ્યમાં વીજ વપરાશ કરતા વીજ ગ્રાહકોને સસ્તા દરે વીજળી મળી રહે અને વીજ ઉત્પાદન ખર્ચનું ભારણ ગ્રાહકો પર ન પડે તે માટે સરકાર હસ્તકની વીજકંપનીઓ દ્વારા ગ્રાહકો પાસેથી વસૂલાતા ફ્યુઅલ સરચાર્જમાં પ્રતિ યુનિટ 16 પૈસાનો ઘટાડો કરવાનો રાજ્ય સરકારે નિર્ણય કર્યો છે. જેના પરિણામે રાજ્યના 1.30 કરોડથી વધુ ગ્રાહકો ને રૂપિયા 310 કરોડની રાહતના લાભ મળશે.

તેમણે કહ્યું કે વીજ વપરાશકર્તા ગ્રાહકો પાસેથી વીજ બિલમાં એનર્જી ચાર્જ ઉપરાંત ફ્યુઅલ સરચાર્જ લેવામાં આવે છે આ ફ્યુઅલ સરચાર્જની વસુલાત ગુજરાત વીજ નિયમન આયોગ દ્વારા નક્કી કરેલ ફોર્મ્યુલાના આધારે વસૂલવામાં આવે છે.

પાછલા ત્રિમાસિક ગાળા દરમિયાન એટલેકે જાન્યુઆરી થી માર્ચ દરમિયાન ફ્યુઅલ સર ચાર્જની વસુલાત પ્રતિ યુનિટ 2.06 પૈસા લેખે વસૂલાતો હતો તેની સામે એપ્રિલ થી જૂનના ત્રિમાસિક ગાળા દરમિયાન ફ્યુઅલ સરચાર્જ પ્રતિ યુનિટ રૂપિયા 1.90 ના દરે વસૂલવાનો થાય છે. આમ ગત ત્રિમાસિક ગાળા કરતાં આ ત્રિમાસિક ગાળામાં ફ્યુઅલ સરચાર્જ પ્રતિ યુનિટમાં 16 પૈસાનો ઘટાડો થયો છે.

આ ફ્યુઅલ સરચાર્જ ઘટવાનું મુખ્ય કારણ એ છે કે આ ત્રિમાસિક ગાળા દરમિયાન રાજ્ય સરકારે સસ્તા દરે ગેસ ગ્રાહકોના હિતમાં ખરીદ્યો છે અને ગેસ આધારિત વીજ ઉત્પાદન કર્યું છે જેને લીધે વીજ ઉત્પાદન ખર્ચ ઓછું થયું છે, જેનો સીધો લાભ વીજ ગ્રાહકોને આપવાનો રાજ્ય સરકારે નિર્ણય કર્યો છે.