સેનાની રેજિમેન્ટ સિસ્ટમમાં અગ્નિપથ યોજનાથી કોઈ ફેરફાર કરવામાં આવશે નહીં. પ્રથમ વર્ષમાં ભરતી થનાર અગ્નિવીરોની સંખ્યા કુલ સશસ્ત્ર દળોના ત્રણ ટકા હશે. દેશના ઘણા ભાગોમાં આ નવી યોજના સામે યુવાનોના હિંસક વિરોધ વચ્ચે સરકારી સૂત્રોએ ગુરુવારે આ માહિતી આપી.
સૂત્રોએ જણાવ્યું કે આ યોજનાનો હેતુ સશસ્ત્ર દળોમાં યુવાનો માટે તકો વધારવાનો છે. આ હેઠળ, સશસ્ત્ર દળોમાં વર્તમાન નોંધણીથી લગભગ ત્રણ ગણી સંખ્યામાં સૈનિકોની ભરતી કરવામાં આવશે. જો કે તેનો ચોક્કસ સમયગાળો હજુ કહી શકાય તેમ નથી. ઉલ્લેખનીય છે કે સરકારે આર્મી, એરફોર્સ અને નેવીમાં ચાર વર્ષના કોન્ટ્રાક્ટ પર સૈનિકોની ભરતી માટે આ યોજના શરૂ કરી છે.
દાયકાઓ જૂની સૈન્ય ભરતી પ્રણાલીમાં આ એક મોટો ફેરફાર માનવામાં આવે છે. આ અંતર્ગત સાડા 17 થી 21 વર્ષના યુવાનોને સેનાની ત્રણેય પાંખમાં સામેલ કરવામાં આવશે. ચાર વર્ષની સેવા પૂરી થવા પર, 25 ટકા નિયમિત સેવામાં મૂકવામાં આવશે, જ્યારે 4માંથી 3 અગ્નિવીર સેવા ચાલુ રાખી શકશે નહીં. તેમના માટે સરકાર એજ્યુકેશન, જોબ અને બિઝનેસ માટે બીજા ઘણા વિકલ્પો આપી રહી છે.
રેજિમેન્ટ્સને શ્રેષ્ઠ અગ્નિવીર મળશેઃ સૂત્રોએ જણાવ્યું હતું કે અગ્નિપથ યોજના સાથે ઘણી રેજિમેન્ટની રચના અંગે શંકા વ્યક્ત કરવામાં આવી રહી છે. રાજપૂત, જાટ, શીખ વગેરે જાતિઓમાંથી ભરતી કરવામાં આવે છે. સૂત્રોના જણાવ્યા અનુસાર અગ્નિપથથી રેજિમેન્ટલ સિસ્ટમ પર કોઈ અસર નહીં થાય. તેના બદલે, તેઓ શ્રેષ્ઠ અગ્નિવીર મેળવશે. આનાથી તેમના એકમોની એકતામાં વધુ સુધારો થશે.
સૈન્યના અધિકારીઓએ જણાવ્યું હતું કે પ્રથમ વર્ષમાં સેનામાં અગ્નિવીરોનો ગુણોત્તર બહુ બેહિસાબી નહીં હોય. આ યોજના હેઠળ નિયુક્ત કરાયેલા સૈનિકોના પ્રદર્શનની ચાર વર્ષ બાદ ચકાસણી કરવામાં આવશે અને તેમને ફરીથી સેનામાં સામેલ કરવામાં આવશે. આવી સ્થિતિમાં સેનાને સુપરવાઈઝર રેન્ક માટે પરીક્ષિત લોકો મળશે.
સરકારે યુવાનોને ગેરમાર્ગે દોરાતા અટકાવવા આ યોજનાને અગ્નિપરિક્ષા નહીં તક ગણાવી છે અને તેના લાભ ગણાવ્યા છે.
દેશના યુવાનોને સમજાવવા માટે સરકારે અનૌપચારિકરૂપે એક ફેક્ટ શીટ જાહેર કરી છે. તેનું મથાળુ છે ‘અગ્નિપથ, માન્યતા વિરુદ્ધ હકીકત.’ આ શીટ મારફત સરકારે તેનો પક્ષ રજૂ કરવાનો પ્રયત્ન કર્યો છે. સરકારે આ ફેક્ટ શીટમાં યોજના અંગે ઊઠેલા સવાલોના જવાબ આપ્યા છે. સરકારે જણાવ્યું કે યુવાનોને માત્ર ચાર વર્ષમાં ૨૩.૪૩ લાખની કમાણીની તક મળશે. ચાર વર્ષ પછી અગ્નિવીરોને મળનારા રૂ. ૧૧,૭૨,૧૬૦માં અડધું યોગદાન અગ્નિવીરનું હશે જ્યારે બાકીનું અડધું સરકારનું રહેશે.
અગ્નિવીરોના ભવિષ્ય અંગે સરકારનું કહેવું છે કે જે લોકો આંત્રપ્રિન્યોર બનવા માગશે તેમને નાણાકીય મદદ અને લોન અપાશે. આગળ અભ્યાસ કરવા ઈચ્છનારાને ધો.-૧૨ને સમાન પ્રમાણપત્ર અપાશે. નોકરી ઈચ્છે તેમને સીએપીએફ અને રાજ્યોની પોલીસની ભરતીમાં અગ્રતા અપાશે. યુવાનો માટે આ યોજનાથી તકો ઘટવાના બદલે વધી જશે. આગામી સમયમાં વર્તમાન કરતાં ત્રણ ગણી વધુ ભરતીઓ થશે
