જન્મ દાખલાથી લઈ પાસપોર્ટ સુધીના તમામ દસ્તાવેજ નકલી
સુરતમાં નકલી દસ્તાવેજોના આધારે ભારતીય નાગરિકતા મેળવવાનો એક ગંભીર કેસ પ્રકાશમાં આવ્યો છે. અફઘાનિસ્તાનથી આવીને વર્ષોથી શહેરમાં રહેતા વ્યક્તિએ નકલી જન્મ નોંધણી તૈયાર કરાવી હતી અને તેના આધારે અનેક મહત્વના દસ્તાવેજો મેળવી લીધાં હતા. તાજેતરમાં શ્રમ અધિકારીની કામગીરી દરમ્યાન આ ગેરરીતિનું ભાંડાફોડ થતા પોલીસ તંત્ર ચકચારમાં આવી ગયું છે. હવે ચોકબજાર પોલીસ દ્વારા આ મામલે ગુનો નોંધાઈને વિશેષ તપાસ શરૂ કરવામાં આવી છે.
નકલી દસ્તાવેજોના આધારે નાગરિકતા મેળવવાનો પ્રયત્ન
માહિતી અનુસાર, આરોપી મોહમદ આમીર જાવીદ ખાન, મૂળ કાબુલનો રહેવાસી, હાલ જહાંગીરપુરા વિસ્તારમાં રહેતો હતો. તેને યુ.એન. રેફ્યુઝી કાર્ડ તો પ્રાપ્ત હતું, પરંતુ કાયમી રીતે ભારતીય નાગરિકતા મેળવવા તેણે ગેરકાયદેસર રસ્તો પસંદ કર્યો. મિત્ર અગજાનની મદદથી તેણે પોતાને જાલના, મહારાષ્ટ્રમાં જન્મ્યો હોવાનું દર્શાવી ખોટું જન્મ પ્રમાણપત્ર તૈયાર કરાવ્યું હતું. ખોટી જન્મતારીખ દર્શાવી આ દસ્તાવેજને કાયદેસર તરીકે રજૂ કર્યો હતો.
આધારથી પાસપોર્ટ સુધી તમામ દસ્તાવેજો નકલી
આ નકલી જન્મ દસ્તાવેજનો ઉપયોગ કરીને આધાર કાર્ડ, પાન કાર્ડ, મતદાર ઓળખપત્ર અને ભારતીય પાસપોર્ટ બનાવવામાં આવ્યા હોવાનું તપાસમાં બહાર આવ્યું છે. ચારેય દસ્તાવેજો દેશની ઓળખ વ્યવસ્થામાં અત્યંત સંવેદનશીલ ગણાય છે. માત્ર બે મહિના દરમિયાન આ બધું તૈયાર કરાવી લેવામાં આવ્યું હતું. હવે પોલીસ દ્વારા IPC અને પાસપોર્ટ અધિનિયમ હેઠળ ગંભીર કલમો મુજબ કાર્યવાહી હાથ ધરવામાં આવી છે.
કાવતરાની સમયરેખા અને પોલીસ તપાસ
ચોકબજાર પોલીસ મુજબ, આ કાવતરાને 19 ડિસેમ્બર 2024થી 18 ફેબ્રુઆરી 2025 વચ્ચે અંજામ આપવામાં આવ્યો હતો. આરોપીને કસ્ટડીમાં લઈને પૂછપરછ શરૂ થઈ છે, જ્યારે અગજાન સહિત અન્ય સંડોવાયેલા લોકોની શોધખોળ ચાલી રહી છે. પોલીસ એ પણ તપાસી રહી છે કે આરોપી કોઈ સંગઠિત નેટવર્કનો ભાગ હતો કે નહીં, અને અન્ય રેફ્યુજી પર તેનો શું પ્રભાવ પડ્યો હતો. આ કેસથી સુરતમાં દસ્તાવેજોની સુરક્ષા વ્યવસ્થા અંગે નવા પ્રશ્નો ઉભા થયા છે.
