ભારત-અફઘાનિસ્તાન પ્રથમ T20 મેચ પર સંકટના વાદળો: દિલ્હીમાં BRICS સમિટને કારણે સિક્યોરિટી એલર્ટ, દિલ્હી પોલીસે DDCAને પત્ર લખી રીશેડ્યુલ કરવા કરી વિનંતી
ભારત અને અફઘાનિસ્તાન વચ્ચે 13 સપ્ટેમ્બરથી શરૂ થઈ રહેલી ત્રણ ટી૨૦ આંતરરાષ્ટ્રીય મેચોની શ્રેણીની પ્રથમ મેચના આયોજન પર અનિશ્ચિતતાના કાળા વાદળો ઘેરાયા છે. દિલ્હીના અરુણ જેટલી સ્ટેડિયમ ખાતે આયોજિત આ મેચના આયોજન સામે સુરક્ષા સંબંધિત મોટી ચિંતા ઊભી થઈ છે. દિલ્હીમાં 11 થી 13 સપ્ટેમ્બર દરમિયાન યોજાનારી હાઈ-પ્રોફાઈલ ‘બ્રિક્સ (BRICS) સમિટ’ને કારણે દિલ્હી પોલીસે દિલ્હી એન્ડ ડિસ્ટ્રિક્ટ ક્રિકેટ એસોસિએશન (DDCA) ને પત્ર લખીને 13 સપ્ટેમ્બરે યોજાનારી મેચની તારીખમાં ફેરફાર કરવા વિનંતી કરી છે. જોકે, આ અંગે ભારતીય ક્રિકેટ કંટ્રોલ બોર્ડ (BCCI) અથવા અફઘાનિસ્તાન ક્રિકેટ બોર્ડ (ACB) તરફથી હજુ સુધી કોઈ સત્તાવાર નિવેદન કે અંતિમ નિર્ણય જાહેર કરવામાં આવ્યો નથી.
BRICS સમિટ અને ટ્રાફિક ડાયવર્ઝન: દિલ્હી પોલીસ સામે સુરક્ષાનો મોટો પડકાર
દિલ્હીમાં 11 થી 13 સપ્ટેમ્બર દરમિયાન યોજાનારી BRICS સમિટમાં વિશ્વના અનેક દેશોના દિગ્ગજ નેતાઓ, રાષ્ટ્રાધ્યક્ષો અને પ્રતિનિધિઓ હાજરી આપવાના છે. આંતરરાષ્ટ્રીય સ્તરના આ મહત્વપૂર્ણ કાર્યક્રમને ધ્યાનમાં રાખીને સમગ્ર દિલ્હીમાં અત્યંત કડક સુરક્ષા બંદોબસ્ત ગોઠવવામાં આવ્યો છે. 13 સપ્ટેમ્બરના રોજ સમગ્ર રાજધાનીમાં વ્યાપક ટ્રાફિક નિયંત્રણો અને વિવિધ રસ્તાઓ પર ડાયવર્ઝન અમલમાં રહેશે.
દિલ્હી પોલીસના ડેપ્યુટી કમિશનરે DDCA ને પાઠવેલા સત્તાવાર પત્રમાં સ્પષ્ટ ઉલ્લેખ કર્યો છે કે, 13 સપ્ટેમ્બરની સાંજે અરુણ જેટલી સ્ટેડિયમ ખાતે ૨૦,૦૦૦ થી ૨૫,૦૦૦ દર્શકોની ભીડ એકત્ર થવાની સંભાવના છે. એક જ દિવસે બે મોટા આયોજનો હોવાથી પોલીસ માટે મેચ માટે પૂરતો સુરક્ષા બંદોબસ્ત પૂરો પાડવો અત્યંત મુશ્કેલ બની રહેશે. દિલ્હી પોલીસે સ્પષ્ટ કર્યું છે કે તેમની પ્રાથમિકતા આંતરરાષ્ટ્રીય BRICS સમિટની સુરક્ષા જાળવવાની રહેશે, જેથી T20 મેચને 13 સપ્ટેમ્બર સિવાયની કોઈ અન્ય તારીખે યોજવામાં આવે તેવી વિનંતી કરવામાં આવી છે.
DDCAનું સ્ટેન્ડ અને BCCI-ACB ના નિર્ણય પર મંડાયેલી નજરો
પોલીસના પત્ર અંગે પ્રતિક્રિયા આપતાં DDCA એ સ્પષ્ટતા કરી છે કે આ હોસ્ટિંગ સંપૂર્ણપણે અફઘાનિસ્તાન ક્રિકેટ બોર્ડ અને BCCI ના અધિકારક્ષેત્રમાં આવે છે. DDCA એ જણાવ્યું છે કે જો મેચના કાર્યક્રમ કે તારીખમાં કોઈ ફેરફાર કરવાનો નિર્ણય લેવામાં આવશે, તો તે અંગેની માહિતી યોગ્ય સમયે ક્રિકેટ પ્રેમીઓને આપવામાં આવશે.
Delhi Traffic Police has requested DDCA to reschedule the cricket match on 13th September between India and Afghanistan, at Arun Jaitley Stadium.
DDCA has told them it’s not their event and if any change in the date happens, it will be notified in due course: https://t.co/nmyVoXgMGZ
— ANI (@ANI) September 10, 2026
અરુણ જેટલી સ્ટેડિયમમાં શ્રેણીની ત્રણેય મેચો અનુક્રમે 13, 15 અને 17 સપ્ટેમ્બરના રોજ યોજાવાનું નક્કી કરવામાં આવ્યું હતું. નોંધનીય છે કે આ સિરીઝનું અધિકૃત યજમાન અફઘાનિસ્તાન ક્રિકેટ બોર્ડ છે, પરંતુ ભારતે તેમને દિલ્હીનું સ્ટેડિયમ ઉપલબ્ધ કરાવ્યું છે. હવે જો 13 સપ્ટેમ્બરની મેચ પાછી ઠેલવવામાં આવે, તો આખી શ્રેણીના શેડ્યૂલ પર તેની અસર પડી શકે છે.
સમયપત્રક અને આગળનો માર્ગ
નિર્ધારિત કાર્યક્રમ મુજબ પ્રથમ T20 મેચ સાંજે 7:00 વાગ્યે શરૂ થવાની છે, જેમાં સાંજે 6:30 વાગ્યે ટોસ યોજાશે. પૂર્ણ ૨૦ ઓવરની મેચ રાત્રે લગભગ 10:30 વાગ્યા સુધી ચાલે છે. રાત્રિના સમયે હજારો દર્શકોની અવરજવર અને વીઆઈપી ચળવળને નિયંત્રિત કરવી એ પોલીસ માટે ચિંતાનો વિષય છે.
