ગિનીસ વર્લ્ડ રેકોર્ડ: ભારતે AI સમિટમાં રચ્યો ઈતિહાસ, 24 કલાકમાં 2.5 લાખથી વધુ લોકોએ લીધા ‘જવાબદાર AI’ ના શપથ
દિલ્હીના ભારત મંડપમમાં આયોજિત ‘ઇન્ડિયા AI ઇમ્પેક્ટ સમિટ 2026’ ભારત માટે ગૌરવની ક્ષણ લઈને આવી છે. આ ગ્લોબલ સમિટ દરમિયાન ભારતે માત્ર 24 કલાકમાં આર્ટિફિશિયલ ઇન્ટેલિજન્સ (AI) ના જવાબદાર ઉપયોગ માટે સૌથી વધુ શપથ મેળવવાનો ગિનીસ વર્લ્ડ રેકોર્ડ પોતાના નામે કર્યો છે. કેન્દ્રીય મંત્રી અશ્વિની વૈષ્ણવે આ મોટી સિદ્ધિની જાહેરાત કરતા દેશવાસીઓને અભિનંદન પાઠવ્યા હતા.
શું છે આ નવો વર્લ્ડ રેકોર્ડ?
સત્તાવાર માહિતી મુજબ, 16 થી 17 ફેબ્રુઆરી 2026 દરમિયાન માત્ર 24 કલાકના ગાળામાં ભારતે કુલ 2,50,946 માન્ય શપથ (Pledges) પ્રાપ્ત કર્યા છે. આ અભિયાન ‘ઇન્ડિયા AI મિશન’ હેઠળ ઇન્ટેલ ઇન્ડિયાના સહયોગથી શરૂ કરવામાં આવ્યું હતું. નાગરિકોને પોર્ટલ દ્વારા AI ના નૈતિક, સર્વસમાવેશક અને જવાબદાર ઉપયોગ માટે પ્રતિજ્ઞા લેવા આમંત્રણ અપાયું હતું. ખાસ વાત એ છે કે, શરૂઆતનો લક્ષ્યાંક માત્ર 5,000 શપથનો હતો, પરંતુ જનતાના ઉત્સાહે આ આંકડાને રેકોર્ડ સ્તરે પહોંચાડી દીધો.
યુવાનોને મળ્યા ડિજિટલ બેજ અને લર્નિંગ એક્સેસ
ગિનીસ વર્લ્ડ રેકોર્ડના નિર્ણાયકોએ સત્તાવાર રીતે આ રેકોર્ડની પુષ્ટિ કરી છે. આ અભિયાનમાં ભાગ લેનારા લોકોને ડેટા પ્રાઈવસી, પારદર્શિતા અને ખોટી માહિતી (Misinformation) સામે લડવા જેવા મહત્વના પાસાઓ પર ધ્યાન આપવા પ્રોત્સાહિત કરવામાં આવ્યા હતા. શપથ પૂર્ણ કરનાર દરેક વ્યક્તિને ડિજિટલ બેજ અને AI લર્નિંગ પાથ-વેનું એક્સેસ પણ આપવામાં આવ્યું છે, જેથી તેઓ આ ટેકનોલોજીને વધુ ઊંડાણપૂર્વક સમજી શકે.
PM મોદીની પ્રેરણા અને સુરક્ષિત ભવિષ્ય
કેન્દ્રીય મંત્રી અશ્વિની વૈષ્ણવે આ સફળતાનો શ્રેય વડાપ્રધાન નરેન્દ્ર મોદીના વિઝનને આપ્યો હતો. તેમણે જણાવ્યું કે, “વડાપ્રધાને હંમેશા યુવાનોને ટેકનોલોજીનો ઉપયોગ સમાજ હિતમાં અને જવાબદારીપૂર્વક કરવા પ્રેરણા આપી છે. આ રેકોર્ડ સાબિત કરે છે કે ભારત માત્ર AI અપનાવવામાં જ નહીં, પણ તેના નૈતિક ઉપયોગમાં પણ વિશ્વનું નેતૃત્વ કરવા તૈયાર છે.”
આ સમિટમાં વિશ્વભરના ટેક નિષ્ણાતો, સંશોધકો અને ઉદ્યોગ જગતના દિગ્ગજો હાજર રહ્યા હતા, જેમણે ભારતના આ ડિજિટલ પરિવર્તનની મુક્ત કંઠે પ્રશંસા કરી હતી.
