ઇન્ટરનેટ, ટેકનોલોજી અને ઇ-પેમેન્ટ જેવી સુવિધા જેટલી સારી છે એટલી જ ખરાબ પણ છે. આજના ડિજિટલ યુગમાં તમે ડિજિટલ ફ્રોડનો શિકાર બની શકો છો. ભારતની ક્રિપ્ટોકરન્સી એક્સચેન્જ-વોલેટ બાય યુ કોઈન હેક થઈ જતાં દેશના ૩.૨૫ લાખ યુઝર્સનો સંવેદનશીલ ડેટા લીક થયો હોવાનો દાવો કરાયો છે. એક ખાનગી સાઈબર સુરક્ષા રીસર્ચ એજન્સીના કહેવા પ્રમાણે ભારતના નાગરિકોની વિગતો ડાર્ક વેબમાં વેંચવા કાઢવામાં આવી છે.
સાઈબર સુરક્ષા એજન્સીના દાવા પ્રમાણે ઈન્ડિયન બેઝ્ડ ગ્લોબલ ક્રિપ્ટોકરન્સી એક્સચેન્ડ એન્ડ વોલેટ વાય યુ કોઈન હેક થઈ જતાં ૩ લાખ પચીસ હજાર યુઝર્સનો ડેટા લીક થઈ ગયો છે. આ ડેટામાં કેવાયસીનો પણ સમાવેશ થાય છે. એટલે કે પાનકાર્ડ, પાસપોર્ટ, બેંક ડિટેઈલ, યુઝરની વોલેટ ડિટેલ અને ડિપોઝીટની હિસ્ટ્રીનો રેકોર્ડ હેકર્સ પાસે પહોંચી ગયો છે અને આ રેકોર્ડ ડાર્ક વેબમાં વેંચવા કઢાયો છે.
એજન્સીના દાવા પ્રમાણે યુઝર્સના ડેટાની છ જીબીની ફાઈલ ડાર્ક વેબમાં વેંચવા કાઢવામાં આવી છે અને તેની ત્રણ બેકઅપ ફાઈલ પણ સાથે જોડવામાં આવી છે. આ ડેટાના આધારે યુઝર્સને ઈમેઈલ કે મેસેજ મોકલીને છેતરપિંડી થઈ શકે છે. જોકે, બાય યુ કોઈને આ અંગે કોઈ નિવેદન આપ્યું ન હતું.
હેકિંગની આવી જ બીજી ઘટના પિક્સલર સાથે થઈ હતી. ફ્રી ફોટો એડિટર એપ પિક્સલરમાંથી હેકર્સે દુનિયાના ૧૯ લાખ યુઝર્સના નંબર,. નામ, ઈમેઈલ આઈડી, એડ્રેસ જેવો ડેટા તફડાવી લીધો છે. હેકર્સે આ ડેટા ડાર્ક વેબના હેકિંગ ફોરમમાં ફ્રીમાં ઉપલબ્ધ કરાવ્યો હોવાનો દાવો રીપોર્ટમાં થયો હતો. બ્લીપિંગ કમ્પ્યુટર્સના અહેવાલ પ્રમાણે શિંકીહંટર્સ નામના હેકર્સના ગુ્રપે આ કારસ્તાન કર્યું હતું. એજન્સીએ પિક્સલરના યુઝર્સને તાત્કાલિક પાસવર્ડ બદલી નાખવાની સલાહ આપી હતી.
