IPL 2026 પોઈન્ટ્સ ટેબલ: ચેન્નાઈની ‘સુપર’ છલાંગ, મુંબઈની હાલત કફોડી અને 3 ટીમોને ફટકો
આઈપીએલના ઈતિહાસમાં જ્યારે પણ ચેન્નાઈ સુપર કિંગ્સ (CSK) ફોર્મમાં આવે છે, ત્યારે બાકીની ટીમો માટે ખતરાની ઘંટડી વાગી જાય છે. મુંબઈ ઇન્ડિયન્સ સામેની મેચમાં ચેન્નાઈએ જે રીતે 100 રનથી વધુના અંતરથી જીત મેળવી, તેણે માત્ર પોઈન્ટ્સ જ નથી અપાવ્યા પણ તેમના ‘નેટ રન રેટ’ને પણ આસમાને પહોંચાડી દીધો છે. આ એક જીતે પોઈન્ટ્સ ટેબલમાં જાણે ભૂકંપ લાવી દીધો છે.
ચેન્નાઈની જોરદાર વાપસી: પાંચમા નંબર પર જમાવ્યો કબજો
મેચ પહેલા સીએસકેની ટીમ મધ્યક્રમમાં સંઘર્ષ કરી રહી હતી, પરંતુ મુંબઈ સામેની શાનદાર જીત બાદ તે હવે સીધી પાંચમા નંબર પર પહોંચી ગઈ છે. અત્યારે ચેન્નાઈ, દિલ્હી કેપિટલ્સ (DC) અને ગુજરાત ટાઇટન્સ (GT) ત્રણેય પાસે 6-6 પોઈન્ટ્સ છે. પરંતુ મુંબઈને જે રીતે કારમી હાર આપી છે, તેના કારણે ચેન્નાઈનો નેટ રન રેટ અન્ય બે ટીમો કરતા ઘણો શ્રેષ્ઠ થઈ ગયો છે. આ છલાંગને કારણે દિલ્હી, ગુજરાત અને મુંબઈ ત્રણેય ટીમોએ એક-એક સ્થાન નીચે ઉતરવું પડ્યું છે.
ટોપ-4ની સ્થિતિ: પંજાબ અને રાજસ્થાનનો દબદબો
પોઈન્ટ્સ ટેબલમાં ઉપરની ચાર ટીમોએ હાલમાં પોતાનું સ્થાન મજબૂત રાખ્યું છે.
- પંજાબ કિંગ્સ: હાલમાં પોઈન્ટ્સ ટેબલમાં પ્રથમ ક્રમે છે અને તેમનું પ્રદર્શન અત્યંત સાતત્યપૂર્ણ રહ્યું છે.
- રાજસ્થાન રોયલ્સ: સંજુ સેમસનની ટીમ બીજા નંબર પર અડિંગો જમાવીને બેઠી છે.
- રોયલ ચેલેન્જર્સ બેંગલુરુ (RCB): 8 પોઈન્ટ્સ સાથે ત્રીજા સ્થાને છે.
- સનરાઈઝર્સ હૈદરાબાદ (SRH): ચોથા નંબર પર પોતાનું વર્ચસ્વ જાળવી રાખ્યું છે.
ચેન્નાઈ હવે માત્ર એક જીત દૂર છે ટોપ-4માં પ્રવેશવા માટે. જો આગામી મેચોમાં પણ આવું જ પ્રદર્શન ચાલુ રહ્યું તો સીએસકે પ્લેઓફની રેસમાં સૌથી પ્રબળ દાવેદાર બની જશે.
મુંબઈ ઇન્ડિયન્સ અને KKR માટે મુશ્કેલીના વાદળો
આઈપીએલની સૌથી સફળ ટીમ ગણાતી મુંબઈ ઇન્ડિયન્સ માટે 2026ની સિઝન અત્યાર સુધી કોઈ ખરાબ સ્વપ્ન જેવી રહી છે. 7 મેચ રમ્યા પછી પણ મુંબઈ પાસે માત્ર 4 જ પોઈન્ટ છે. આવી જ હાલત લખનૌ સુપર જાયન્ટ્સ (LSG) ની છે. સૌથી વધુ ચિંતાજનક સ્થિતિ કોલકાતા નાઈટ રાઈડર્સ (KKR) ની છે, જે સાત મેચમાં માત્ર 3 પોઈન્ટ સાથે તળિયે સંઘર્ષ કરી રહી છે. મુંબઈ માટે હવે દરેક મેચ ‘કરો અથવા મરો’ જેવી બની ગઈ છે. જો તેઓ હવે એક પણ મેચ હારશે, તો પ્લેઓફના દરવાજા તેમના માટે લગભગ બંધ થઈ જશે.
આજનો મોટો મુકાબલો: RCB vs GT
આજે એટલે કે 24 એપ્રિલ, શુક્રવાર ના રોજ બેંગલુરુના એમ. ચિન્નાસ્વામી સ્ટેડિયમમાં એક રોમાંચક મેચ થવાની છે. રોયલ ચેલેન્જર્સ બેંગલુરુ (RCB) અને ગુજરાત ટાઇટન્સ (GT) આમને-સામને ટકરાશે.
- જો આરસીબી આ મેચ જીતશે તો તે 10 પોઈન્ટ સાથે પોઈન્ટ્સ ટેબલમાં બીજા નંબરે પહોંચી શકે છે.
- બીજી તરફ, ગુજરાત ટાઇટન્સ માટે આ મેચ ગૌરવની સાથે સાથે અસ્તિત્વની લડાઈ છે. જો ગુજરાત જીતશે તો તે ફરીથી નંબર 5 પર આવી જશે અને ચેન્નાઈને નીચે ધકેલી દેશે.
ચિન્નાસ્વામીની નાની બાઉન્ડ્રી અને બેટ્સમેનો માટે સ્વર્ગ સમાન પીચ પર રનનો વરસાદ થવાની પૂરી શક્યતા છે. ફેન્સ વિરાટ કોહલી અને શુભમન ગિલ વચ્ચેની જંગ જોવા માટે આતુર છે.
