પેટ્રોલ-ડીઝલના ભાવ: ક્રૂડ ઓઇલના ભાવ ગગડ્યા છતાં ભારતમાં ઇંધણ સસ્તું થયું કે નહીં? જાણો આજના લેટેસ્ટ દર
વૈશ્વિક બજારમાં ક્રૂડ ઓઇલ (કચા તેલ)ની કિંમતોમાં સતત ફેરફાર જોવા મળી રહ્યો છે, જેના કારણે સામાન્ય જનતાની નજર દરરોજ સવારે પેટ્રોલ અને ડીઝલના ઘરેલું ભાવો પર ટકેલી હોય છે. આજે ૨૯ જૂનના રોજ સરકારી તેલ કંપનીઓએ પેટ્રોલ અને ડીઝલના નવા દર જાહેર કર્યા છે. દેશમાં ઇંધણના ભાવમાં છેલ્લે વધારો થયાને એક મહિના કરતાં વધુ સમય વીતી ગયો છે. ભારતમાં પેટ્રોલ અને ડીઝલના છૂટક ભાવ છેલ્લા ૩૪ દિવસથી સતત સ્થિર રહ્યા છે, એટલે કે આજના દિવસે સામાન્ય ગ્રાહકો માટે કિંમતોમાં કોઈ ફેરફાર કરવામાં આવ્યો નથી.
દેશમાં ઇંધણના ભાવમાં છેલ્લો મોટો ફેરફાર ૨૫ મેના રોજ જોવા મળ્યો હતો. તે સમયે સરકારી ઓઇલ માર્કેટિંગ કંપનીઓએ પેટ્રોલના ભાવમાં પ્રતિ લિટર ₹૨.૬૧ અને ડીઝલના ભાવમાં પ્રતિ લિટર ₹૨.૭૧નો મોટો વધારો ઝીંક્યો હતો. આ વધારા બાદ દેશના મોટાભાગના વિસ્તારોમાં પેટ્રોલની કિંમત હજુ પણ ૧૦૦ રૂપિયાની ઉપર ચાલી રહી છે, જે સામાન્ય નાગરિકોના ખિસ્સા પર સીધી અસર કરી રહી છે.
મહાનગરો અને મુખ્ય શહેરોમાં ઇંધણનો આજનો આંકડો
દેશની રાજધાની દિલ્હીમાં હાલમાં પેટ્રોલની કિંમત પ્રતિ લિટર ₹૧૦૨.૧૨ પર સ્થિર છે, જ્યારે ડીઝલ પ્રતિ લિટર ₹૯૫.૨૦ના ભાવે વેચાઈ રહ્યું છે. આર્થિક રાજધાની મુંબઈની વાત કરીએ તો ત્યાં ઇંધણના દર સૌથી વધુ જોવા મળી રહ્યા છે. મુંબઈમાં પેટ્રોલનો ભાવ ₹૧૧૦ની સપાટી વટાવીને પ્રતિ લિટર ₹૧૧૧.૨૧ પર પહોંચી ગયો છે, જ્યારે ડીઝલનો ભાવ પ્રતિ લિટર ₹૯૭.૩ છે.
અન્ય પ્રમુખ શહેરો તરફ નજર કરીએ તો, કોલકાતામાં પેટ્રોલ ₹૧૧૩.૫૧ અને ડીઝલ ₹૯૯.૮૨ પ્રતિ લિટર મળી રહ્યું છે. મધ્યપ્રદેશના ભોપાલમાં પેટ્રોલનો ભાવ ₹૧૧૪.૫૪ અને ડીઝલનો ભાવ ₹૯૯.૬૪ છે. બિહારના પટનામાં ગ્રાહકોએ પેટ્રોલ માટે ₹૧૧૩.૩૫ અને ડીઝલ માટે ₹૯૯.૩૬ ચૂકવવા પડી રહ્યા છે. જ્યારે પુણેમાં પેટ્રોલ ₹૧૧૧.૫૨ અને ડીઝલ ₹૯૮.૧૫ પ્રતિ લિટરના ભાવે સ્થિર છે.
બીજી તરફ, દિલ્હીને અડીને આવેલા ગુરુગ્રામમાં પેટ્રોલ ₹૧૦૩.૩૨ અને ડીઝલ ₹૯.૫૧ પ્રતિ લિટર છે. પહાડી રાજ્ય હિમાચલ પ્રદેશના શિમલામાં પેટ્રોલ ₹૧૦૨.૫૫ અને ડીઝલ ₹૯૪.૬૧ છે, જ્યારે કેન્દ્રશાસિત પ્રદેશ ચંદીગઢમાં પેટ્રોલ ₹૧૦૧.૫૧ અને ડીઝલ પ્રતિ લિટર ₹૮૯.૪૭ના પ્રમાણમાં સસ્તા ભાવે ઉપલબ્ધ છે. દક્ષિણ ભારતના બેંગલુરુ અને હૈદરાબાદ જેવા આઈટી હબમાં પણ પેટ્રોલ ₹૧૧૦ની ઉપર છે, જો કે હૈદરાબાદમાં ડીઝલનો ભાવ ₹૧૦૩.૮૨ હોવાથી તે અન્ય મેટ્રો શહેરો કરતા મોંઘું છે.
વૈશ્વિક બજારમાં ક્રૂડ ઓઇલ કેમ સસ્તું થઈ રહ્યું છે?
ગયા શુક્રવારે સવારે આંતરરાષ્ટ્રીય બજારમાં ક્રૂડ ઓઇલની કિંમતોમાં નરમાઈ જોવા મળી હતી અને નિષ્ણાતોના મતે આ અઠવાડિયે તેમાં વધુ નોંધપાત્ર ઘટાડો થઈ શકે છે. તેની પાછળનું મુખ્ય કારણ અમેરિકા અને ઈરાન વચ્ચેના રાજદ્વારી તણાવમાં આવેલો ઘટાડો છે. આ તણાવ ઓછો થવાને કારણે હોર્મુઝ સ્ટ્રેટ (Hormuz Strait) દ્વારા વૈશ્વિક સ્તરે થતા ઓઇલ સપ્લાયની ચિંતાઓ ઘણી અંશે દૂર થઈ ગઈ છે. હોર્મુઝની આસપાસ અટવાયેલા ઓઇલ ટેન્કરો હવે ધીમે-ધીમે મુક્ત થઈ રહ્યા છે, જેના લીધે સપ્લાય ચેઈન સુધરી છે.
આ વૈશ્વિક સુધારાની અસર હેઠળ બ્રેન્ટ ક્રૂડ ફ્યુચર્સ ૧૯ સેન્ટ અથવા ૦.૨૫% ઘટીને $૭૫.૦૭ પ્રતિ બેરલ પર આવી ગયું છે. તેવી જ રીતે, યુએસ વેસ્ટ ટેક્સાસ ઇન્ટરમીડિયેટ (WTI) પણ ૧૩ સેન્ટ અથવા ૦.૧”૮% ના ઘટાડા સાથે $૭૧.૭૯ પ્રતિ બેરલ પર ટ્રેડ કરી રહ્યું હતું. આંતરરાષ્ટ્રીય બજારમાં જો ક્રૂડ ઓઇલ લાંબા સમય સુધી નીચલા સ્તરે રહેશે, તો આગામી દિવસોમાં ભારતીય તેલ કંપનીઓ સ્થાનિક બજારમાં પેટ્રોલ અને ડીઝલના ભાવ ઘટાડીને ગ્રાહકોને મોટી રાહત આપી શકે છે.
