Video: ‘પટકી પટકીને મારીશ’, મુંબઈમાં ઓટો ચાલકની ગુંડાગીરી, યુવતીઓને જાહેરમાં આપી ધમકી
મુંબઈના વ્યસ્ત રસ્તાઓ પર મોડી રાત્રે બે મહિલાઓ માટે ઓટો રિક્ષાની મુસાફરી તે સમયે ભયાનક બની ગઈ, જ્યારે ઓટો ચાલકે તેમની સાથે ગેરવર્તણૂક કરી અને મારી નાખવાની ધમકી આપી. આ ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે, જેને જોઈને લોકોમાં ભારે રોષ જોવા મળી રહ્યો છે. નેટિઝન્સ આ ઘટનાને શરમજનક ગણાવી રહ્યા છે અને મુંબઈ જેવા સુરક્ષિત મનાતા શહેરમાં મહિલાઓની સુરક્ષા પર ચિંતા વ્યક્ત કરી રહ્યા છે.
શું હતી સમગ્ર ઘટના?
આ ઘટના ત્યારે બની જ્યારે ટીના સોની નામની યુવતી તેની બહેનપણી સાથે બાંદ્રા સ્ટેશનથી જીઓ કન્વેન્શન સેન્ટર (Jio Convention Center) જઈ રહી હતી. ટીનાના જણાવ્યા અનુસાર, શરૂઆતમાં બધું બરાબર હતું, પરંતુ અચાનક ડ્રાઈવરે યુવતીઓના ઊંચા અવાજે વાત કરવા સામે વાંધો ઉઠાવ્યો અને તેમને અધવચ્ચે જ ઉતરી જવા કહ્યું.
ઓટો ચાલકની ગાળાગાળી અને ધમકી
જ્યારે યુવતીઓએ લોકેશન પર પહોંચીને ભાડું આપવાની વાત કરી, ત્યારે ઓટો ડ્રાઈવરે પોતાનો પિત્તો ગુમાવ્યો હતો. ટીનાનો આરોપ છે કે ડ્રાઈવરે તરત જ પૈસાની માંગણી કરીને ગાળો આપવાનું શરૂ કર્યું હતું. ત્યારબાદ તેણે ધમકી આપતા કહ્યું કે, “અહીં જ પટકી પટકીને મારીશ.” એટલું જ નહીં, યુવતીઓને ડરાવવા માટે તેણે પોતાના સાથીદારોને બોલાવવાની પણ ધમકી આપી હતી. આરોપ છે કે જ્યારે યુવતીઓએ વીડિયો રેકોર્ડ કરવાનું શરૂ કર્યું, ત્યારે ડ્રાઈવરે કથિત રીતે તેની ઓટો યુવતીઓ પર ચઢાવવાનો પણ પ્રયાસ કર્યો હતો.
View this post on Instagram
વીડિયોમાં શું જોવા મળ્યું?
વાયરલ થઈ રહેલા વીડિયોમાં સ્પષ્ટ દેખાય છે કે મુંબઈના વ્યસ્ત રોડ પર તે સમયે ઘણા લોકો હાજર હતા અને નજીકમાં ટ્રાફિક પોલીસ પણ તૈનાત હતી, પરંતુ કોઈએ પણ વચ્ચે પડીને યુવતીઓની મદદ કરવાની તસ્દી લીધી ન હતી. ડ્રાઈવર યુવતીઓને ધમકાવીને ત્યાંથી ફરાર થઈ ગયો હતો.
પોલીસ કાર્યવાહી
પીડિત યુવતીએ સોશિયલ મીડિયા પર માહિતી આપી છે કે તેણે આ મામલે પોલીસમાં સત્તાવાર ફરિયાદ નોંધાવી દીધી છે. પુરાવા તરીકે તેણે વીડિયો અને ઓટોનો નંબર પોલીસને સોંપ્યો છે. હાલ પોલીસ આ ગુંડા તત્વ એવા ઓટો ચાલકની શોધખોળ કરી રહી છે.
