વડોદરા વિભાગમાં એસટી નિગમની વિશેષ ઝુંબેશ: બસ સ્ટેશન પર તમાકુ-ધુમ્રપાન સામે કાર્યવાહી
ગુજરાત રાજ્ય માર્ગ વાહન વ્યવહાર નિગમના વડોદરા વિભાગ દ્વારા બસ સ્ટેશન અને ડેપો પર સ્વચ્છતા જાળવવા માટે એક ખાસ ઝુંબેશ શરૂ કરવામાં આવી છે. જાહેર સ્થળોએ ધુમ્રપાન કરવાથી કે તમાકુ અને પાન-મસાલા ખાઈને ગંદકી કરવાથી લોકોના સ્વાસ્થ્ય પર ખરાબ અસર પડે છે. આ બાબતને ધ્યાનમાં રાખીને તંત્ર દ્વારા મુસાફરોમાં જાગૃતિ ફેલાવવામાં આવી રહી છે અને નિયમોનું પાલન કરવા માટે જરૂરી માર્ગદર્શન પણ આપવામાં આવી રહ્યું છે.
૨૫ દિવસમાં ૩૦ કેસ નોંધી ૨૬ હજારનો દંડ વસૂલાયો
ચાલુ મહિનાની ૧લી ફેબ્રુઆરીથી ૨૫મી ફેબ્રુઆરી દરમિયાન વડોદરા વિભાગના અલગ-અલગ ડેપો પર સઘન તપાસ કરવામાં આવી હતી. આ ચકાસણી દરમિયાન જાહેર સ્થળોએ નિયમોનો ભંગ કરી ગંદકી કરનારા લોકો સામે કડક પગલાં લેવામાં આવ્યા હતા. આ ૨૫ દિવસોમાં કુલ ૩૦ કેસ નોંધાયા છે અને બેદરકાર મુસાફરો પાસેથી આશરે ૨૬,૦૦૦ રૂપિયા જેટલી માતબાર દંડની રકમ વસૂલ કરવામાં આવી છે.
સ્વચ્છતા જાળવવા માટે મુસાફરોને તંત્રની અપીલ
વડોદરા એસ.ટી. વિભાગ દ્વારા તમામ નાગરિકો અને મુસાફરોને નમ્ર વિનંતી કરવામાં આવી છે કે બસ સ્ટેશન કે જાહેર સ્થળોએ ધુમ્રપાન, ગુટખા કે પાન-મસાલાનું સેવન ન કરે. સ્વચ્છતા એ માત્ર તંત્રની જવાબદારી નથી, પણ દરેક નાગરિકની ફરજ છે. બસ સ્ટેશન પરિસરને ચોખ્ખું રાખવામાં સહકાર આપવા અને ગંદકી મુક્ત ગુજરાતના સંકલ્પમાં સહભાગી થવા અધિકારીઓ દ્વારા ખાસ અપીલ કરવામાં આવી છે.
