નડાલે એટીપી માસ્ટર્સમાં સર્વાધિક જીત મેળવવાનો ફેડરરને રેકોર્ડ તોડ્યો

સ્પેનના સ્ટાર ખેલાડી રાફેલ નડાલે રોજર્સ કપમાં ગાઇડો પેલ્લા સામે વિજય મેળવીને એટીપી માસ્ટર્સ 1000માં સર્વાધિક જીત મેળવવાના રોજર ફેડરરના રેકોર્ડને તોડ્યો હતો. ગુરૂવારે રમાયેલી મેચમાં નડાલે ગાઇડોને 6-3, 6-4થી હરાવીને એટીપી માસ્ટર્સ 1000માં પોતાની 379મી જીત મેળવીને ફેડરરના 378 જીતના રેકોર્ડને તોડ્યો હતો.

નડાલ આ જીતની સાથે જ 9મીવાર રોજર્સ કપની ક્વાર્ટર ફાઇનલમાં પ્રવેશ્યો છે. હવે સેમી ફાઇનલમાં પ્રવેશવા માટે નડાલનો સામનો શુક્રવારે ઇટલીના ફેબિયો ફોગનિની સાથે થશે. ફોગનિનીએ 7માં ક્રમાંકિત ફ્રાન્સના એડ્રિયન મન્નારિયોને 6-2, 7-5થી હરાવીને ક્વાર્ટર ફાઇનલમાં પ્રવેશ કર્યો છે. ગાઇડો સામેની છેલ્લી ત્રણેય મેચ સીધા સેટમાં જીતનારા નડાલે આ મેચ દરમિયાન સંપૂર્ણ અંકુશમાં રહ્યો હતો. તેણે ગાઇડો સામે 1 કલાક અને 47 મિનીટમાં વિજય મેળવવામાં કોઇ સમસ્યા અનુભવી નહોતી.