ભારત ની સરહદે ઉબડીયા કરી રહેલા ચીન ને પાઠ ભણાવવા માટે ભારતે આકરા પગલાં લઈ ખુબજ લોકપ્રિય મોબાઈલ ગેમ PUBG પર પ્રતિબંધ લાદી દેતા તેના ઘેરા પ્રત્યાઘાત પડ્યા છે અને આ ગેમ ની માલિકી કંપની ટેન્સેન્ટના શેરમાં 2 ટકાનો ઘટાડો થવા સાથે કંપનીની સંપત્તિમાં 14 અબજ ડોલર જેટલું મોટું નુકશાન થતા ચાઇના ફફડી ઉઠ્યું છે અને ભારત ને આવા પગલાં નહિ ભરવા રિકવેસ્ટ કરી છે. ટેન્સેન્ટ એ ચાઈનિઝ ટેકનોલોજી કંપની છે અને હોંગકોંગના શેરબજારમાં તેનું લિસ્ટિંગ થયેલું છે. 1998માં સ્થપાયેલી આ કંપનીની ગણતરી જગતની ટોચની ટેકનોલોજી કંપનીઓમાં થાય છે. ટેન્સેન્ટનું કુલ માર્કેટ કેપ જ 660 અબજ ડોલરથી વધારે છે. પરંતુ ભારતના એક નિર્ણયથી ટેન્સેન્ટને મોટું નુકશાન પહોંચ્યું છે.
આ પ્રતિબંધ બાદ તેની વળતી પ્રતિક્રિયા માં ચીની વાણિજ્ય મંત્રાલયના પ્રવક્તા ગાઓ ફેંગે જણાવ્યું હતું કે, ભારતે રાષ્ટ્રીય સુરક્ષાના કારણનો દુરુપયોગ કરી ચીની કંપનીઓ સામે પક્ષપાતી પ્રતિબંધાત્મક પગલાં લીધાં છે. ચીન ભારત સરકારના આ નિર્ણયનો ઉગ્ર વિરોધ કરે છે.
ગાઓએ જણાવ્યું હતું કે, ચીન હંમેશા તેની કંપનીઓને વિદેશોમાં આંતરરાષ્ટ્રીય અને સ્થાનિક નિયમોનું પાલન કરવા જણાવે છે. અમને આશા છે કે ભારત દ્વિપક્ષીય સહકાર માટે સાથે મળીને કામ કરશે જેથી આંતરરાષ્ટ્રીય રોકાણકારોને બિઝનેસ માટે મુક્ત વાતાવરણ ઉપલબ્ધ કરાવી શકાય. બેઇજિંગ એમ પણ માને છે કે ભારતે અમેરિકાના દબાણમાં આવીને ચીની મોબાઇલ એપ્સ પર પ્રતિબંધ લાદ્યો છે.
ભારત દ્વારા મૂકાયેલા પ્રતિબંધની ટીકા કરતા ચીનના વિદેશ મંત્રાલયે જણાવ્યું કે નોબલ પુરસ્કાર વિજેતા રવિન્દ્રનાથ ટાગોર અને ચીનમાં યોગની લોકપ્રિયતા છે તો શું અમારે તે બંધ કરી દેવાનો. ચીની નાગરિકોમાં રવિન્દ્રનાથ ટાગોરની કવિતાઓ અને યોગની લોકપ્રિયતાને ચીન ઘૂસણખોરી અથવા તો ધમકી તરીકે જોતું નથી.
ચીનની અનેક એપ્સ માટે ભારત મોટું માર્કેટ છે. પબ્જીના પણ સૌથી વધુ 17.5 કરોડ યુઝર્સ ભારતમાં હતા.
દરમિયાન ટેન્સેન્ટના અધિકારીઓએ કહ્યુ હતુ કે તેઓ કોઈ રીતે યુઝર્સની પ્રાઈવસીનો ભંગ કરતા નથી. વધુમાં તેઓ ભારતમાં તેમની કામગીરી ચાલતી રહે એટલા માટે ભારત સરકાર સાથે વાત પણ કરશે. આમ પબજી ઉપર પ્રતિબંધ મૂકાતા ચીન માં તેનું જોરદાર રિએક્શન આવ્યું છે.
