શ્રી ગોવિંદ ગુરુ યુનિવર્સિટીના ૩૯ વિદ્યાર્થીઓ વેસ્ટ ઝોન યુથ ફેસ્ટિવલમાં ઝળક્યા, ફાઈન આર્ટ્સ સ્પર્ધામાં પ્રથમ અને ત્રીજું સ્થાન

વિંઝોલની યુનિવર્સિટીએ પશ્ચિમાંચલ યુથ ફેસ્ટિવલમાં નોંધાવ્યો પ્રભાવશાળી દેખાવ

પંચમહાલની શ્રી ગોવિંદ ગુરુ યુનિવર્સિટી (વિંઝોલ) ના વિદ્યાર્થીઓએ આંતર-યુનિવર્સિટી સ્તરે યોજાયેલા વેસ્ટ ઝોન યુથ ફેસ્ટિવલમાં પોતાની કળાનું ઉત્કૃષ્ટ પ્રદર્શન કર્યું છે. કુલપતિ પ્રો. હરિભાઈ કાતરીયાના માર્ગદર્શન હેઠળ ૧૧ થી ૧૫ ફેબ્રુઆરી દરમિયાન યોજાયેલા આ મહોત્સવમાં યુનિવર્સિટીના ૩૯ વિદ્યાર્થીઓએ ૧૯ જેટલી અલગ-અલગ સ્પર્ધાઓમાં ભાગ લીધો હતો. આ સ્પર્ધાઓમાં વિદ્યાર્થીઓએ પોતાની સર્જનાત્મકતા દ્વારા યુનિવર્સિટીનું ગૌરવ વધાર્યું છે.

ફાઈન આર્ટસમાં નોંધપાત્ર સિદ્ધિ: મુનપુર અને સંતરામપુરના વિદ્યાર્થીઓ ઝળક્યા

આ યુથ ફેસ્ટિવલમાં ખાસ કરીને ફાઈન આર્ટસ વિભાગમાં વિદ્યાર્થીઓએ મેદાન માર્યું છે. કોલાઝ (Collage) સ્પર્ધામાં મુનપુરની સી. આર. ગાર્ડી આર્ટસ કોલેજના વિદ્યાર્થી વિક્રમ ખાંટે પ્રથમ સ્થાન મેળવીને ગોલ્ડ મેડલ જેવી સિદ્ધિ હાંસલ કરી છે. તેની સાથે જ, ઓન-ધ-સ્પોટ પેઈન્ટિંગ સ્પર્ધામાં સંતરામપુર સરકારી વિજ્ઞાન કોલેજના કુલદિપ ખાંટે ત્રીજું સ્થાન મેળવી યુનિવર્સિટીની કળા-શક્તિનો પરિચય આપ્યો છે.

વિજેતાઓને ટ્રોફી અને પ્રમાણપત્ર સાથે પ્રોત્સાહન

વિજેતા વિદ્યાર્થીઓને કુલપતિ પ્રો. હરિભાઈ કાતરીયાના હસ્તે ટ્રોફી અને પ્રમાણપત્ર આપી સન્માનિત કરવામાં આવ્યા હતા. આ સફળતા પાછળ ટીમ મેનેજર ડૉ. દેવર્ષ પટેલ અને ડૉ. સુશીલા વ્યાસ તેમજ માર્ગદર્શક કમલ જોશી અને ચિંતન પંચાલનું મહત્વનું યોગદાન રહ્યું છે. યુનિવર્સિટી પરિવાર અને રજીસ્ટ્રારશ્રીએ આશા વ્યક્ત કરી છે કે આ વિદ્યાર્થીઓ આગામી સમયમાં રાષ્ટ્રીય સ્તરની સ્પર્ધાઓમાં પણ આવું જ ઉજ્જવળ પ્રદર્શન કરશે.