ગયા નાણાકીય વર્ષમાં અન્ય રાષ્ટ્રીય પક્ષોની તુલનામાં ભારતીય જનતા પક્ષ (ભાજપ) ને 12 ગણું એટલે કે 437 કરોડ કરતા પણ વધારે રાજકીય ભંડોળ મળ્યું છે. ચૂંટણી સુધારણાના મુદ્દા પર કામ કરતા બિન-સરકારી સંગઠન, એસોશિએશન ફોર ડેમોક્રેટિક રિફોર્મેશન (ADR) દ્વારા પ્રકાશિત કરવામાં આવેલા અહેવાલમાં આ માહિતી આપી છે. વર્ષ 2017-18 માં રાજકીય પક્ષોને 469.89 કરોડ મળ્યા છે. આમાંથી, ભાજપને 437.04 કરોડ રૂપિયા મળ્યા, જ્યારે કોંગ્રેસને 26.65 કરોડ જ મળી શક્યા છે.
જ્યારે ગુજરાતમાંથી ભારતીય જનતા પાર્ટીને 40 કરોડ અને કોંગ્રેસને 4 કરોડનું ડોનેશન મળ્યું છે ADRના રિપોર્ટ મુજબ કેડિલા ફાર્માસ્યુટિકલે 3.50 કરોડનું અને એલેમ્બીક ફાર્માસ્યુટીકલે કુલ 6 કરોડ રૂપિયાનું ડોનેશન અધિકૃત રીતે અનુક્રમે કેનેરા અને એચડીએફસી બેંક દ્વારા ચૂકવ્યું છે. જયારે નિરમા દ્વારા રૂપિયા ચાર કરોડનું ડોનેશન ચૂકવવામાં આવ્યું છે. સુરતના હેપ્પી હોમ ગ્રૂપ દ્વારા કુલ સાડા ચાર કરોડનું ડોનેશન ચૂકવવામાં આવ્યું છે, આમ બેંક ખાતામાં ચેક કે ડીમાંડ ડ્રાફ્ટ દ્વારા રકમ ચુકવવામાં આવી છે.
ભાજપને ગુજરાતમાંથી કુલ 40 કરોડનું ડોનેશન પ્રાપ્ત થયું છે જયારે સામા પક્ષે કોંગ્રેસને ચાર કરોડ રૂપિયાનું ડોનેશન પ્રાપ્ત થયું છે. કોંગ્રેસને ગુજરાતમાં બે ચાર ઉદ્યોગોને બાદ કરતા પાર્ટીના જ કાર્યકરો દ્વારા ડોનેશન આપવામાં આવ્યું છે.
ગુજરાતમાં બ્રિજ બનાવવાના મોટા મોટા કોન્ટ્રાક્ટ મેળવનાર રાજકમલ બિલ્ડર્સ દ્વારા દોઢ કરોડનું દાન ચૂકવાયું છે. જ્યારે પવન બકેરી દ્વારા રૂપિયા 50 લાખનું દાન ચૂકવાયું છે, સન બિલ્ડર્સના એન.કે.પટેલ દ્વારા 50 લાખની રકમ ચૂકવાઈ છે. આમ ભાજપ દ્વારા ગુજરાતમાંથી રૂપિયા 21 હજારથી લઈને રૂપિયા છ કરોડ સુધીનું ડોનેશન લઈને કુલ્લે 44 કરોડથી વધુ રકમ દાન હેઠળ મેળવવામાં આવી છે, જ્યારે સમગ્ર દેશમાંથી ભાજપે 437 કરોડનું દાન મેળવ્યું છે.
જાહેર રાજકીય ફંડના આશરે અડધા એટલે કે 208.56 કરોડ દિલ્હીથી આવ્યા છે. ત્યાર બાદ મહારાષ્ટ્રથી રૂ. 71.93 કરોડ મળ્યા છે. ADRએ તેના અહેવાલમાં જણાવ્યું છે કે કુલ રાજકીય ફંડ પૈકી 42.60 કરોડ રૂપિયા એટલે કે લગભગ 9 .07 ટકા ફંડ અંગે અધુરી જાણકારી મળી હોવાથી તે સુનિશ્ચિત કરી શકાયું નથી કે આ ફંડ ક્યા રાજ્યમાંથી આવ્યું છે.