ઈન્ટરનેશનલ ફોકલોર ફેસ્ટિવલમાં વૈશ્વિક પરંપરાનો મહાસંગમ
પારૂલ યુનિવર્સિટીએ ઇન્ટરનેશનલ ફોકલોર ફેસ્ટિવલની(Folklore Festival) ત્રીજી આવૃત્તિનું વિશાળ આયોજન કરી વિશ્વના વિવિધ દેશોનાં પરંપરા, સંગીત, નૃત્ય અને લોકસંસ્કૃતિને એક છત નીચે જોડવાનો અનોખો પ્રયાસ કર્યો છે. 30 દેશોના પ્રતિનિધિઓ અને 600થી વધુ કલાકારોની હાજરીએ કેમ્પસમાં જીવંત વૈશ્વિક રંગ ભરી દીધા હતા. ‘વસુધૈવ કુટુંબકમ’ની ભાવનાને કેન્દ્રસ્થાને રાખીને આ ઉત્સવમાં વિશ્વ એક પરિવાર છે તે સંદેશ પૂરો ઊંડાણથી સ્પર્શ કરતો રહ્યો. વિદ્યાથીઓને વૈશ્વિક કલાની અનુભૂતિ સાથે પરંપરાગત વારસા પ્રત્યે સમજ વધે તે હેતુથી આ કાર્યક્રમ વિશેષ નોંધપાત્ર બન્યો.
600થી વધુ આંતરરાષ્ટ્રીય કલાકારોની તાલ-લયથી ખીલી યુનિવર્સિટી
ભારત સહિત લિથુઆનિયા, પોલેન્ડ, ગ્રીસ, કઝાકિસ્તાન, રશિયા, મોઝામ્બિક, ઘાના અને ક્યુબા જેવા અનેક દેશોથી આવેલા કલાકારોને પોતાની ઓળખ, વેશભૂષા અને પ્રાચીન પરંપરાઓ સાથે મંચ પર રજૂઆત કરવાની તક મળી. દરેક દેશનાં ગ્રૂપોએ પોતાની લોકધારાની કૃતિઓ, વાર્તાઓ અને નૃત્યરૂપો દ્વારા સાંસ્કૃતિક સૌદર્ય વ્યક્ત કર્યું. રંગીન વસ્ત્રો, અનોખા તાલવાદ્યો અને લોકસૂરોથી ભીની પ્રસ્તુતિઓએ સમગ્ર કેમ્પસને રમઝટે ભર્યો. પરંપરા અને આધુનિકતા વચ્ચેનું સુંદર સંતુલન જોવા મળતાં દર્શકો કલાકો સુધી મંત્રમુગ્ધ બન્યા રહ્યાં.
સ્ટેચ્યુ ઑફ યુનિટી ખાતે ઉત્સવનું ભવ્ય ઉદ્ઘાટન
આ લોકસાંસ્કૃતિક ઉજવણીનો આરંભ 25 નવેમ્બરે સ્ટેચ્યુ ઑફ યુનિટી ખાતે થયો, જ્યાં હાજર સર્વે પ્રતિનિધિઓએ વૈશ્વિક શાંતિના સંકલ્પ સાથે ઉત્સવની શરૂઆત કરી. સરદાર પટેલના અવિસ્મરણીય રાષ્ટ્રનિર્માણ યોગદાનને નમનરૂપ આ કાર્યક્રમમાં વિશ્વ એકતા પર ભાર મુકાયો. આગામી પાંચ દિવસ સુધી પારૂલ યુનિવર્સિટીમાં પરંપરાગત સંગીત, લોકગીતો અને વેશભૂષાની ઝળહળથી વિદ્યાર્થીઓને અનોખો અનુભવ મળવાનો છે. વિશ્વના 30 દેશો એક જ મંચ પર જોડાતા કલાનું સરહદરહિત સ્વરૂપ વધારે પ્રબળ થઈ રહ્યું છે.
વૈશ્વિક સાંસ્કૃતિક સંવાદનો જીવંત અનુભવ
કેન્દ્ર સરકારના પૂર્વ મંત્રી મીનાક્ષી લેખીએ જણાવ્યું કે, આવા ઉત્સવો માનવ સમાજને યાદ અપાવે છે કે એકતામાં શક્તિ છે અને સંસ્કૃતિ લોકો વચ્ચે સેતુ બનાવે છે. નાંદોદના એમએલએ ડો. દર્શનાબેન વસાવાના શબ્દોએ પણ સ્પષ્ટ કર્યું કે દરેક નૃત્ય અને ગીતમાં માત્ર કલા નહીં, પણ તેથી જોડાયેલો ઇતિહાસ અને ભાવનાત્મક વારસો જળવાયેલો છે. અલગ-અલગ દેશોનો સંગમ અહીં માત્ર કાર્યક્રમ નહીં પણ સંસ્કારી જોડાણ બની ઊભું થયું.
પારૂલ યુનિવર્સિટી સમૃદ્ધ પણ વૈવિધ્યસભર વિશ્વનું પ્રતિબિંબ
યુનિવર્સિટી પ્રેસિડેન્ટ ડો. દેવાંશુ પેટલે જણાવ્યું કે સંસ્કૃતિઓ મળે ત્યારે વિશ્વ વધારે સંવેદનશીલ, સર્જનાત્મક અને એકતાભર્યું બને છે. અહીં ભાગ લેનારા દરેક કલાકારે માત્ર પોતાની કળા નહીં પરંતુ દેશનો સ્વાદ, સુગંધ અને પરંપરાનું ગૌરવ સાથે લાવ્યા છે. આ ફેસ્ટિવલ ફક્ત રંગમંચ નહીં, સાંસ્કૃતિક આદાનપ્રદાનનો જીવંત દરિયો સાબિત થયો. આવનારા વર્ષોમાં પણ આવા કાર્યક્રમો દ્વારા પારૂલ યુનિવર્સિટી વૈશ્વિક જોડાણોને વધુ મજબૂત કરતી રહેશે.
