સ્ટાર્ટઅપ્સ માટે ફાઇનાન્શિયલ સપોર્ટ મોડેલ જાહેર, AI ટેક્નોલોજીથી ગુજરાતમાં વિકાસને નવી દિશા
ગુજરાતને આર્ટિફિશિયલ ઇન્ટેલિજન્સ અને ઉભરતી ટેક્નોલોજી માટે ગ્લોબલ સેન્ટર બનાવવાની દિશામાં ગાંધીનગર ખાતે એક મહત્વપૂર્ણ ‘સ્ટાર્ટઅપ સંવાદ’નું આયોજન કરવામાં આવ્યું હતું. મુખ્યમંત્રી ભૂપેન્દ્ર પટેલે દેશના વિવિધ રાજ્યોના ૨૪ જેટલા ઉચ્ચ ક્ષમતા ધરાવતા સ્ટાર્ટઅપ્સ સાથે સીધો સંવાદ કરીને તેમના ઇનોવેશન અને અનુભવો વિશે જાણકારી મેળવી હતી. મુખ્યમંત્રીએ જણાવ્યું હતું કે, વડાપ્રધાન નરેન્દ્ર મોદીએ નાખેલા વિકાસના મજબૂત પાયાને કારણે ગુજરાત આજે સેમિકન્ડક્ટર, એઆઈ અને ગ્રીન ગ્રોથ જેવા આધુનિક ક્ષેત્રોમાં દેશમાં મોખરે છે.
કૃષિ, શિક્ષણ અને આરોગ્ય ક્ષેત્રે એઆઈ ટેક્નોલોજીનું પ્રદર્શન
આ સંવાદ દરમિયાન વિવિધ ક્ષેત્રોના સ્ટાર્ટઅપ્સે તેમની પ્રોડક્ટ્સનું પ્રસ્તુતીકરણ કર્યું હતું. જેમાં ખેતીવાડી ક્ષેત્રે એઆઈના ઉપયોગ માટે ૫, આરોગ્ય ક્ષેત્ર માટે ૩, શિક્ષણ માટે ૬ અને ઉદ્યોગ તથા સરકારી સેવાઓ માટે ૧૦ જેટલા સ્ટાર્ટઅપ્સે પોતાની વિગતો રજૂ કરી હતી. મુખ્યમંત્રીશ્રીએ સ્પષ્ટ કર્યું કે રાજ્ય સરકાર પારદર્શિતા લાવવા અને સરકારી યોજનાઓના લાભો છેવાડાના માનવી સુધી ઝડપથી પહોંચાડવા માટે પ્રતિભાશાળી સ્ટાર્ટઅપ્સને પ્રાધાન્ય આપશે. ટેક્નોલોજી આધારિત વિકાસમાં ‘ક્વોલિટી’ સરકારની પ્રથમ પ્રાથમિકતા રહેશે તેવો તેમણે વિશ્વાસ અપાવ્યો હતો.
ગુજરાતમાં આધુનિક સોવરિન એઆઈ પાર્કનું નિર્માણ થશે
આ કાર્યક્રમ દરમિયાન રાજ્યના સાયન્સ એન્ડ ટેક્નોલોજી વિભાગ દ્વારા ‘Sarvam.ai’ અને ‘MIKO’ સ્ટાર્ટઅપ સાથે એમ.ઓ.યુ. (MoU) કરવામાં આવ્યા હતા. આ કરાર હેઠળ ગુજરાતમાં એક અત્યાધુનિક ‘સોવરિન એઆઈ પાર્ક’ ઉભો કરવામાં આવશે. આ કેમ્પસમાં હાઈ-એન્ડ કમ્પ્યુટિંગ ઈન્ફ્રાસ્ટ્રક્ચર, રિસર્ચ સેન્ટર્સ અને યુવાનો માટે સ્કિલ ડેવલપમેન્ટ જેવી સુવિધાઓ એક જ સ્થળે ઉપલબ્ધ થશે. આગામી ૫ વર્ષમાં આ પ્રોજેક્ટ દ્વારા મોટી સંખ્યામાં રોજગારીની તકો ઊભી થશે અને સરકારી સેવાઓ વધુ સ્માર્ટ અને ઝડપી બનશે.
સ્ટાર્ટઅપ્સ માટે આર્થિક સહાય અને ફાઇનાન્શિયલ સપોર્ટ મોડેલ
રાજ્ય સરકારે એઆઈ સોલ્યુશન્સ વિકસાવવા માટે સ્ટાર્ટઅપ્સને ‘પ્રૂફ ઓફ કન્સેપ્ટ’ (PoC) તબક્કાથી લઈને ફૂલ-સ્કેલ અમલીકરણ સુધી મજબૂત આર્થિક સહાય આપવાની જાહેરાત કરી છે. જટિલ પ્રોજેક્ટ્સ માટે રૂ. ૧૦ લાખ સુધીની પ્રારંભિક મદદ અને સફળતા બાદ રૂ. ૧ કરોડ સુધીની સહાય આપવામાં આવશે. આ ઉપરાંત, સ્ટાર્ટઅપ્સને ૪ વર્ષ સુધી રાજ્યના ડેટા સેન્ટર અને એઆઈ સેન્ટર ઓફ એક્સેલન્સના ઇન્ફ્રાસ્ટ્રક્ચરનો લાભ મળશે. આ પહેલથી ગુજરાત વિશ્વ ફલક પર એઆઈ ઇનોવેશન હબ તરીકે સ્થાપિત થશે અને ડિજિટલ ટ્રાન્સફોર્મેશનને નવી ગતિ મળશે.
