અમેરિકા-ઈરાન યુદ્ધ વચ્ચે ટ્રમ્પનું ચોંકાવનારું નિવેદન: “ઈરાની લોકો ખૂબ શક્તિશાળી છે, હું તેમનું સન્માન કરું છું”
અમેરિકા અને ઈઝરાયેલના ઈરાન સાથે ચાલી રહેલા ભીષણ જંગ વચ્ચે રાષ્ટ્રપતિ ડોનાલ્ડ ટ્રમ્પના એક નવા નિવેદને સમગ્ર વિશ્વને ચોંકાવી દીધું છે. અત્યાર સુધી ઈરાન વિરુદ્ધ આક્રમક વલણ અપનાવનારા ટ્રમ્પે અચાનક સૂર બદલતા ઈરાની લોકોના વખાણ કર્યા છે. ટ્રમ્પના આ નિવેદનથી સંકેત મળી રહ્યો છે કે તેઓ હવે યુદ્ધ વિરામ અને સમજૂતી તરફ આગળ વધી રહ્યા છે.
ઈરાની લોકોના કર્યા વખાણ
એક ખાસ ઇન્ટરવ્યુમાં ડોનાલ્ડ ટ્રમ્પે ઈરાની પ્રજા વિશે વાત કરતા જણાવ્યું હતું કે, “ઈરાની લોકો અત્યંત શક્તિશાળી છે અને તેઓ ગમે તેટલું દર્દ સહન કરવાની ક્ષમતા ધરાવે છે. હું તેમનું સન્માન કરું છું.” ટ્રમ્પે વધુમાં ઉમેર્યું કે ઈરાનીઓ માત્ર લડવૈયા જ નથી, પરંતુ તેઓ ખૂબ સારા વાટાઘાટકારો (Negotiators) પણ છે. ટ્રમ્પનું માનવું છે કે હવે ઈરાન સાથે ટેબલ પર બેસીને વાતચીત કરવાનો સમય આવી ગયો છે અને તેઓ ટૂંક સમયમાં કોઈ મોટો કરાર કરવા માંગે છે.
ઈઝરાયેલ ક્યારે રોકાશે? ટ્રમ્પનો વિશ્વાસ
આ યુદ્ધમાં ઈઝરાયેલની ભૂમિકા અંગે પૂછવામાં આવતા ટ્રમ્પે ખૂબ જ આત્મવિશ્વાસ સાથે કહ્યું કે, “ઈઝરાયેલ એક ઉત્તમ ટીમ પ્લેયર છે. હું તેમને જે કહીશ તે જ તેઓ કરશે.” ટ્રમ્પના આ નિવેદનથી સ્પષ્ટ થાય છે કે ઈઝરાયેલના વડાપ્રધાન બેન્જામિન નેતન્યાહૂ અમેરિકાના ઈશારે જ પોતાની સૈન્ય કાર્યવાહી રોકવા તૈયાર થશે. ટ્રમ્પે દાવો કર્યો હતો કે જો તેઓ ઈચ્છશે તો ઈઝરાયેલ તાત્કાલિક અસરથી હુમલા બંધ કરી દેશે.
યુદ્ધની પૃષ્ઠભૂમિ અને ‘ઓપરેશન એપિક ફ્યુરી’
ઉલ્લેખનીય છે કે આ સંઘર્ષની શરૂઆત 28 ફેબ્રુઆરીએ થઈ હતી, જ્યારે ટ્રમ્પના આદેશ પર ઈરાન વિરુદ્ધ ‘ઓપરેશન એપિક ફ્યુરી’ શરૂ કરવામાં આવ્યું હતું. આ ઓપરેશન દરમિયાન ઈરાનના સર્વોચ્ચ નેતા અયાતુલ્લા અલી ખામેનેઈની હત્યા કરવામાં આવી હતી, જેનાથી સ્થિતિ વધુ વણસી હતી. જોકે, હવે ટ્રમ્પના બદલાયેલા તેવર બતાવે છે કે તેઓ લશ્કરી તાકાતને બદલે રાજદ્વારી માર્ગે ઉકેલ લાવવા ઈચ્છે છે.
શું યુદ્ધનો અંત નજીક છે?
ટ્રમ્પે પહેલાના નિવેદનોમાં યુદ્ધના અંતને નેતન્યાહૂ સાથેનો સંયુક્ત નિર્ણય ગણાવ્યો હતો, પરંતુ હવે તેઓ પોતે જ આ પ્રક્રિયાનું નેતૃત્વ કરી રહ્યા હોય તેવું લાગે છે. તેમણે કહ્યું કે જો કોઈ ઉશ્કેરણી નહીં થાય, તો તેઓ ઈઝરાયેલને રોકી દેશે. વિશ્વભરના નિષ્ણાતો હવે ટ્રમ્પના આ “યુ-ટર્ન” ને યુદ્ધના અંતની શરૂઆત તરીકે જોઈ રહ્યા છે.
