હાર્દિક પંડ્યાએ ખોલ્યું પોતાની સફળતાનું રહસ્ય: હવે મુંબઈ ઈન્ડિયન્સને છઠ્ઠી વાર ચેમ્પિયન બનાવવાનું છે લક્ષ્ય
સ્ટાર ઓલરાઉન્ડર હાર્દિક પંડ્યા હાલમાં IPL 2026 માટે જોરશોરથી તૈયારીઓ કરી રહ્યો છે. સીઝન શરૂ થાય તે પહેલા હાર્દિક તાજેતરમાં મુંબઈ ઈન્ડિયન્સ દ્વારા આયોજિત એક કાર્યક્રમમાં હાજર રહ્યો હતો. આ પ્રસંગે તેણે પોતાના કરિયરના સંઘર્ષ અને સફળતા પાછળના ગુપ્ત મંત્રો વિશે ખુલીને વાત કરી હતી. હાર્દિકે જણાવ્યું કે કેવી રીતે સતત સખત મહેનત કરીને તે આજે આ મુકામ પર પહોંચ્યો છે. ઉલ્લેખનીય છે કે, હાર્દિકે તાજેતરમાં ટીમ ઈન્ડિયાને T20 વર્લ્ડ કપ જીતવામાં મહત્વની ભૂમિકા ભજવી હતી અને હવે તે IPL 2026 માં મુંબઈ ઈન્ડિયન્સનું નેતૃત્વ કરતો જોવા મળશે.
સખત મહેનત અને વધારાના પ્રયત્નોનું પરિણામ
ન્યૂઝ એજન્સી પીટીઆઈના રિપોર્ટ અનુસાર, હાર્દિકે કાર્યક્રમ દરમિયાન જણાવ્યું હતું કે તેણે પોતાના કરિયરની શરૂઆત એક શુદ્ધ બેટ્સમેન તરીકે કરી હતી. પરંતુ તેની અંદર કંઈક વધુ કરવાની ઈચ્છા હતી. હાર્દિકે કહ્યું, “હું માત્ર એક બેટ્સમેન હતો. મને બસ એક જ વાતની ખબર હતી કે જો મેદાનના 12 રાઉન્ડ મારવાનું કહેવામાં આવે, તો હું 15 રાઉન્ડ મારતો હતો. આ વધારાના પ્રયત્નોને કારણે જ કોઈએ મને જોયો અને તેના એક વર્ષ બાદ મને રણજી ટ્રોફી રમવાની તક મળી.”
ટેલેન્ટ હન્ટ અને આત્મવિશ્વાસ
પોતાની વાત આગળ વધારતા હાર્દિકે મુંબઈ ઈન્ડિયન્સની ટેલેન્ટ હન્ટ ટીમની પણ પ્રશંસા કરી હતી. તેણે કહ્યું કે જ્યારે તે રણજી રમી રહ્યો હતો, ત્યારે મુંબઈ ઈન્ડિયન્સની ટીમ ખાસ તેને જોવા નહોતી આવી, છતાં તેમણે ઓળખી લીધું કે તેનામાં કંઈક ખાસ છે. હાર્દિકે સ્વીકાર્યું કે શરૂઆતના દિવસોમાં તેને પોતાના શરીરની કાળજી કેવી રીતે રાખવી તેની જાણ નહોતી, પણ તેને માત્ર મહેનત કરતા આવડતું હતું. તેણે યુવાનોને સંદેશ આપતા કહ્યું કે, “દુનિયા ભલે ઉથલપાથલ થઈ જાય, પણ મારો ભરોસો હંમેશા સખત મહેનતમાં જ રહ્યો છે.”
MI માટે છઠ્ઠું ટાઈટલ જીતવાનું સપનું
આ ઇવેન્ટમાં હાર્દિકે IPL 2026 માટે પોતાની ‘વિશ લિસ્ટ’ (ઈચ્છા સૂચિ) પણ જાહેર કરી હતી. રોહિત શર્માની કેપ્ટન્સીમાં મુંબઈ ઈન્ડિયન્સ અત્યાર સુધીમાં પાંચ વખત ચેમ્પિયન બની ચૂકી છે, પરંતુ હવે હાર્દિક પોતાની કેપ્ટન્સી હેઠળ ટીમને છઠ્ઠી વખત ટાઈટલ અપાવવા માંગે છે. હાર્દિક ઈચ્છે છે કે તેની ઓળખ એક એવા ખેલાડી તરીકે થાય જે પેશન અને સખત મહેનત માટે જાણીતો હોય. મુંબઈ ઈન્ડિયન્સના કેપ્ટન તરીકે તેનું અત્યારે સૌથી મોટું સપનું ટીમને છઠ્ઠી વખત ચેમ્પિયન બનાવવાનું છે.
