વડોદરાની બીના ખીમાણીનો અનોખો શોખ, કારગિલ યુદ્ધની યાદોને સ્ક્રેપબુકમાં જીવંત રાખી

દેશપ્રેમની અનમોલ નિશાની, ૨૬ વર્ષથી કારગિલ યુદ્ધની તસવીરો સંભાળી રાખતી મહિલા

દરેક વ્યક્તિને જીવનમાં અલગ-અલગ શોખ હોય છે, પરંતુ વડોદરાના વારસિયા વિસ્તારમાં રહેતા બીના ખીમાણીનો શોખ રાષ્ટ્રભક્તિથી પ્રેરાયેલો છે. એક નિવૃત્ત સૈનિકની પુત્રી હોવાના નાતે તેમનામાં બાળપણથી જ દેશસેવાના સંસ્કાર સીંચાયેલા હતા. ૨૬ વર્ષ પહેલાં જ્યારે ભારત અને પાકિસ્તાન વચ્ચે કારગિલનું ભીષણ યુદ્ધ ખેલાયું, ત્યારે બીનાબેને તે યુદ્ધની દરેક મહત્વની ક્ષણોને કાગળ પર કંડારવાનું નક્કી કર્યું હતું. આજે તેમની પાસે કારગિલ યુદ્ધની તસવીરો અને માહિતીનો એવો અનોખો સંગ્રહ છે, જેને તેઓ પોતાની સૌથી મોટી સંપત્તિ માને છે.

અખબારી કટિંગ્સ દ્વારા તૈયાર કરેલી ઐતિહાસિક સ્ક્રેપબુક

કારગિલ યુદ્ધ દરમિયાન બીના ખીમાણીના ઘરે આવતા હિન્દી અખબારમાંથી તેઓ દરરોજ યુદ્ધના સમાચાર અને તસવીરો એકત્ર કરતા હતા. તેમણે સૈનિકોની બહાદુરીની વાર્તાઓ, લશ્કરી કાર્યવાહીની વિગતો અને રણભૂમિના દુર્લભ ફોટોગ્રાફ્સ કાપીને એક સુંદર સ્ક્રેપબુક તૈયાર કરી છે. જોકે તેઓ પોતે સેનામાં જોડાઈ શક્યા નહોતા, પરંતુ આ રીતે તેમણે સૈનિકો પ્રત્યેનું પોતાનું સન્માન અને દેશપ્રેમ વ્યક્ત કર્યો છે. આ બુકમાં યુદ્ધના ૬૦ દિવસોની પ્રત્યેક મહત્વપૂર્ણ ઘટનાઓ જીવંત રીતે સંગ્રહિત કરવામાં આવી છે.

ભારતીય સેનાનું શૌર્ય અને કારગિલ વિજયની યાદો

૨૬ જુલાઈ ૧૯૯૯ના રોજ સમાપ્ત થયેલા કારગિલ યુદ્ધને હવે ૨૬ વર્ષ પૂર્ણ થયા છે. આ યુદ્ધ ભારતીય સેનાના ઇતિહાસનું સૌથી મુશ્કેલ યુદ્ધ માનવામાં આવે છે, જેમાં ભારતીય જવાનોએ અદમ્ય સાહસ બતાવીને પાકિસ્તાન દ્વારા કબજે કરાયેલી ચોકીઓ પર ફરી તિરંગો લહેરાવ્યો હતો. બીનાબેને આ યુદ્ધના શૂરવીર કેપ્ટન હમીર સિંહ રાઠોડને મળવાની ઈચ્છા પણ રાખી હતી. તેમની આ સ્ક્રેપબુક માત્ર કાગળના ટુકડા નથી, પરંતુ તે સમયે દેશભરમાં ફેલાયેલા દેશભક્તિના મોજા અને જવાનોના બલિદાનની સાક્ષી પૂરતો એક દસ્તાવેજ છે.

પાણી પીધા પછી વાંદરાએ જે કર્યું તે જોઈ તમે પણ કરશો સલામ, માણસો માટે આ વીડિયો છે એક મોટો પાઠ

ઓલ ઇન્ડીયા ઇન્ટર યુનિવર્સિટી જુડો સ્પર્ધામાં સ્વર્ણિમ ગુજરાત સ્પોર્ટ્સ યુનિવર્સિટીના ખેલાડીઓનું દમદાર પ્રદર્શન

નવી પેઢી માટે દેશપ્રેમનું પ્રેરણાદાયી ઉદાહરણ

આજે ૨૬ વર્ષ બાદ પણ કારગિલ યુદ્ધની યાદો દરેક ભારતીયના દિલમાં એટલી જ તાજી છે. બીના ખીમાણીનું માનવું છે કે શહીદ સૈનિકોએ આપેલું બલિદાન દેશ માટે સદાય પ્રેરણારૂપ રહેશે. તેમની આ અનોખી ડાયરી અને સંગ્રહ નવી પેઢીને દેશની રક્ષા માટે સર્વસ્વ ન્યોછાવર કરનાર જવાનોની વીરગાથા સમજાવવામાં મદદરૂપ થશે. વડોદરાની આ દીકરીએ પોતાની મહેનતથી તૈયાર કરેલી આ ભેટ ખરા અર્થમાં દેશના વીર સપૂતોને આપેલી એક ભાવભરી અને અનમોલ શ્રદ્ધાંજલિ સમાન છે.