રાજ્યના પ્રાદેશિક વાહન વ્યવહાર વિભાગે રાજ્યમાં મહત્વના ચેક પોઇન્ટ અને ટોલ નાકાઓ પર રાઉન્ડ ધ ક્લોક ચેકિંગ કરવા માટે આદેશ આપ્યા છે. વાહન વ્યવહાર કમિશનર ગાંધીનગર દ્વારા રાજ્યના તમામ વાહન વ્યવહાર અધિકારીઓને આદેશ કર્યો છે. રાજ્યમાં નિશ્ચિત કરવામાં આવેલા 32 ચેક પોઈન્ટ ઉપરાંત અન્ય ચેકિંગ પોઇન્ટ પર સઘન ચેકિંગ કરવાના આદેશ કર્યા છે. રાજ્યમાં હાલ ટોલનાકા સહિત 32 ચેક પોઇન્ટ પર વાહનોનું ચેકિંગ અભિયાન કાર્યરત કરવામાં આવ્યું છે. જેમાં 150થી વધુ RTO ઇન્સ્પેક્ટર અને સ્ટાફ કામગીરી કરી રહ્યો છે.
ઉલ્લેખનીય છે કે આ કામગીરીથી રાજ્ય સરકારની વાહન વ્યવહાર કચેરીને અત્યાર સુધીમાં અંદાજે 7 કરોડ રૂપિયાની આવક થઈ છે. બીજી તરફ રાજ્યના ટોલનાકા પરથી પસાર થતા વાહનોએ ટેક્સ ન ભર્યો હોય, ઓવરલોડ માલ સામાન ભર્યો હોય, તેમજ નિશ્ચિત લંબાઈ-પહોળાઈથી વધુ માલ હોય તેવા વાહનચાલકો વિરૂદ્ધ કાર્યવાહી કરાશે. આ આદેશમાં રાજ્યના તમામ RTOએ ફરજીયાત 12 કલાકની શિફ્ટ મુજબ કામગીરી કરવાની સ્પષ્ટતા કરવામાં આવી છે. તેમજ ચેકિંગ રિપોર્ટ કામગીરી પૂર્ણ થયા બાદ ગૂગલશીટ મારફતે અપલોડ કરી તેની જાણ કરવાની રહેશે.