ગાંધીનગરમાં રહેતી ક્રિષ્ના ટાંકને અમેરિકામાં એમેઝોન કંપની દ્વારા વાર્ષિક એક કરોડ રૂપિયાનું સેલેરી પેકેજ ઓફર થયું છે. ગુજરાતી માધ્યમમાં અભ્યાસ કરનાર ક્રિષ્નાએ કેલિફોર્નિયા સ્ટેટ યુનિવર્સિટીમાંથી માસ્ટર ઇન કમ્પ્યૂટર સાયન્સ કરી કરિયર પાથ વેમાં મશીન લર્નિંગ સાયન્ટીસ્ટ તરીકે યુનિવર્સિટીમાં એમેઝોન કંપનીના સ્ટુડન્ટ્સ એમ્બેસેડર તરીકેની પરીક્ષા સફળતાપુર્વક પાસ કરી એમેઝોન દ્વારા એવોર્ડ પણ પ્રાપ્ત કર્યો હતો. 23 વર્ષીય ક્રિષ્ના મનીષભાઇ ટાંક કહે છે કે, ફેબ્રુઆરી 2021માં એમેઝોન કંપનીમાં જરૂરી પરીક્ષાઓ અને માત્ર 30 મિનિટનો ઇન્ટરવ્યૂ આપી એમેઝોન કંપની દ્વારા 1,43,100 યુએસ ડોલર એટલે ભારતીય રૂપિયામાં એક કરોડ 4 લાખનું વાર્ષિક સેલેરી પેકેજ મળ્યું. કંપનીમાં જોઇન્ટ થતાંની સાથે જ 86,000 યુએસ ડોલરના એમેઝોનના શેર પણ મળ્યાં. મે-જુન મહિનામાં સીએટલ ખાતે એમેઝોન હેડ ક્વાટરમાં સોફટવેર ડેવલપમેન્ટ એન્જિનિયર તરીકે કંપની જોઇન્ટ કરી છે. માત્ર 23 વર્ષની વયે આટલું એક કરોડથી વધુનું સેલેરી પેકેજ મેળવનાર ક્રિષ્નાએ ગાંધીનગરમાં જ પ્રાથમિક અને માધ્યમિક શિક્ષણ મેળવ્યું હતું ત્યાર બાદ L.D.R.P. કોલેજમાંથી કમ્પ્યૂટર એન્જિનિયરિંગ પૂર્ણ કર્યું હતું.
